ކުރިޔަށް އޮތް ރިޔާސީ އިންތިޚާބުގެ ކެމްޕޭނަށް ރައީސް ސާލިހު މިހާރު ރަށްރަށަށް ކުރައްވަމުން ގެންދަވާ ދަތުރުތަކުގައި، ރައީސް ސޯލިހުގެ ކެމްޕޭން ޓީމުން މ. އަތޮޅު ދިއްގަރުގަރަށް ވަޑައިގެންނެވުމުން އެރަށުގައި ސަރުކާރާ ދެކޮޅަށް ބަޔަކު އަޑު އުފުލުމުން، ހޯމް މިނިސްޓަރ އިމްރާން އިދިކޮޅު ޕާޓީތަކަށް އިންޒާރު ދެއްވައިފިއެވެ.
މިގޮތުން ރޭ ދިއްގަރުގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން އިމްރާން ވިދާޅުވީ ރަށްރަށް ވަޑައިގަތުމުން ފެނިވަޑައިގެންނެވީ މިއަދު ހާލަތާއި އެއްގޮތަކަށްވެސް މުނާސަބު "ވައްތަރު" ކަންތައްތަކެއް ނޫންކަމަށާއި، މި ސަރުކާރު އޮތީ އެހާލަތު 2000ގެ ކުރީކޮޅަށް ލައި ނިންމާލައިގެން ކަމުގައެވެ.
އަޅުގަނޑު ހިތުން އަޅުގަނޑުމެން މިއަދު ރަށަށް އެރި އިރު އަޅުގަނޑުމެންގެ ވާދަވެރިން ދެއްކި މަންޒަރަކީ ރާއްޖޭގެ 2021 ވަނަ އަހަރުގެ ހާލަތާ އެއްގޮތަކަށް ވެސް މުނާސަބު ގާބިލު ވައްތަރު ހާލަތެއް ނޫން. އަޅުގަނޑުމެން މިތިބީ އެ ހާލަތު ރައީސް ވިދާޅުވި ގޮތަށް 2000 ގެ ކުރީ ކޮޅަށް ލައި، މާޒީގެ ސަފުހާ ތަކަށް ލައި ނިންމައިގެން.
ރޭ މ. ދިއްގަރުގައި ބޭއްވި ޖަލްސާގައި ވާހަކަ ދައްކަވަމުން އިމްރާން ވިދާޅުވިއެވެ.
ބައެއް ރަށްތަކަށް ސަރުކާރުގެ ޓީމުން ދިއުމުން އެރަށްތަކުގައި މުޒާހިރާ ކުރާކުރުން ކުއްވެރިކޮށް އިމްރާން ވިދާޅުވީ ދެން އަންނަ ދައުރެއްގައި ރާއްޖޭގެ އަމާންކަން ގާއިމްކޮށްދެއްވާނެ ކަމަށާއި، މުޒާހިރާ އެބީދައިން ނުކުރެވޭނެކަން ސާބިތު ކޮށްދެއްވާނެ ކަމުގައެވެ.
އިރާދަ ކުރެއްވިއްޔާ ރައީސް އިބްރާހިމް މުހައްމަދު ސޯލިހުގެ ސަރުކާރުގަ، އަންނަން އޮތް ސަރުކާރުގަ މިކަން އިތުރަށް ސާބިތު ކޮށްދީ އަމާން ރާއްޖެއަކަށް މި ރާއްޖެ ހަދާނަން.
ރައީސް ސާލިހުގެ ދެވަނަ ދައުރެއްގައި މުޒާހިރާ ކުރަން ފުރުސަތު ނުދެއްވާނެކަމަށް މޭރުން ކުރައްވަމުން އިމްރާން ވިދާޅުވިއެވެ. މިގޮތުން އިމްރާން ވިދާޅުވީ ދެނެއް "ގަޔަށް ބޮލަށް އަރާ، ފެން އުކާ ވެލި އުކާކަށް ޖާގައެއް ނުދޭނެ" ކަމަށެވެ.
ރައީސް ވިދާޅުވި ގޮތަށް މިއަދު ރާއްޖެ ސިޔާސީ ހަރަކާތް ހިންގަން ތަސައްރަފު ފުދިފަ މިއޮތީ، ޑިމޮކްރަސީއަށް ފައްކާ ވެފަ މިއޮތީ މިއަދުގެ ހާލަތުގެ ވައުދު ވިއްކައިގެން، ސިޔާސަތު ވިއްކައިގެން.
ރޭގެ ޖަލްސާގައި ވާހަކަ ދައްކަވަމުން އިމްރާން ވިދާޅުވީ "ގަޔަށް ބޮލަށް އެރި ދުވަސް" ފާއިތުވެގެން ހިގައްޖެ ކަމުގައެވެ.
