ދަށު ކޯޓުގައި މިހާރު ކުރިޔަށްދާ، ކުރީގެ ރައީސް ޔާމިންގެ މައްޗަށް ކުރެވެމުންދާ، ފުއްގިރި މައްސަލާއިގެ ޝަރީއަތްތައް، ޔާމީނާއި އެއް މައްސަލައެއްގައި ދައުވާލިބޭ ކުރިކް ދިގު މުއްދަތަކަށް ބަލިވެކަމަށް ބުނެ، ޝަރީއަތަށް ހާޒިރު ނުވެ، ޝަރީއަތް ބުރަކިޖެހި، ޔާމިންގެ ޝަރީއަތް ކުރިޔަށް ގެންދެވޭ ގޮތް ނުވެފައިވާއިރު، އެމައްސަލާއިގެ ޝަރީއަތަށް ހާޒިރު ނުވެވޭނެކަމަށް ބުނެ ކުރިކު ރިޒާ ޝަރީއަތަށް ހުށަހަޅަމުންދާ މެޑިކަލް ރިޕޯޓުތައް ދޫކޮށްފައިވަނީ އެންމެ ރަގަޅު އުސޫލުން ނޫންކަމަށް އައިޖީއެމްއެޗްއިން ޕީޖީ އޮފީހަށް އަންގާފައިވާކަމަށް "ޚަބަރު އޮންލައިން"އަށް މައުލޫމާތު ލިބިއްޖެއެވެ.
ދެ މީހުންގެ މައްޗަށްވެސް އެއް މައްސަލައެއްގައި ދައުވާ ކޮށްފައިވާ މިމައްސަލާގައި، ޔާމިންގެ ޝަރީއަތް ކުރިޔަށް ގެންދެވޭ ގޮތް ނުވެގެން، އެމައްސަލާގައި ކުރިކު ރިޒާގެ ބައި މިވަގުތައް އަނބުރާ ގެންދިއުމަށްވެސް ޕީޖީން ކުރިމިނަލް ކޯޓުގައި މިހާރުވަނީ އެދިފައެވެ.
ޕީޖީގެ މީޑިއާ އޮފިޝަލް މިއަދު ވިދާޅުވެފައިވަނީ، ކުރިކު ރިޒާގެ ފަރާތުން ކޯޓަށް ހުށަހަޅަމުންދާ މެޑިކަލް ލިޔެކިޔުންތަކާއި ގުޅިގެން ޝަރިއަތް ކުރިޔަށް ގެންދެވިފައި ނުވާކަމުގައެވެ. އޭނާ އިތުރަށް ވިދާޅުވެފައިވަނީ ޝަރީއަތަށް ކުރިކު ރިޒާގެ ފަރާތުން ހުށަހެޅި ހެކިތަކުގެ ސައްޙަކަން ކަށަވަރު ކުރުމަށްޓަކާ ފުލުހުން މިހާރު ގެންދަނީ އިތުރަށް ބަލަމުން ކަމުގައެވެ.
ޕީޖީ އޮފީހުން ބޭނުންވަނީ، ކުރިކު ރިޒާގެ މައްސަލަ މިވަގުތައް މަޑު ޖައްސާލުމަށްފަހު، އޭނާ ޝަރީއަތަށް ހުށަހަޅާފައިވާ ހެކީންގެ ސައްހަކަމާއި ގުޅޭގޮތުން ފުލުހުން މިހާރު ކުރިޔަށް ގެންދާ، ތަހުގީގުތައް އިތުރަށް ފުރިހަމަ ވުމަށްފަހު، ކުރިކުގެ މައްޗަށް ކުރާ ދައުވާ އަލުން ކޯޓަށް ހުށަހެޅުމަށެވެ.
"ޚަބަރު އޮންލަައިން"އަށް މައުލޫމާތު ލިބިފައިވާގޮތުގައި، ކުރިކު ރިޒާ ޝަރީއަތަށް ހުށަހަޅަމުންދާ މެޑިކަލް ރިޕޯޓުތަކުގެ ސައްހަކަން ކަށަވަރު ކުރުމަށް ޕީޖީން އައިޖީއެމްއެޗްގައި އެދުނެވެ. އަދި ޕީޖީން ފޮނުވި ސިޓީގެ ޖަވާބުގައި، ކުރިކު ރިޒާއަށް މެޑިކަލް ސެޓްފިކެޓްތައް ދޫކޮށްފައިވަނީ އެހެންތަނަކުން ހަދާފައިވާ ސެޓްފިކެޓްތަކަކަށް ބަރޯސާކޮށް ކަމަށްވާތީ، އެއީ އެންމެ ރަގަޅު އުސޫލުން ހިގާފައިވާ މުއާމަލާތެއް ނޫންކަމަށް އަިއޖީއެމްޗްއިން ދެކޭކަމަށް އެހޮސްޕިޓަލުން ޕީޖީއަށް މައުލޫމާތު ދީފައިވާކަމަށްވެއެވެ.
