މިހާރު ކުރިމިނަލް ކޯޓުގައި ކުރީގެ ރައީސް ޔާމިންގެ މައްޗަށް ކުރެވެމުންދާ، ރ. ފުއްގިރި ޓުއަރިޒަމްގެ މަސައްކަތްތަކަށް ކުއްޔަށް ދިނުމުގެ މުއާމަލާތުގައި ރިޝްވަތު ނަގާ އަދި މަނީ ލޯޑަރ ކޮށްފައިވާކަމުގެ ތުހުމަތުތަކާއި ގުޅުން ހުރި ޝަރީއަތުގައި ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ) މިއަދު ހެކިބަސް ދީފިއެވެ.

މިމައްސަލާގައި މިއަދު ހެކި ބަސްދެމުން ބޮންޑޭ ވިދާޅުވެފައިވަނީ، އެމްއެމްޕީއާރުސީގެ ޚިޔާނާތް ހިނގިއިރު އޭނާއަކީ އަމިއްލަ މަސައްކަތް ކުރަމުންދިޔަ މީހެއް ކަމަށާއި، އޭރު އޭނާހުރީ އެއްވެސް ނުފޫޒެއް ފޯރުވޭފަދަ، ދައުލަތުގެ މަގާމެއްގައިވެސް ނޫންކަމުގައެވެ. އެހެންނަމަވެސް އައިބީއާރު މޯލްޑިވްސްގެ ނަމުގައި ކުންފުންޏެއް އުފައްދައިގެން ޓުއަރިޒަމާއި ގުޅުންހުރި ވިޔަފާރީގެ މަސައްކަތް އޭނާ ކުރަމުން ދިޔަކަމަށްވެސް ވިދާޅުވެފައި ވެއެވެ.

ޝަރީއަތުގެ މަޖިލިހުގައި ހެކިބަސް ދެމުން ބޮންޑޭ ވިދާޅިވީ، އެރަށް ގަންނަން ބޭނުންވި ކުންފުނީގެ ދިވެހި އޭޖެންޓެއްގެ ގޮތުގައި އޭނާ މަސައްކަތް ކުރި ކަމަށާއި، ފުއްގިރީގެ ކޮންސެޕްޓް ޑިޒައިންއާއި، އީއައިއޭއާއި ގުޅުންހުރި ކަންކަމުގައި ފައިސާ ދައްކާފައިވަނީ އޭނާގެ ކުންފުނި މެދުވެރިވެގެން ކަމުގައެވެ.

އަދި އޭނާގެ ކުންފުނި މެދުވެރިކޮށް ދައްކާފައިވަނީ ބޭރުގެ ކުންފުނިން ދެއްކި ފައިސާކަމަށް ވިދާޅުވަމުން ބޮންޑޭ ވިދާޅުވީ، އިނިޝިއަލް ޕޭމަންޓެއްގެ ގޮތިގައި އޭނާގެ ކުންފުނި މެދިވެރިކޮށް ދައުލަތަށް 150،000 ޑޮލަރު ދައްކާފައިވާނެ ކަމަށެވެ.

ބޮންޑޭ ވިދާޅުވީ އެރަށް ކުއްޔަށް ދިނުމަށް ހިންގުނު މުއާމަލާތާއި ގުޅިގެން ކުރިކު ރިޒާއަށް ލިބެންޖެހޭ އެއްވެސް ފައިސާއެއް އޮވެގެން ނުވާނެކަމުގައެވެ. އަދި އޭނާ ވިދާޅުވީ އޭރު ކުރިކު ރިޒާ މަސައްކަތް ކުރަމުން ގޮސްފައިވަނީވެސް އެސްޓީއޯގައި ކަމުގައެވެ.

ބޮންޑޭ ވިދާޅުވީ އޭނާގެ ކުންފުނިން ދައުލަތަށް ފައިސާ ދެއްކިތާ 6 ވަރަކަށް ދުވަސްފަހުން އެކައުންޓު ސްޓޭޓްމަންޓް ބެލިއިރު ފައިސާ ގޮސްފައި ހުރީ އެސްއޯއެފްގެ އެކައުންޓަށް ކަމަށެވެ. އަދި އެކަމާ އޭރު ސުވާލު އުފައްދާ އޭސީސީގެ ސަމާލުކަމަށްވެސް އެކަން އޭރު ގެނައިކަމަށްވެސް ވިދާޅުވިއެވެ.

އަދި އޭނާވިދާޅުވީ އޭގެ ފަހުން ރަށާއި ގުޅޭ އެންމެހާ މުއާމަލާތެއް ކުރިޔަށް ގެންގޮސްފައިވަނީ ލޯ ފާމެއް މެދުވެރިކޮށް ކަމަށާއި، ކުއްލިއަކަށް ރަށުގެ އަގު ކުޑަވުމުން ބޭރުގެ ކުންފުނިންވެސް އެސުވާލު ކުރިކަމަށެވެ. އަދި ކުންފުނިން އޭރުއޮތީ އަސްލު އަގުގައި އެރަށް ގަންނަ ގޮތަށްކަމަށް ވިދާޅުވަމުން ބޮންޑޭ ވިދާޅުވީ، ޝައްކު ކުރެވޭކަންކަން ހުރެގެން ބޭރުގެ ކުންފުނީގެ ސަމާލުކަމަށްވެސް އެކަން ގެނައިކަމަށެވެ. އެމުއާމަލާތާއި ގުޅުންހުރި އިތުރު ތަފްސީލު ދެން އެނގޭނީ މުއާމަލާތް ކުރުމުގައި ބޭނުންކުރި ލޯފާމަށްކަމަށްވެސް ބޮންޑޭ ވިދާޅުވިއެވެ.

ބޮންޑޭ އިތުރަށް ވިދާޅުވީ ފުއްގިރީގެ އެއްވެސް މުއާމަލާތެއްގައި އެއްވެސް އިރަކު ކުރީގެ ނާއިބު ރައީސް އަހުމަދު އަދީބުއާއި ބައްދަލު ކޮށްފައި ނުވާނެ ކަމުގައެވެ.

މިއަދު ކުރިޔަށްދިޔަ ޝަރިއަތުގައި ދެވަނަ ހެއްކެއްގެ ގޮތުގައި ދައުލަތުން ހާޒިރުކުރީ ތިމާވެށީގެ ދާއިރާގެ ކޮންސަލްޓެންސީ މަސައްކަތް ކުރާ ކުންފުންޏެއްގެ ސީއީއޯ ކަމުގައިވާ އަހުމަދު ޝާއިރެވެ. ފުއްގިރީގެ މުއާމަލާތުގެ ދިވެހި ކޮންސަލްޓެންޓުގެ ގޮތުގައި އޭނާއާއި ބޮންޑާ ބައްދަލުކުރި ކަމަށް އޭނާވަނީ ކޯޓުގައި ހެކިބަސް ދީފައެވެ.

ފުއްގިރި މައްސަލާގައި ޝަރީއަތް ކުރިޔަށް ގެންދަވަނީ ގާޒީ އަލީ ނަދީމްއެވެ.