ރައީސް ޔާމިންގެ އަނބިކަބަލުން މެޑަމް ފާތުން ކޮންމެ ދުވަހަކުވެސް ރައީސް ޔާމިންއާއި ބައްދަލު ކުރެއްވަމުން ގެންދަވާކަމަށް "ޚަބަރު އޮންލައިން"އަށް މައުލޫމާތު ލިބިއްޖެއެވެ.

"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ރައީސް ޔާމިންގެ ގާނޫނީޓީމަށްވެސް ރައީސް ޔާމިންއާއި ބައްދަލު ކުރުމުގެ ފުރުސަތު ފަހިވެފައި ވިނަމަވެސް، ދުވަހުން ދުވަހަށް ރައީސް ޔާމިންއާއި ކުރައްވަން ޖެހިވަޑައިގެންފައިވާ މުއާމަލާތުތައް ދުވަހުން ދުވަހަށް މިހާރު ކުރައްވަމުން ގެންދަވަނީ ސީދާ މެޑަމް ފާތުން ރައީސް ޔާމިންގެ އަރިހަށް ވަޑައިގެންނެވެ.

އެހެންކަމުން ބެލެވޭ ގޮތުގައި، ކުރިޔަށް އޮތް ރިޔާސީ އިންތިޚާބުގައި ވާދަކުރުމާއި ގުޅޭގޮތުންވެސް، އަދި އެހެން ސިޔާސީ ލީޑަރުންނާއެކު މަޝްވަރާއެއް ކުރިޔަށް ދިޔަނަމަވެސް، އެފަދަ މުއާމަލާތެއްވެސް މިހާރު ކުރިޔަށް ދާނެކަމަށް ބެލެވެނީ ސީދާ މެޑަމް ފާތުން މެދުވެރި ކޮށެވެ.

މެޑަމް ފާތުން ކޮންމެ ދުވަހަކުވެސް ރައީސް ޔާމިންއާއި ބައްދަލު ކުރައްވަން ޖަލަށް ވަޑައިގަންނަވާކަމަށް މައުލޫމާތު ލިބިފައިވާއިރު، ރައީސް ޔާމިން މިހާރުވަނީ، ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ބޭނުންވާ ފޯމުގައި ސޮއި ކުރައްވާފައެވެ. އެހެންނަމަވެސް އަދިވެސް ޕީޕީއެމްއިން ފޯމު އިކެލްޝަންސް ކޮމިޝަނަށް ހުށަހަޅާފައެއް ނުވެއެވެ.

ހަމައެއާއެކު ޕީޕީއެމްގެ ލީޑަރޝިޕުން މިހާރުވަނީ ރައީސް ޔާމިންގެ ރަނިން މޭޓަކާއި ގުޅޭގޮތުން މަޝްވަރާ ކޮށްފައެވެ. އަދި ލީޑަރޝިޕުން ނިންމާފައިވަނީ ރަނިން މޭޓަކު ކަނޑައެޅުމުގެ ބާރު ސީދާ ރައީސް ޔާމިނަށް ދޫކޮށްލުމަށެވެ. ރައީސް ޔާމިންގެ ރަނިން މޭޓަކަށް އައްޔަން ކުރާނެކަމަށް ބައެއް ފަރާތްތަކުން މައުލޫމާތު ދީފައިވަނީ ކުރީގެ ޓުއަރިޒަމް މިނިސްޓަރު މޫސާ ޒަމީރެވެ. އެހެނެންމަވެސް ރައްޔިތުންގެ މަޖިލިހުގެ ޕީޕީއެމްގެ މެމްބަރު އައްސާން މައުމޫން ރަނިން މޭޓަކަށް ހަމަޖެއްސުމަށްވެސް ލީޑަރޝިޕްގެ ބައެއް ފަރާތްތަކުން ޑިމާންޑު ކުރަމުންދާކަމަށްވެސް މައުލޫމާތު ލިބިފައި ވެއެވެ.

ކުރިޔަށް އޮތް ރިޔާސީ އިންތިޚާބަށް ކުރިމަތި ލުމުގެ ފުުރުސަތު އިލެކްޝަންސް ކޮމިޝަނުން ހުޅުވާލާފައިވަނީ އަންނަ އޮގަސްޓުމަހުގެ 7 ވަނަ ދުވަހާ ހަމައަށެވެ. އެހެންނަމަވެސް، ގާނޫނު ބުނާގޮތުން، ޚިޔާނާތާއި މަނީ ލޯންޑަރިންގެ ދައުވާ ސާބިތުވެ، މިހާރު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް ޔާމިންގެ އިންތިޚާބީ ޝަރުތުރު ފުރިހަމައެއް ނުވެއެވެ. އެހެންނަމަވެސް އިދިކޮޅު ޕީޕީއެމްއިން އެކަން ގަބޫލެއް ނުކުރެއެވެ.

އިންތިޚާބާބެހޭ ގާނޫނު ބުނާގޮތުން، ރިޔާސީ އިންތިޚާބަށް ކުރިމަތިލާ ކެނޑިޑޭޓެއްގެ އިންތިޚާބީ ޝަރުތުތަކާއި ގުޅޭގޮތުން ޚިލާފް އުފެދިއްޖެނަމަ އެ މައްސަލައާއި ގުޅޭގޮތުން ގޮތް ނިންމަންޖެހޭނީ ސުޕްރިމް ކޯޓުންނެވެ. ނަމަވެސް، ރައީސް ޔާމިންގެ ކެނޑިޑަސީއާއި ގުޅޭގޮތުން ސުޕްރިމް ކޯޓަށް މިހާތަނަށް ހުށަހެޅި މައްސަލަތައް އެކޯޓުން ބަލައިގެންފައެއް ނުވެއެވެ.

ބެލެވޭ ގޮތުގައި ރައީސް ޔާމިންގެ ފޯމު އިލެކްޝަންސްއިން ބަލައި ނުގެންފި ދެން އެމައްސަލައާއި ގުޅޭގޮތުން ގޮތެއް ނިންމާނީ ސުޕްރިމް ކޯޓުންނެވެ.