މިހާރު ސުޕްރިމް ކޯޓަށް ހުށަހަޅާފައިވާ، އިދިކޮޅު ޕީޕީއެމްގެ ފަރާތުން ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ނިންމާފައިވާ، ކުރީގެ ރައީސް ޔާމިންގެ ކެނޑިޑަސީގެ މައްސަލައިގެ ފުރަތަމަ އަޑުއެހުން މާދާ 14:30 އަށް ސުޕްރިމް ކޯޓުން ތާވަލް ކޮށްފިއެވެ.
ރައީސް ޔާމިންގެ ގާނޫނީ ޓީމުގެ ފަރާތުން ދާދި ދެންމެއަކު ހާމަކޮށްފައިވާ ގޮތުގައި، ރިޔާސީ އިންތިހާބުގައި ބައިވެރިވުމަށް ޢަބްދުﷲ ޔާމީން ޢަބްދުލްޤައްޔޫމް ހުށަހެޅި ކެންޑިޑެސީ އިލެކްޝަންކޮމިޝަނުން ބަލައިނުގަތުމާއި ގުޅިގެން ސުޕްރީމްކޯޓަށް ހުށަހެޅި (ޢަބްދުﷲ ޔާމީން ޢަބްދުލްޤައްޔޫމް ވ. އިލެކްޝަންސް ކޮމިޝަން) ޤަޟިއްޔާއާ ގުޅިގެން 04 އޮގަސްޓް 2023 ވާ ހުކުރު ދުވަހުގެ 14:30 ގައި ސުޕްރީމް ކޯޓުގައި އަޑުއެހުން ބޭއްވުމަށް ތާވަލް ކޮށްފައިވާކަމުގައެވެ.
ޔާމިންގެ ގާނޫނީ ޓީމުގައި ހިމެނިވަޑައިގަންނަވާ ވަކީލު ސިޔާޒު ކުރެއްވި ޓުވީޓެއްގައި ވިދާޅުވެފައިވަނީ، ކެނޑިޑޭޓުންގެ ޝަރުތާމެދު އިލެކްޝަންސް ކޮމިޝަނުން މީގެ ކުރިން ޢަމަލުކުރަމުންގެންދިޔަ އުސޫލުކަމަށް އަމިއްލައަށް އިޢުތިރާފްވެފައިވާ، އަދި އޭގެ މައްޗަށް ދުސްތުރީ ނިންމުންތައް ނިންމާފައިވާ އުސޫލެއް ބަދަލުވާނީ ވަރުގަދަ ނުފޫޒެއްގައި ޖެހިގެން ކަމުގައެވެ.
ކެނޑިޑޭޓުންގެ ޝަރުތާމެދު އިލެކްޝަންސް ކޮމިޝަނުން މީގެ ކުރިން ޢަމަލުކުރަމުންގެންދިޔަ އުސޫލުކަމަށް އަމިއްލައަށް އިޢުތިރާފްވެފައިވާ، އަދި އޭގެ މައްޗަށް ދުސްތުރީ ނިންމުންތައް ނިންމާފައިވާ އުސޫލެއް ބަދަލުވާނީ ވަރުގަދަ ނުފޫޒެއްގައި ޖެހިގެންނެވެ. pic.twitter.com/X00HQ8Sbrr
— Abdulla Siyaz (@AbdullaSiyaz) August 1, 2023
ރައީސް ޔާމިންގެ ކެނޑިޑަސީ އިލެކްޝަންސް ކޮމިޝަނުން ބަލައި ނުގަތުމާއެކު، ޔާމިންގެ ވަކީލުންވަނީ އިއްޔެ އެމަނިކުފާނުގެ ކެނޑިޑަސީގެ މައްސަލަ ސުޕްރިމް ކޯޓަށ ވައްދާފައެވެ. އަދި ޔާމީންގެ ކެނޑިޑެސީ އިލެކްޝަން ކޮމިޝަނުން ބަލައި ނުގަތް މައްސަލާގައި އީސީން ޖަވާބު ދާރީވުމަށް ސްޕްރީމް ކޯޓުން ވަނީ މިއަދު 3:00 އާއިހަމައަށް ވަގުތު ދީފައެވެ.
އަންނަމަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީންގެ ކެނޑިޑެސީ އިލެކްޝަންސް ކޮމިޝަނަށް ހުށައެޅުއްވީ އިއްޔެއެވެ. އިލެކްޝަންސް ކޮމިޝަނުން ރައީސް ޔާމީންގެ ކެނޑިޑެސީ ބަލައިނުގަތުމަށް ނިންމަވާފައިވާ ނިންމެވުމުގައި ވަނީ ރައީސުލްޖުމްހޫރިއްޔާކަމަށް ވާދަކުރުމަށް ގާނޫނޫ އަސާސީގައި ބުނާ ޝަރަތު ރައީސް ޔާމީންގެ ކިބައިގައި މިވަގުތު ފުރިހަމަ ނުވާކަމަށެވެ.
އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.
ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށްވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.
އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައެވެ.
ރިޔާސީ އިންތިޚާބުގައި ވާދަކުރުމުގެ މުއްދަތު މިމަހުގެ 7 ވަނަ ދުވަހު ހަމަވާނެއެވެ. މިހާތަނަށް އިލެކްޝަނަށް ފޯމު ހުށަހަޅުއްވާފައިވަނީ ރައީސް ޔާމީން އެކަންޏެވެ. އަދި އެހެން ކެނޑިޑޭޓަކު ފޯމު އިލެކްޝަނަށް ހުށަހަޅުއްވާފައި ނުވެއެވެ.
