ރ. ފުއްގިރި މައްސަލާގައި ކުރީގެ ރައީސް ޔާމީންގެ މައްޗަށް ކުރާ ދައުވާގެ އަޑުއެހުން މިއަދު ކެންސަލްކޮށްފިއެވެ.
ވ. އާރަށް ކުއްޔަށް ދިނުމުގައި ރިޝްވަތި ހިފައި މަނީ ލޯންޑާކުރި ކަމުގެ ކުށުގައި މިހާރު ވެސް 11 އަހަރުގެ ޖަލު ހުކުމެއް އޮތް ޔާމީންގެ މައްޗަށް، ފުއްގިރި މައްސަލާގައި ދައުވާ ކުރަނީ ވެސް އެރަށް ކުއްޔަށް ދޫކުރުމުން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް އެ ފައިސާ ލޯންޑާކުރި ކަމަށް ބުނެއެވެ. އެ މައްސަލައިގައި މިއަދު ބާއްވަން ހަމަޖެއްސި އަޑުއެހުން ކެންސަލްކުރީ، ކްރިމިނަލް ކޯޓުން ބުނި ގޮތުގައި ދައުލަތުން މިއަދަށް ހާޒިރު ކުރަންޖެހޭ ހެކިން ހާޒިރު ނުކުރެވޭތީއެވެ.
ފުއްގިރި މައްސަލައިގައި އެންމެ ފަހުން ހެކިބަސް ނަގާފައިވަނީ މިދިޔަ ބުރާސްފަތި ދުވަހުގައެވެ. އެ އަޑުއެހުން ބޭއްވީ، މި މައްސަލާގައި ދެން ދައުވާކުރާ އަހުމަދު ކްރިކް ރިޒާގެ ދައުވާ ދައުލަތުން އަނބުރާ ގެންދިއުމަށް ފަހުގައެވެ. އެހެންކަމުން މި މައްސަލަ މިހާރު ކުރިޔަށް ގެންދަނީ ކްރިކްގެ ދައުވާ ނުހިމަނައި ޔާމީނާއި ދެން ދައުވާ ލިބޭ ސަންގެ ދެ ކުންފުނި ހާޒިރުކޮށްގެންނެވެ.
ކްރިކްގެ ބަލި ހާލަތާ ގުޅޭ ގޮތުން އެއް މަސް ދުވަހަށް ކޯޓަށް ހާޒިރު ނުވެވޭނެ ކަމަށް ބުނެ ހުށަހަޅާފައިވާ މެޑިކަލް ރިޕޯޓަކާ ގުޅިގެން ވެސް ފުއްގިރި މައްސަލައިގެ ޝަރީއަތް މަޑުޖެހުނެވެ. އެހެންވެ، ދައުލަތުން ނިންމީ ކްރިކްގެ ދައުވާ މިވަގުތަށް އަނބުރާ ނަގާށެވެ.
އެންމެފަހުން މި މައްސަލާގައި ބޭއްވި އަޑުއެހުމުގައި ހެކިބަސް ނަގާފައިވަނީ މަޖިލިސް މެންބަރު އިބްރާހިމް ރަޝީދު (ބޮންޑޭ)ގެ އެވެ. އޭނާއަކީ ފުއްގިރި ކުއްޔަށް ނެގުމުގައި ދުބާއީ ކުންފުނީގެ ރާއްޖޭގެ މަންދޫބެވެ. ކްރިމިނަލް ކޯޓުން ފުއްގިރި މައްސަލަ އަވަސް އަރުވާލައިގެން ނިންމަން މަސައްކަތް ކުރަމުން ގެންދާ ކަމަށް ބުނެ ޔާމީންގެ ގާނޫނީ ވަކީލުންނާއި، ސަޕޯޓަރުން އަންނަނީ ކަންބޮޑުވުން ފާޅުކުރަމުންނެވެ.
ކްރިމިނަލް ކޯޓުން ފުއްގިރި މައްސަލަ ކޮންމެ ހަފްތާއަކު ވެސް ތާވަލް ކުރަމުން ގެންދާތީ ޔާމީން ހައިކޯޓުގައި އިސްތިއުނާފު ކޮށްފައިވާ މައްސަލައިގެ ޝަރީއަތް ކުރިއަށް ގެންދަން ވެސް ހުރަސް އެޅިގެން ދިޔައެވެ.
