ރައީސް އިބުރާހިމް މުހައްމަދު ސާލިހުގެ ވެރިކަމުގައި މުޅި ރާއްޖެއިންވެސް ފެންނަމުންދަނީ ތަރައްގީ ކަމަށާއި، ކުރީގެ ވެރިކަމުގައި އޮތް ބިރުވެރިކަމާއި ނާމާންކަން މިހާރު ނައްތާލެވިފައިވާ ކަމުގައި ނާއިބު ރައީސް ފައިސަލް ނަސީމް ވިދާޅުވެއްޖެއެވެ.

ރައީސް ސާލިހު ފުވައްމުލަކަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި، ފުވައްމުލަކުގައި މިރޭ ބޭއްވި ކެމްޕޭން ޖަލްސާގައި ވާހަކަ ދައްކަވަމުން ފައިސަލް ނަސީމު ވިދާޅުވީ 2018 ވަނަ އަހަރާއި ހަމައަށް ކުރީ ސަރުކާރުގައި ރާއްޖޭގެ ހުރިހާ ރައްޔިތުންވެސް ތަހައްމަލް ކުރަމުން ގޮސްފައިވަނީ ބިރުވެރިކަން ކަމުގައެވެ.

އަދި އެކަންކަން މިއަދު ހަދާނަށް ގެންނަންޖެހޭ ކަމަށް ވިދާޅުވަމުން ނާއިބު ރައީސް ފައިސަލް ނަސީމު ވިދާޅުވީ، ފުވައްމުލަކު ރައްޔިތުން މަސައްކަތްކުރީ ހެޔޮ ބަދަލަކަށް ކަމުގައެވެ. އެއީ އަމާންކަމާއި ތަރައްގީ ރާއްޖެއަށް ގެނައުމަށް ފުވައްމުލަކުގެ ރައްޔިތުން ނިންމުމެއްކަމަށް ފާހަގަ ކުރައްވަމުން ފައިސަލްވަނީ ފުވައްމުލަކު ރައްޔިތުންގެ 2018ގައި ނިންމި ނިންމުމަށް މިރޭގެ ޖަލްސާގައި ޝުކުރު އަދާ ކުރައްވާފައެވެ.

އެ ދުވަހުގެ ނިންމުން ވަރަށް ރަނގަޅު، ޝުކުރިއްޔާ ސާބަސް ފުވައްމުލަކު ރައްޔިތުން.

ފުވައްމުލަކު ރައްޔިތުން ވޯޓު ދިނީ ބަދަލަކަށް ކަމަށް ވިދާޅުވަމުން ފައިސަލް ވިދާޅުވިއެވެ.

ފައިސަލް އިތުރަށް ވިދާޅުވީ ރައްޔިތުން ވެރިޔަކު އިންތިޚާބު ކުރަނީ އަމާންކަން ގާއިމްކޮށް ރައްޔިތުން ބޭނުންވާ ކަންކަން ހާސިލް ކުރުމަށް ކަމުގައެވެ. އެހެންނަމަވެސް ކުރީގެ ސަރުކާރު ނިމިގެންދިޔައިރު، ރާއްޖޭގެ އެކި ކަންކޮޅުތަކުގައި އަސާސީ ކަންކަންވެސް ހަމަޖެހިފައި ނެތްކަން ފައިސަލް ފާހަގަ ކުރެއްވިއެވެ.

ސަރުކާރަށް ވެރިއަކު އިންތިހާބު ކުރަނީ އަމާންކަން ގާއިމްކޮށް، ރައްޔިތުން ބޭނުންވާ ކަންތައްތައް ހާސިލް ކުރަން. ހިތާމައަކީ އަސާސީ ކަންތައްތައްވެސް ހަމަޖެހިފައި ނެތުމުން. މިރަށުގެ ކޮންމެ ހިސާބަކަށް ބެލި ނަމަވެސް ފެންނަނީ ތަރައްގީގެ ކަންތައް. މަޝްރޫއުތައް، އެއް މަޝްރޫއުގެ ފަހަތަށް އަނެއް މަޝްރޫއު، ހުއްޓުމެއް ނެތް ކުރިއަށް އެ ދަނީ.

ފުވައްމުލަކުގައި ކުރިޔަށްދާ، މަގުހެދުމާއި ގިރާ ސަރަހައްދު ހިމާޔަތްކުރުންފަދަ ތަރައްގީގެ ބޮޑެތި މަޝްރޫޢުތަކަށް އިޝާރާތް ކުރައްވަމުން ފައިސަލް ވިދާޅުވިއެވެ.

ފައިސަލްގެ ވާހަކަފުޅުގައި އިތުރަށް ވިދާޅުވީ ކުރީ ސަރުކާރުން ފުވައްމުލަކަށް ހަމައެކަނި ކޮށްދިންހާވެސް ކަމަކީ އެރަށުގެ ނަރުދަމާގެ ނިޒާމު ގާއިމްކޮށްދިނުން ކަމަށާއި، އެކަމުން ރައްޔިތުންނަށް ފަސޭހަތަކެއް ލިބިގެންދިޔަ ނަމަވެސް، އެއިން ހަގީގަތުގައި ރައްޔިތުންނަށް ލިބިގެންދިޔައި އުދަގޫ ކަމުގައެވެ.

ރައީސް ސާލިހުގެ ސަރުކާރުން ދަނީ ފުވައްމުލަކުގައި ތަރައްގީގެ ގިނަ މަޝްރޫޢުތަކެއް ކުރިޔަށް ގެންދަމުންނެވެ. އޭގެ ތެރޭގައި ފުވައްމުލަކު ވަށައިގެން ރިންގްރޯޑް މަގު ހެދުމާއި ފުވައްމުލަކު ސްކޫލް މަލްޓި ޕާޕަސް ހޯލާއި ހޮސްޕިޓަލް އަޕްގްރޭޑް ކުރުމާއި، ފުޓްބޯޅަ އާއި ފުޓްސަލް އަދި އެހެނިހެން ބައެއް ކުޅިވަރުތައް ކުޅޭ ދަނޑުތައް ތަރައްގީ ކުރުން ހިމެނެއެވެ.

އޭގެ އިތުރުންވެސް ރަށުގެ އެތެރޭގެ މަގުތައް ހެދުމާއި، ގޮނޑުދޮށް ހިމާޔަތް ކުރުމާއި، ހޮސްޕިޓަލް ތަރައްގީކުރުމުގެ މަސައްކަތްވެސް ދަނީ ކުރިޔަށެވެ.

13،499 މީހުންގެ ބޮޑު އަބާދީއެއް އޮންނަ ފުވައްމުލަކަކީ، ކޮންމެ ވެރިކަމެއްގައިވެސް ތަރައްގީގެ މަޝްރޫޢޫތައް ކުރިޔަށް ގެންދިއުމަށް ވަރަށްބޮޑަށް އިސްކަންދޭ ރަށެކެވެ.