އަދި މިކަން މިގޮތަށް ދިމާވީ، ޝަރީއަތުގެ ބޭނުމަށް މެޑިކަލް ރިޕޯޓުތައް ދޫކުރުމަށް އުސޫލުތަކެއް އެ ހޮސްޕިޓަލުގައި އެކަށައެޅިފައި ނޯންނާތީ ކަމަށާއި، އެކަމަށްޓަކާ އެ ހޮސްޕިޓަލުން އުސޫލުތަކެއް އެކަށައަޅާނެކަމަށް އައިޖީއެމްއެޗްއިން ޕީޖީއަށް ފޮނުވި ޖަވާބުގައި ބުނެފައިވާކަމަށްވެސް "ޚަބަރު އޮންލައިން"އަށް ވަނީ މައުލޫމާތު ލިބިފައެވެ.
މައުލޫމާތު ލިބިފައިވާ ގޮތުގައި ޕީޖީންވަނީ އައިޖީއެމްއެޗްގެ ސިޓީ މިހާރު ޝަރީއަތަށްވެސް ހުށަހަޅާފައެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގައި ކުރިއަށްގެންދާ ޝަރީއަތްތައް އީދު ބަންދަށްފަހުވެސް ބާރާށް ކުރިޔަށް ގެންދަން ތާވަލް ކުުރިކަމުގައިވި ނަމަވެސް، އެމައްސަލާގައި ދައުވާލިބޭ ކުރިކް ރިޒާ ބަލިވުމުގެ ސަބަބުން ޝަރީއަތް ކުރިޔަށް ނުގެންދެވި ޝަރީއަތުގެ އަޑުއެހުންތަކަށް ހުއްޓުމެއް ވަނީ އައިސްފައެވެ.
މިގޮތުން ފާއިތުވި އީދު ބަންދަށްފަހުވެސް ކުރިކު ރިޒާ ބަލިވެ އުޅޭތީ އޭނާއަށް ޝަރީއަތަށް ހާޒިރު ނުވެވޭނަކަން އަންގާފައިވާތީ ޝަރީއަތްތައް ކެންސަލް ކުރަޖެހިފައިވާކަމަށް ކުރިމިނަލް ކޯޓުން ދަނީ ބުނަމުންނެވެ. އެއާއެކު، ދަށު ކޯޓުގައި އޮތް ޔާމިންގެ މިމައްސަލަ ފާއިތުވި 2 މަހެއްހާދުވަހުވެސް ކުރިށް ގެންދެވިފައި ނުވަނީ ޔާމިންއާއި އެއް މައްސަލައެއްގައި ދައުވާލިބޭ ކުރިކު ރިޒާ ބަލިވެ ޝަރީއަތަށް ހާޒިރު ނުކުރެވުމުގެ ސަބަބުންނެވެ.
އަދި ޔާމިންވަނީ ދަށު ކޯޓުގައި ކުރިޔަށްދާ މައްސަލައިގެ ސްޕީޑު އަވަސްކަމުން އޭގެ ޝަކުވާތައްވެސް ތަކުރާރުކޮށް ކުރައްވާފައެވެ. ހަމައެއާއެކު ޔާމިން އެދެމުން އައިސްފައިވަނީ ހައި ކޯޓުގައި ކުރިޔަށްދިޔަ އޭނާގެ އިސްތިއުނާފުގެ މައްސަލަ އަވަސް ކޮށްދިނުމަށެވެ. އެހެންނަމަވެސް އެމައްސަލަ ކުރިޔަށްދަނިކޮށް، މައްސަލާއިގެ ބެންޗުގެ ބައެއް ފަނޑިޔާރުން ޗުއްޓީއަށް ވަޑައިގެންނެވުމާއި ގުޅިގެން، އެމައްސަލައިގެ ޝަރީއަތްވެސް މިހާރުވަނީ ހުއްޓުމަކަށް އައިސްފައެވެ.
ބައެއް ފަރާތްތަކުން ތުހުމަތު ކުރަނީ، ދަށުކޯޓުގެ މައްސަލަ ބުރަކި ޖެހިފައިވަނިކޮށް، ހައި ކޯޓުގެ މައްސަލަ އަވަސްކުރުމަށް ޔާމީން އެދެމުން އައިސްފައިވަނީ ހައިކޯޓުން މިނިވަންވެ، ކުރިޔަށް އޮތް ރިޔާސީ އިންތިޚާބުގައި ވާދަކޮށް، އަދި ދަށު ކޯޓުގައި ކުރިޔަށްދާ މައްސަލަ ކުރިޔަށް ނުގެންދެވޭނެ ގޮތް ހެދުމަށެވެ.
ޔާމިންއާއި ކުރިކު ރިޒާއަށްވެސް އެއް މައްސަލައެއްގައި ދައުވާ ލިބޭ މިމައްސަލައިގެ އަޑުއެހުންތަކަށް ހާޒިރު ނުވެވޭ މިންވަރަށް ދިގުމުއްދަތަކަށް ކުރިކު ރިޒާ ބަލިވެ އުޅެނީ ކޮންކަހަލަ ސިއްހީ މައްސަލައެއްގައި ކަމެއް ސާފު ވެފައެއް ނުވެއެވެ.
