ހަމައެކަނި މާދަމާ ފެންނަ މީހަކަށް ވެރިކަން ނުކުރެވޭނެކަމަށް ވިދާޅުވެ ރައީސް އިބްރާހިމް މުހައްމަދު ޞާލިހުގެ ރައްދު ނަޝީދަށް ދެއްވައިފިއެވެ.
ރައީސް މިހެން ވިދާޅުވީ ހއ.އަތޮޅަށް ކުރައްވާ ކެމްޕޭން ދަތުރުގެ ފުރަތަމަ މަންޒިލް ކަމުގައިވާ މިދައުރުގައި އެންމެ ބޮޑު ތަރައްޤީއެއް ގެނައި ހޯރަފުއްޓަށް ވަޑައިގެން އެރަށުގެ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުންނެވެ. ރައީސް ޞާލިހު ވިދާޅުވީ ރާއްޖޭގެ ވެރިކަން ކުރެވޭނީ މިއަދާއި، އިއްޔެެއަށްވެސް ވިސްނައިގެން ކަމަށެވެ. ހަމައެކަނި ތިމާގެ އަމިއްލަ މަސްލަހަތަށް ބަލައި މާދަމައަށް އެކަނި ވިސްނާ މީހަކަށް ރާއްޖޭގެ ވެރިކަން ނުކުރެވޭނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ކޯވިޑް-19ގައި ދިވެހި ރާއްޖެ ބަނޑަށް ޖެހުނީ ކަމަށް ހީކޮށް، ރާއްޖޭގެ ފަތުރުވެރިކަން ހުއްޓުމަކަށް ގެނައުމަށް ބަޔަކު މަސައްކަތް ކުރި ކަމަށެވެ. އެގޮތުން ފަތުރުވެރި ކަން ކުރަމުންދިޔަ ރިސޯޓްތައް ބަންދުކޮށް އެތަންތަނުގައި ދަނޑުވެރިކަން ކުރުމަށް ގޮވާލާމުން ދިޔަކަމަށެވެ. އަދި ރިސޯޓްތަކުގެ ބަދިގެ ތަކުގައި މަސްކައްކައި ހިއްކަން ގޮވާލި ވެރިން ތިބިކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ އޭރު އެބޭފުޅުން އެހެން ވިދާޅުވީ އަމިއްލަ އެދުމުގައި މިވެރިކަން ބަލިކަށި ކޮށްލުމަށް ކަމަށެވެ.
އަޅުގަނޑުމެންގެ އެޖެންޑާ އަކީވެސް އަމާޒަކީ ރައްޔިތުންނަށް ތަރައްޤީ ގެނެސް ދިނުން. އަމާން ސުލްހަވެރި ރާއްޖެއެއް ހޯދައި ދިނުން މިއީ މުޅި ކޯލިޝަންވެސް އެޖެންޑާ. ހަމައެކަނި މާދަމާ ފެންނަ މީހަކަށް ކުރެވޭނެ ވެރިކަމެއް ނޯންނާނެ.
– ރައީސް ވިދާޅުވިއެވެ.
ރައީސް ވިދާޅުވީ އޭރު އެޅުއްވި ހަރުދަނާ ފިޔަވަޅު ތަކާއިއެކު ރާއްޖޭގެ ފަތުރުވެރިކަން އެތައް ގުނައެއް ކުރިއެރުން ހޯދާފައިވާކަމަށެވެ. މިއަހަރުގެ މިހާތަނަށް 1 މިލިޔަން ފަތުރުވެރިން އައިސްފައިވާއިރު، އަމާޒަކީ ރާއްޖެއަށް މިއަހަރު ނިމިގެންދާއިރު 1.9 މިލިޔަން ފަތުރުވެރިން ގެނައުންކަމަށް ރައީސް ވިދާޅުވިއެވެ.
ރައީސްގެ ވާހަކާގައި ވަނީ ކުރިއަށް އޮތް މަދު ދުވަސްތަކުގެ ތެރޭގައި ހޯރަފުށީ ހޮސްޕިޓަލުގެ މަސައްކަތް ފަށާ، ހޮސްޕިޓަލް ތަރައްޤީ ކޮށްދެއްވާނެކަމަށް ވައުދުވެފައެވެ. އަދި އިހަވަންދިއްޕޮޅަށް ގެނެސްދެއްވާނެ ތަރައްޤީ ވަރަށް އަވަހަށް ހާމަކޮށްދެއްވާނެކަމަށެވެ. ރައީސް ވަނީ މިޖަލްސާގައި އެމަނިކުފާނުގެ ވެރިކަމުގައި ރާއްޖޭގެ އެކި ކަންކޮޅުތަކަށް ގެނެސްދީފައިވާ ތަރައްޤީ ހިސާބު އަދަދުތަކުން ހިއްސާ ކުރައްވާފައެވެ.
