ގދ.ތިނަދޫގެ ސަހަރާއަށް ބަޔަކުވަދެ ސިހުރުހެދިކަމަށްބުނެ "ގާފު" ނޫހުން 13 ޖުލައި 2023 ގައި ގެނެސްދިން އެއްވެސް ޒިންމާދާރުކަމެއްނެތް ދޮގުޚަބަރާއި، އެކަމާއިބެހޭގޮތުން "ގާފު" ނޫހުން 17 ޖުލައި 2023 ގައި ގެނެސްދިން "ދޮގުން ފުރިފައިވާ" ރިޕޯރޓާއި އަދި ސިހުރިވެރިންނޭ ކިޔައިގެން އަބުރު ގެއްލޭގޮތަށް 18 ޖުލައި 2023 ގައި "އަސްލު" ނޫހުގައި ޖަހާފައިވާ ޚަބަރާއިގުޅިގެން އެނޫސްތަކުގެ މައްސަލަ، ތިނަދޫ އުތުރު ދާއިރާގެ ކުރީގެ މެމްބަރު ސައުދުﷲ ހިލްމީ ކަމާބެހޭ މުވައްސަސާތަކަށް ހުށަހަޅުއްވައިފިއެވެ.
މިމައްސަލައާއި ގުޅޭގޮތުން ސައުދުﷲ ހިލްމީ ނެރުއްވި ބަޔާނުގައި ވިދާޅުވެފައިވަނީ، މީގެ ދޮޅުއަހަރެއްހާ ދުވަސްކުރިންވެސް، މިފަހަރު މިޚަބަރު ފެތުރުމުގައިވެސް "އަޑީގައިތިބި މީހުންކަމަށް ޔަޤީންކުރެވޭ މީހުން" މިފަދަޚަބަރެއް ފެތުރުމާއިގުޅިގެން، އަމިއްލަ ނަފްސުގެ ދިފާޢުގައި އެއީ ނުކުރާކަމެއްކަމަށް ޔަޤީންކަން ދިނުމުގެ ގޮތުން އެތައްބައެއްގެ ކައިރީގައި އެފަދަކަމެއް ދުވަހަކުވެސް ނުކުރާކަމަށް މާތްﷲ ގަންދީ ހުވާކޮށްފައިވާނެ ކަމަށެވެ.
އެގޮތުން މިފަހަރުވެސް އެންމެމޮޅަށް ދެނެވޮޑިގެންވާ، އެންމެމޮޅަށް ބައްލަވާވޮޑިގެންވާ، ޢުޤޫބާތް ދެއްވުމުގައި ގަދަފަދަވެގެންވާ މާތްﷲ ގަންދީހުވާކޮށް ބުނަންއޮތީ މީހަކަށް ގެއްލުމެއް އަނިޔާއެއް ދިނުމުގެގޮތުން ސިހުރެއް އަޅުގަނޑު ނުވަތަ އަޅުގަނޑުގެ އާއިލާއިން ނުވަތަ އަޅުގަނޑަށް އެގިގެންވެސް ދުވަހަކުވެސް ނަހަދާކަމަށާއި އެފަދަކަމެއް ކުރިނަމަ އަޅުގަނޑުގެ މައިމީހާގެ ގާތުން ބުއިކިރުވެސް ޙަރާމްކޮށް ޢުމުރުގައިވެސް ކުރިހާ އަޅުކަމަކާއި ހެޔޮކަމެއްވެސް އަޅުގަނޑުގެ އަގުވައްޓާލުމުގެ ގޮތުންނަމަވެސް އެފަދަ ތުހުމަތެއްކުރި މީހުންނަށް ދީފިންކަމަށެވެ.
ދޮގު ޚަބަރު ފެތުރި ނޫސްތަކުގެ މައްސަލަ ކަމާއި ގުޅުންހުރި މުވައްސަސާތަކަށް ހުށަހަޅުއްވާފައިވާކަން ހާމަކޮށް، މަސައްލައިގެ ތަފްސީލު ހާމަކުރުމުގެ ގޮތުން ސައުދުﷲ ނެރުއްވި ބަޔާނުގައި ވިދާޅުވެފައި ވެއެވެ.
