ސްރީ ލަންކާގައި ނިމިގެން އެ ގައުމުގެ، 101 ވަނަ ގައުމީ އެތުލެޓިކްސް ޗެމްޕިއަންޝިޕްގައި ވާދަކުރި ރާއްޖޭގެ އަންހެން ރިލޭ ޓީމުން ގައުމީ ރެކޯޑެއް މުގުރާލައިފިއެވެ.
ރެކޯޑް މުގުރާލި 400 މީޓަރުގެ ރިލޭ އިވެންޓްގައި ވާދަކުރި ގައުމީ އަންހެން ޓީމުގައި ހިމެނެނީ ޒިވާ މޫސާ ޝަފީއު، ހައްވާ މުޒުނާ ފާއިޒު، އައިޝަތު ނާދު އަސަދު ވަޖުދީ އަދި އައިމިނަތު ލަޔާނާ މުހައްމަދު އެވެ. މި ޓީމުން ރެކޯޑް މުގުރާލީ 4 މިނިޓް 06.62 ސިކުންތުން ރޭސް ނިންމައިގެންނެވެ.
މީގެ ކުރިން، މި ރެކޯޑް އޮތީ 2016 ވަނަ އަހަރު އިންޑިއާގެ ގުވަހާޓީގައި ބޭއްވި ސައުތު އޭޝިއަން ގޭމްސްގެ 400 ރިލޭ އިވެންޓްގައި ވާދަކުރި ޓީމު އަތުގައެވެ. އެ ފަހަރު ޓީމުގައި ހިމެނުނު، އަފާ އިސްމާއިލް، ޝަމްހާ އަހުމަދު، އައިމިނަތު ނަޒްރާ އަދި މިރުފަތު އަހުމަދު، ރޭސް ނިންމި ޓައިމިން އަކީ 4 މިނިޓް 18.11 ސިކުންތުންނެވެ.
ޒިވާ އާއި ނާދު އަދި ލަޔާނާ ވަނީ 200 މީޓަރު އިވެންޓުގައި ވެސް ވާދަ ކޮށްފައެވެ. ތިން ދުވުންތެރިން ވެސް ވަކިވަކި ހީޓްގައި ވާދަކުރި އިރު، ޒިވާ ހީޓް ނިންމީ އެއް މިނިޓް 0.33 ސިކުންތުންނެވެ. ނާދު ދުވި ހީޓް ފުރިހަމަ ކުރީ އެއް މިނިޓް 2.47 ސިކުންތުންނެވެ. އަދި ލަޔާނާ ފުރިހަމަ ކުރީ އެއް މިނިޓް 0.04 ސިކުންތުންނެވެ.
އަންހެން ހަތަރު ދުވުންތެރިންގެ އިތުރުން ފިރިހެން ހަތަރު ދުވުންތެރިން ވެސް ވަނީ ލަންކާ މުބާރާޓުގައި ދުވެފައެވެ. އެއީ ހުސައިން ޒީކް ސުއާދު، އާދަމް ރިއްފަތު، ޒުއިޒް މުހައްމަދު ސުއާދު އަދި އަބްދުއްރަޝީދު އިސްމާއިލް (ރައްޓު) އެވެ. ރާއްޖޭގެ އަށް ދުވުންތެރިންގެ އިތުރުން އިންޑިއާގެ 13 ދުވުންތެރިން ވެސް މި މުބާރާތުގައި ވާދަކުރިއެވެ.
