ރާއްޖޭގެ ސިއްޙީ ދާއިރާއަށް ވެރިކަމުގެ މި ދައުރުގައި ގެންނަން ބޭނުންފުޅުވި ބަދަލު އަންނަމުންދަނީ ބޭނުންވި ސްޕީޑުގައި ނޫންކަމުގައި ރައީސުލްޖުމުހޫރިއްޔާ އިބުރާހިމް މުހައްމަދު ސާލިހު ވިދާޅުވެއްޖެއެވެ.
ހއ. އަތޮޅަށް ފާއިތުވެދިޔަ ދެ ދުވަހު ކުރެއްވި ރަސްމީ ކެމްޕޭން ދަތުރުގެ އެންމެ ފަހު މަންޒިލް ކަމުގައިވާ، ހއ. ދިއްދޫގައި ރޭ ބޭއްވި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، ރާއްޖޭގެ ހުރިހާ ރަށަކުން އެމަނިކުފާނުގެ އަރިހުން ކުރުމަށް އެދުނު ހުރިހާ ކަމެއްވެސް ފުއްދަވާ ދެއްވަމުން ގެންދަވާ ކަމަށާއި، އަދި އޭގެ ތެރެއިން ގިނަ ކަންކަން މިހާރު ނިމިފައިވާއިރު، ބާކީހުރި ކަންކަން މިހާރު ދަނީ ނިމެމުން ކަމުގައެވެ.
އެހެންނަމަވެސް ރައީސް ސާލިހު ވިދާޅުވީ މިވަގުތު ކުޑަކޮށްވެސް ތަންކޮޅެއް ފަހަތުގަ އުޅޭ ދާއިރާއަކީ ސިއްޙީ ދާއިރާ ކަމުގައެވެ. އެ ދާއިރާއިން ފެށި މަސައްކަތް ބޭނުންވި ސްޕީޑުގައި ކުރިޔަށް ނުދާކަމަށް ގަބޫލު ކުރައްވާ ކަމުގައެވެ.
އަޅުގަޑުމެންނަށް ކުޑަކޮށް ތަންކޮޅެއް ފަހަތުގަ މިވަގުތު އުޅޭ އެއް ދާއިރާއަކީ ސިއްޙީ ދާއިރާއަށް އަޅުގަޑުމެން ގެންނަން ފެށި މަސައްކަތް ބޭނުންވި ސްޕީޑުގައި ނުދާކަން. އެކަން އަޅުގަޑު ގަބޫލުކުރަން.
ސިއްޙީ ދާއިރާއިން ވެވަޑައިގެންނެވި ވައުދުތައް ފުއްދުމަށް ކުރެވެމުންދާ މަސައްކަތްތަކުގެ ސްޕީޑު ހުރީ ބޭންފުޅުވި ސްޕީޑުގައި ނޫންކަން ފާހަގަ ކުރައްވަމުން ރައީސް ސާލިހު ވިދާޅުވިއެވެ.
ރޭގެ ޖަލްސާގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ އެހެންނަމަވެސް މިހާތަނަށް އައިއިރު 7 އަތޮޅެއްގައި ޑެންޓަލްގެ ޚިދުމަތް ދެވެން ފެށިއްޖެ ކަމަށާއި، 5 އަތޮޅެއްގައި ސީޓީ ސްކޭންގެ ޚިދުމަތް ފެށިއްޖެ ކަމަށާއި، އަދި އުތުރާއި ދެކުނުގައި އެމްއާރުއައި ހެދެން ފަށައިފި ކަމަށެވެ.
އިތުރު ހޮސްޕިޓަލްތައް އެޅެމުން އެބަދޭ. މިރަށަކީ ހޮސްޕިޓަލެއް ބޭނުންވާ ރަށެއް. މިހާރު ހުރި ހޮސްޕިޓަލުގެ ބަދަލުގައި އާ ހޮސްޕިޓަލެއް އަޅަންޖެހޭ. އެކަން ކުރުމުގެ ކުރިން މިހާރު ހުރި ހޮސްޕިޓަލުން ދޭ ޚިދުމަތްތައް ރަގަޅު ކުރުމުގެ މަސައްކަތް އަޅުގަޑުމެން ކުރިޔަށް އެބަ ގެންދަން. އިރާދަ ކުރެއްވިއްޔާ އަޅުގަޑުމެން ވެފައި އޮތް ވައުދާ އެއްގޮތަށް މިރަށުގެ އާ ހޮސްޕިޓަލްވެސް އެޅިގެންދާތަން ތި ބޭފުޅުންނަށް ފެނިގެން ދާނެ.
ދިއްދޫގެ އާ ހޮސްޕިޓަލްވެސް މި ސަރުކާރުން އަޅުއްވާ ދެއްވާނެކަމަށް ވައުދުވަމުން ރައީސް ސާލިހު ވިދާޅުވިއެވެ.
އޭގެ އިތުރަށް ރައީސް ސާލިހު ވިދާޅުވީ ހުރިހާ ރަށަކުންވެސް އިވެމުންދަނީ ބިން ހިއްކަން ބޭނުންވާ ވާހަކައާއި ޕިކްނިކް އަައިލޭންޑްތައް ރައްޔިތުން ބޭނުންވާ ވާހަކަ ކަމަށާއި، ދިއްދޫގެ ބިން ހިއްކިގެން ދާއިރު އެރަށަށް ޕިކްނިކް އައިލޭންޑެއްވެސް ލިބިގެން ދާނެކަމުގައެވެ.
ފާއިތުވެދިޔަ ދެ ދުވަހު ރައީސް ސާލިހުވަނީ، ހއ. ހޯރަފުށި، ތުރާކުނު، އުލިގަމު، މޮޅަދޫ، އިހަވަންދޫ، މާރަންދޫ، ތަކަންދޫ، ކެލާ، ވަށަފަރު، އަދި ދިއްދޫއަށް ވަޑައިގެންފައެވެ. ކެމްޕޭން ދަތުރުފުޅު ނިންމަވާލެއްވުމަށްފަހު ރައީސް ސާލިހު އެނބުރި މާލެ ވަޑައިގެންފައިވަނީ ރޭގެ ދަންވަރުގެ ވަގުތެއްގައެވެ.
ކޮމެންޓު ފޮނުވާ