ސައުދުﷲގެ ބަޔާނުގައި އިތުރަށް ވިދާޅުވެފައިވަނީ އޭނާ ކުޑައިރުއްސުރެ (1970 އަހަރުތަކުގެ ތެރެއިންފެށިގެން) މަންމަ ބަލިކޮށް އުޅޭތީ އަޅުގަނޑުމެންގެ ފުދުންތެރިކަންހުރި ވަރަކުން ބޭސްކުރަމުންގޮސް ބަލިން ޝިފާދެއްވާތޯ މަންމަގޮވައިގެން ލަންކާ އާއި އިންޑިޔާއަށް އެތައްފަހަރަކުގޮސް އަދި ބެންކޮކުގެ ހޮސްޕިޓަލްގެ ތަފާތުއެކިއެކި ޑޮކްޓަރުންނަށް ދައްކައި، އެއިރަކު ހެދެންހުރި އެންމެފަހުގެ ޓެސްޓްތައް ހެދުމުންވެސް ބައްޔެއް ނުފެނި، އަދި މަންމަގެބައްޔަށް ޝިފާއެއް ނުލިބި މަންމަ އުޅެމުންދިޔައީ އެވޭނުގައި ކަމުގައެވެ. އެގޮތުން ދެތިންފަހަރަކު ފުރާނަދަނީހެންހީވި ފަހަރުތަކެއްވެސް އައިސްފައިވާކަމަށްވެސް ވިދާޅުވެފައި ވެއެވެ.
އޭގެފަހުން ޢާއިލާގެ އެހެންބައެއް ކުދިންނަށްވެސް އެފަދަ އުންދަގޫތަކެއް ވާތީ ޑޮކްޓަރަށް ދައްކައިގެން އެއްވެސް ބައްޔެއް ނުފެނިގެން ރުގިޔާ ކުރާމީހެއް ކައިރިޔަށް ދިޔުމުން އެގުނީ އެއީ ސިހުރަކުން ނުވަތަ ފަންޑިތަވެރިކަމަކުން ދިމާވެގެންއުޅޭ ކަމެއްކަމަށް ވިދާޅުވަމުން ސައުދުﷲ ވިދާޅުވެފައިވަނީ، އެކަމަކީ އޭނާގެ މިހާރު ހުރިތަނަށް ތިނަދޫ އިން މީހުންބޭލުމުގެކުރިން ކޮންމެވެސް ބަޔަކު ހަދާފައިހުރި ކަމެއްގެ ސަބަބުން ދިމާވެގެން އުޅޭ ކަމެއް ކަމުގައެވެ.
މިގޮތުން، މިކަންތަކުން ނަޖާވެ ޝިފާލިބޭތޯ ކުރެވުނު މަސައްކަތުގައި އެހީތެރިކަންފޯރި ކޮށްދިން ފަރާތްތަކުގެ ތެރޭގައި ތިނަދޫދެކުނު ދާއިރާގެ ކުރީގެ މެމްބަރުގެ ބޭބެ އަދި އެއިރު ސައުދުﷲގެ ޢާއިލާގެ ވަރަށްގާތް ފަރާތެއް ކަމުގައިވާ ތިނަދޫ މަސްޖިދު ޢަލީގެ މުދިމު ޝާޠިރު އަޙްމަދު ހިމެނޭކަމުގައި ސައުދުﷲ ވިދާޅުވެފައި ވެއެވެ.
ސައުދުﷲ ވިދާޅުވެފައިވަނީ، އޭނާއާ ބެހޭގޮތުން ފުރާނަޔަށް ނުރައްކާވާފަދަ ދޮގު ޚަބަރުތައް އުފައްދައިގެން ފަތުރައި އަބުރު ގެއްލުވާލުމަށް މަސައްކަތްކުރި ފަރާތްތަކާއިމެދު ދެދުނިޔޭގައިވެސް ދަޢުވާކުރާނެ ކަމުގައެވެ. އަދި ވަކީން ޚާއްޞަކޮށް ޤިޔާމަތްމަޙުޝަރުގައި މަޢާފުކުރުމެއްނެތި ދަޢުވާ ކުރާނަމަށްވެސް ވިދާޅުވެފައި ވެއެވެ.
ސައުދުﷲގެ ބަޔާން ނިންމަވާލައްވަމުން ވިދާޅުވެފައިވަނީ، އޭނާގެ މައްޗަށް ނޫސްތަކުން ކޮށްފައިވާ ސާބިތު ނުހިފޭ ތުހުމަތުތައް ކަމާއިބެހޭ ބައެއް މުއައްސަސާތަކަށް މިހާރު ހުށަހަޅާފައިވާކަމުގައެވެ. އަދި ދެންވެސް މައްސަލަ ހުށަހަޅަންޖެހޭ މުއައްސަސާތަކަށް މައްސަލަ ހުށަހެޅުމުގެ މަސައްކަތް މިހާރު ކުރިޔަށް ގެންދަވާކަމަށްވެސް ވިދާޅުވެފައި ވެއެވެ.
