ރައީސް ރާއްޖޭގެ ރަށްތަކަށް ކުރައްވަމުން ގެންދަވާ ކެމްޕޭން ދަތުރުފުޅުތަކުގައި، މިއަދު އެއަތޮޅު މިލަންދޫއަށް ވަޑައިގެންނެވުމުން އެރަށުގެ ރައްޔިތުންވެސް އެމަނިކުފާނުގެ އަރިހުން އެދުނީ އެރަށުގައި އެއަރޕޯޓެއް އެޅުމަށްކަމަށް ރައީސް ސާލިހު ވިދާޅުވެއްޖެއެވެ.
މިރޭ ށ. މިލަންދޫގައި ބޭއްވުނު، ރައީސް ސާލިހުގެ "އުފާވެރި އަމާންދިވެހިރާއްޖެ" ކެމްޕޭން ޖަލްސާގައި ވާހަކަ ރައީސް ސާލިހު ވިދާޅުވީ އެމަނިކުފާނު އެރަށަށް ފައިބައިވަޑައިގެންނެވުމަށްފަހު ސައިފޮދު ހިތްޕެވުމަށް ވަޑައިގެންނެވުމުން އެރަށުގެ ރައްޔިތުން އެމަނިކުފާނުގެ އަރިހުން އެދުނީ އެރަށުގައި އެއަރޕޯޓެއް އެޅުމަށް ކަމުގައެވެ.
މިލަންދޫ ރައްޔިތުންގެ ގިނަބަޔަކުވެސް އަދި ކަންއުންސިލްގެ ގިނަ މެމްބަރުންވެސް މިއަދު އަޅުގަޑަށް ހުށަހެޅި އެންމެ މުހިންމު އެއްކަމަކީ، ތިމަންނަމެންވެސް ބޭނުމޭ އެއަރޕޯޓެއް. އަޅުގަޑު ދުށިން އެފޮޓޯ.. މިއަދު ސައިބޯން މޭޒުގަ އިންއިރުގަ ކުރިމަތީގައި އިން. މިނިސްޓަރ އަސްލަމް އެވަގުތަކު އެތާކު ވަޑައިގެން ނެތް. އަޅުގަޑު ދެންނެވި މީގަ ޓެކްނިކަލް ސާވޭއެއް އަޅުގަޑުމެން ހަދަން ޖެހޭނެއޭ. އެއީ އެޅޭނެތަނެއްތޯ؟ އަޅަންޏާ ކޮންކަމެއްތޯ ކުރަން ޖެހޭނީ. އަަޅުގަޑު އެކަން އަސްލަމާ ހަވާލުކުރާނަން. އެއަށްފަހުގަ އެއީ ކުރެވޭނެވަރުގެ ކަމެއްތޯ ބެލުމަށްފަހުގަ އެއާބެހޭގޮތުން އަަޅުގަޑުމެން ޑިޝިޝަނެއް ނަގާނަން. އަދި ތިބޭފުޅުންނާ އެކަމުގަ ބައްދަލުވެސް ކުރާނަން، މަޝްވަރާވެސް ކުރާނަން. ކޮށްފަ އޭގަ އަޅުގަޑު ގޮތެއް ނިންމާނަން.
ރައީސް ސާލިހު ވިދާޅުވިއެވެ.
މިލަންދޫގައި އެއަރޕޯޓެއް އެޅުމަށް އެރަށުގެ ރައްޔިތުން އެދުނުއިރު އެރައް ކައިރީގައި އޮންނަ ފުނަދޫ އެއަރޕޯޓަށް އެރަށުން 15 މިނިޓު ނުވަތަ 20 މިނިޓުން ދެވެއެވެ.
މިރޭގެ ޖަލްސާގައި ރައީސް ސާލިހު ވިދާޅުވީ ކުރިޔަށް އޮތް ދައުރުގައި މިލަންދޫގެ ހުރިހާ މަގުތަކެއް ޒަމާނީ ފެންވަރަށް ހައްދަވާ ދެއްވާނެކަމަށާއި، ކުނި މެނޭޖު ކުރުމަށްވެސް ޒަމާނީ ވަސީލަތްތައް އަންނަ ދައުރުގައި މިލަންދޫގައި ގާއިމް ކޮށްދެއްވާނެ ކަމުގައެވެ. ހަމައެއާއެކު، މިލަންދޫ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދިނުމުގެ ގޮތުން އެރަށުގައި ހައުސިން ޔުނިޓްތައްވެސް އަޅުއްވާދެއްވާނެކަމަށް ވިދާޅުވަމުން ރައީސް ސާލިހު ވިދާޅުވީ، މިލަންދޫ ރައްޔިތުން އެދޭގޮތަށް މިލަންދޫގެ ބިން އިތުރުކޮށް، ޗަކަ ބިން ހިއްކާ އަދި ބޭނުންވާ ސަރަހައްދުގައި ރިވެޓްމަންޓްވެސް ޖަހާ ދޭނެކަމުގައެވެ.
ކޮމެންޓު ފޮނުވާ