އިދިކޮޅު ޕްރިގްރެސިވް ކޯލިޝަނުން ޖުމްހޫރީ މައިދާނަށް އެއްވެ ޚިޔާލް ފާޅު ކުރަމުންދަނިކޮށް ފުލުހުން އައިސް އެބޭފުޅުން ހައްޔަރުކޮށްފިއެވެ.
ޖުމްހޫރީ މައިދާނަށް އެއްވީ ޕީޕީއެމްގެ ނައިބު ރައީސް އަދި މަޖިލިހުގެ ނައިފަރު ދާއިރާގެ މެންބަރު އަހުމަދު ޝިޔާމް، މަހިބަދޫ ދާއިރާގެ ޕީޕީއެމްގެ މެންބަރު އަހުމަދު ތޯރިގު، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު، ޕީއެންސީގެ ދެ ނައިބުން ކަމަށްވާ މަޑުއްވަރީ ދާއިރާގެ މެންބަރު އާދަމް ޝަރީފާއި މާވަށު ދާއިރާގެ މެންބަރު މުހައްމަދު ސައީދުއެވެ.
ފުލުހުން ވަނީ ދާދި ދެންމެއަކު ޖުމްހޫރީ މައިދާނަށް ވަދެ ހުރިހާ ބޭފުޅުން ފުލުހުންގެ ވެހިކަލަށް އަރުވާފައެވެ. އެވަގުތު އިދިކޮޅު ލީޑަރުން ދިޔައީ އެގޮތަށް އެބޭފުޅުން ދުރު ނުކުރެވޭނެ ކަމަށް ވިދާޅުވަމުންނެވެ.
އެއްވި އިދިކޮޅު ލީޑަރުންގެ އިތުރުން ބައެއް ޢާންމު މީހުންވެސް ވަނީ ފުލުނުންގެ ބެލުމުގެ ދަށަށް ގެންގޮސްފައެވެ. އެއްވި މީހުން ހައްޔަރުކޮށްގެން ފުލުނުން ގެންދިޔައީ ކޮންތާކަށް ކަމެއް ސާފެއް ނުވެއެވެ. އިދިކޮޅު ލީޑަރުން ޖުމްހޫރީ މައިދާނުގައި ތިބެ ވަނީ އެކި ޝުއޫރުތައް ފާޅުކޮށްފައެވެ. އެބޭފުޅުން އެންމެ ބޮޑަށް ފާޅު ކުރީ ރައީސް ޔާމީން ޖަލަށް ލާފައިވާތީ މިނިވަން ކުރުމާއި ގުޅޭގޮތުން ޝުއޫރުތަކެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
އެހެންވެ ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމު ދެމިއޮތްހާ ހިނދަކު އެމަނިކުފާނުގެ ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެފައިވެއެވެ.
