ކުރިއަށް އޮތް ރިޔާސީ އިންތިހާބުގައި ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވާދަކުރައްވާ ހާލަތެއްގައި ފުރިހަމަ އެހީތެރިކަން ލިބިވަޑައިގަންނަވާނެ ކަމަށް ޕީއެންސީގެ ނައިބު ރައީސް އަދި ރައްޔިތުންގެ މަޖިލިހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމްގެ ރިޔާސީ ކެންޑިޑޭޓު ކުރީގެ ރައީސް އަބްދުﷲ ޔާމީނަށް ވާދަ ނުކުރެއްވޭ ހާލަތެއްގައި އިދިކޮޅު ކެންޑިޑޭޓަކަށް މުއިއްޒު ހަމަޖެއްސުމަށް ޕީއެންސީ ސެނެޓުން މިއަދު ވަނީ ފާސްކޮށްފައެވެ.
މިވޯޓު ޑރ. މުއިއްޒު ކާމިޔާބު ކުރެއްވީ، މަޑުއްވަރި ދާއިރާގެ މެމްބަރު އާދަމް ޝަރީފާއި ވާދަކުރައްވާ ވަރަށް ކުޑަ ތަފާތަކުންނެވެ. މިގޮތުން ޕިއެންސީގެ މަޝްވަރާ މަޖިލިހުގެ 48 މެމްބަރުން މި އިންތިޚާބުގައި ވޯޓު ލާފައިވާއިރު، މުއިއްޒުއަށް ވޯޓު ދީފައިވަނި 25 މެމްބަރުންނެވެ. އަދަމް ޝަރީފަށް ވޯޓު ދީފައިވަނީ 23 މެމްބަރުންނެވެ.
އިންތިހާބަށް ފަހު، ނޫސްވެރިންނާ ވާހަކަ ދައްކަވަމުން އާދަމް ޝަރީފް ވިދާޅުވީ އިންތިހާބުގައި ވަރަށް ބޮޑު ކާމިޔާބީއެއް ހޯއްދެވި ކަމަށްޓަކައި މުއިއްޒަށް މަރުހަބާ ދަންނަވާ ކަމަށެވެ.
"ކުރިއަށް އޮތް ރިޔާސީ އިންތިހާބުގައި ޑރ. މުއިއްޒު ވާދަކުރައްވާ ގޮތް ވެއްޖެނަމަ އެ ހާލަތުގައި އަޅުގަނޑުގެ މެކްސިމަމް ސަޕޯޓް ދޭނެ ކަމުގެ ފުރިހަމަ ޔަގީންކަން އަރުވަން،" އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ ޕީއެންސީގެ ކެންޑިޑޭޓަކަށް ވުމުގެ ޝައުގުވެރިކަން އުފެދުނީ ރޭގައި ކަމަށެވެ. އަދި މި ކުޑަވަގުތުކޮޅުގެ ތެރޭގައި މަސައްކަތްކޮށް ކޮށްދެއްވި ހީވާގި ބޭފުޅުންނާއި ވޯޓު ދެއްވި ހުރިހާ ބޭފުޅުންނަށް ޝުކުރު ދަންނަވާ ކަމަށް ވެސް އާދަމް ޝަރީފް ވިދާޅުވިއެވެ.
މިއަދު ބޭއްވުނު ޕީއެންސީގެ މަޝްވަރާ މަޖިލިހުގެ ސިއްރު ވޯޓު މުއިއްޒު ކާމިޔާބު ކުރައްވާފައިވާއިރު، ޓިކެޓް ކަށަވަރު ކުރުމަށް މުއިއްޒު ކުރި ކެމްޕޭންގައި ރައީސް ޔާމިންގެ އަރިސް ގިނަ ބޭފުޅުން ހަރަކާތްތެރިވި މަންޒަރު ފެނިގެންދިޔައީ މުއިއްޒުގެ ކެމްޕޭންގައެވެ.
ޑރ. މުއިއްޒު މިއަދު ބޭއްވުނު ސިއްރު ވޯޓު ކާމިޔާބު ކުރިނަމަވެސް އޭނާ ޕީއެންސީގެ ރިޔާސީ ޓިކެޓްގައި ވާދަކުރައްވާނީ ސުޕްރިމް ކޯޓުގައި މިހާރު ކުރިޔަށްދާ، ރައީސް ޔާމިންގެ ކެނޑިޑަސީގެ މައްސަލަ އެމަނިކުފާނަށް ކާމިޔާބު ނުކުރެވިއްޖެ ނަމައެވެ.
މިގޮތުން، މިހާރު ސުޕްރިމް ކޯޓަށް ހުށަހަޅާފައިވާ، އިދިކޮޅު ޕީޕީއެމްގެ ފަރާތުން ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ނިންމާފައިވާ، ކުރީގެ ރައީސް ޔާމިންގެ ކެނޑިޑަސީގެ މައްސަލައިގެ ފުރަތަމަ އަޑުއެހުން މާދާ 14:30 އަށް ސުޕްރިމް ކޯޓުން ވަނީ ތާވަލު ކޮށްފައެވެ.
