ރައީސުލްޖުމުހޫރިއްޔާ އިބުރާހިމް މުހައްމަދު ސާލިހު މިއަދު ޏ. ފުވައްމުލަކަށް ވަޑައިގަންނަވާއިރު، އެ ދަތުރުފުޅުގައި އެމަނިކުފާނުގެ ރަނިންގެ މޭޓު އިއުލާނު ކުރައްވާނޭކަމަށް އަޑުތައް ފެތުރިއްޖެއެވެ.
މިގޮތުން ބައެއް ފަރާތްތަކުން މައުލޫމާތު ދޭގޮތުގައި، މި ދަތުރުފުޅުގައި ރައީސް ސާލިހު، މިހާރުގެވެސް ނާއިބު ރައީސް ފައިސަލް ނަސީމު އެކަނިކުފާނުގެ ކުރިޔަށް އޮތް ރިޔާސީ އިންތިޚާބުގެ ރަނިން މޭޓުގެ ގޮތުގައި އިއުލާން ކުރައްވާނެއެވެ.
މިއަދު ރައީސް ސާލިހު ފުވައްމުލަކަށް ކުރައްވާ ކެމްޕޭން ދަތުރުފުޅުގައި، ރަނިން މޭޓެއްގެ ގޮތުގައި ފައިސަލް ނަސީމުގެ ނަން އިއުލާން ކުރައްވާނެކަމަށް ބެލެވިފައިވާއިރި، ދާދިފަހުން ރައީސް ސާލިހުވަނީ ފައިސަލްއަށް ވަރަށް ބޮޑަށް ތައުރީފު ކުރައްވާ ވާހަކަ ދައްކަވާފައެވެ. މިގޮތުން ފައިސަލް ނަސީމަށް 50 އަހަރު ފުރުމުގެ މުނާސަބަތުގައި ޝާޢިއު ކޮށްފައިވާ އެމަނިކުފާނުގެ ބައޮގްރަފީގައި ރައީސް ވިދާޅުވެފައިވަނި ފައިސަލް ނަސީމަކީ ވަރަށް ވަފާތެރި ބޭފުޅެއް ކަމަށާއި، އަދި އެއީ ވަރަށް ގާބިލުވެސް ބޭފުޅެއް ކަމުގައެވެ.
ފައިސަލް ނަސީމު ރަނިން މޭޓޭއްގެ ގޮތުގައި، ފުވައްމުލަކު ދަތުރުފުޅުގައި ރައީސް އިއުލާން ކުރައްވާނެކަމަށް ބެލެވިފައިވާއިރު، އެމަގާމަށް އިތުރު ދެބޭފުޅަކު ވާދަކުރައްވާފައިވާކަމަށްވެސް ވަނީ އަޑުތައް ފެތުރުފައެވެ. އެއީ ރައީސް ސާލިހުގެ ކެބިނެޓްގެ މިހާރުގެ ފޮރިން މިނިސްޓަރ ޝާހިދާއި އައްޑޫ ހިތަދޫ އުތުރު ދާއިރާގެ މެމްބަރު، އަދި އެމްޑީޕީގެ ޕީޖީ ލީޑަރު މުހައްމަދު އަސްލަމްއެވެ.
އެހެންނަމަވެސް އެމްޑީޕީގެ ލީޑަރޝިޕްގެ ނުފޫޒުގަދަ ބައެއް ބޭފުޅުން ތާއީދު ކުރައްވާފައިވަނީ ރައީސް ސާލިހުގެ ރަނިން މޭޓެއްގެ ގޮތުގައި، މިހާރުގެ ނާއިބު ރައީސް ފައިސަލް ނަސީމު ހުންނެވުމަށް ކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުގެ ފުވައްމުލަކު ދަތުރު ފުޅުގައި ރަނިން މޭޓެއްގެ ގޮތުގައި ފައިސަލް ނަސީމުގެ ނަން އިއުލާން ކުރައްވާނެކަމަށް ބެލެވުނު ނަމަވެސް ފައިސަލް އަދިވެސް އެމްޑީޕީއަށް ސޮއި ކުރައްވާފައެއް ނުވެއެވެ. ފައިސަލް އަދިވެސް ހުންނެވީ ޖުމުހޫރީ ޕާޓީގެ މެމްބަރެއްގެ ގޮތުގައެވެ. އެހެންނަމަވެސް އޭނާ ޖޭޕީގެ އެއްވެސް ހަރަކާތެއްގައި ބައިވެރި ނުވާތާ ވަނީ ގިނަ ދުވަސްތަކެއް ވެފައެވެ.
ފައިސަލް ނަސީމަކީ އާ ގާނޫނު އަސާސީއަށް ދައުރު ފުރިހަމަ ކުރައްވާ ފުރަތަމަ ނާއިބު ރައީސްއެވެ. ރައީސް ޔާމިންގެ ދައުރުގައިވެސް އެންމެ ފުރަތަމަ ނާއިބު ރައީސަކަށް ވަޑައިގެންނެވީވެސް ފުވައްމުލަކު ބޭފުޅެކެވެ. އެހެންނަމަވެސް ރައީސް ޔާމިނަށް ބޭވަފާތެރި ވީކަމުގެ ތުހުމަތުގައި އޭރުގެ ނާއިބު ރައީސް ޑރ. ޖަމީލްވަނީ ދައުރު ހަމަނުވަނީސް މަގާމުން ދުރު ކޮށްފައެވެ.
ރައީސް ސާލިހުގެ ސަރުކާރުންވަނީ ފުވައްމުލަކުގައި ތަރައްގީގެ ގިނަ މަޝްރޫޢުތަކެއް ކުރިޔަށް ގެންގޮސްފައެވެ. އޭގެ ތެރޭގައި ފުވައްމުލަކު ވަށައިގެން ރިންގްރޯޑް މަގު ހެދުމާއި ފުވައްމުލަކު ސްކޫލް މަލްޓި ޕާޕަސް ހޯލާއި ހޮސްޕިޓަލް އަޕްގްރޭޑް ކުރުމާއި، ފުޓްބޯޅަ އާއި ފުޓްސަލް އަދި އެހެނިހެން ބައެއް ކުޅިވަރުތައް ކުޅޭ ދަނޑުތައް ތަރައްގީ ކުރުން ހިމެނެއެވެ.
އޭގެ އިތުރުންވެސް ރަށުގެ އެތެރޭގެ މަގުތައް ހެދުމާއި، ގޮނޑުދޮށް ހިމާޔަތް ކުރުމާއި، ހޮސްޕިޓަލް ތަރައްގީކުރުމުގެ މަސައްކަތްވެސް ދަނީ ކުރިޔަށެވެ.
13،499 މީހުންގެ ބޮޑު އަބާދީއެއް އޮންނަ ފުވައްމުލަކަކީ، ކޮންމެ ވެރިކަމެއްގައިވެސް ތަރައްގީގެ މަޝްރޫޢޫތައް ކުރިޔަށް ގެންދިއުމަށް ވަރަށްބޮޑަށް އިސްކަންދޭ ރަށެކެވެ.
