ޕީޕީއެމް/ޕީއެންސީ ކޯލިޝަންގެ އެޑްވައިޒަރު އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެރިކަން ކުރާ މައި ޕާޓީ އެމްޑީޕީއާއި ގުޅޭނީތޯ އެކޯލިޝަންގެ ސެނެޓް ވަޓްސް އަޕް ގްރޫޕުގައި ސުވާލު އުފައްދާފައި ވަނިކޮށް، ޕީޕީއެމްއަށް އޭނާ ކޮށްދިން ޚިދުމަތްތަކަށް ޕީޕީއެމްއިން އޭނާއަށް ދިން "އިނާމަށް" ޑރ. ޝަހީމް ޝުކުރު އަދާކުރައްވައިފިއެވެ
ޑރ. ޝަހީމް ޕީޕީއެމް ދޫކޮށް ވަޑައިގަންމަވަނީތޯ ސާފުކުރުމަށް ޕީޕީއެމް/ޕީއެންސީ ވަޓްސްއަޕް ގުރޫޕުގައި ޕީޕީއެމް ސެނެޓްގެ މެމްބަރެއް ކަމުގައިވާ މުއާޒް ހަލީމް ކުރެއްވި މެސެޖަކަށް ޖަވާބު ދެއްވަމުން ޑރ. ޝަހީމް ވިދާޅުވީ ފާއިތުވި 10 އަހަރު އޭނާ އެޕާޓީއަށް ކޮށްދެއްވި ޚިދުމަތްތަކާއި ގުޅިގެން ތިޔަ ދެއްވި އިނާމަށް ޝުކުރު އަދާކުރައްވާ ކަމުގައެވެ.
ސިޔާސީ ހަޔާތުގައި ވޭތިވެދިޔަ 20 އަހަރުގެ ތެރެއިން 2013 އިން 2023، ދިހަ އަހަރު ޕީޕީއެމްއަށް ކުރި ޚިދުމަތަށް ތިޔަ ދެއްވި އިނާމަށް ޝުކުރު ދަންނަވަން.
– ޝަހީމް ވިދާޅުވިއެވެ.
ޑރ.ޝަހީމަކީ ޕީޕީއެމްއަށް ގިނަ ޚިދުމަތްތަކެއް ކޮށދެއްވާފައިވާ އެޕާޓީގެ މުހިންމު ދައުރެއް އަދާކުރެއްވި ބޭފުޅެކެވެ. އަދި ނިމިދިޔަ ރިޔާސީ އިންތިޚާބުގައި ރައީސް ޔާމީންގެ ރަނިން މޭޓެއްގެ ގޮތުގައި ކަނޑައެޅުއްވީވެސް ޑރ.ޝަހީމެވެ. ޕީޕީއެމްގެ ތެރޭގައި އޮތް ޚިޔާލް ތަފާތުވުންތަކުގެ ތެރެއިން ޑރ.ޝަހީމަކީ ޕާޓީގެ އެޑްވައިޒަރެއްގެ ގޮތުގައި ހުންނެވި ބޭފުޅެއް ކަމުގައި ވީނަމަވެސް، ޕާޓީގެ މުހިންމު ނިންމުންތަކުގައި ޑރ.ޝަހީމްގެ އެއްވެސް ބައިވެރިވުމެއް ނޯންނަ ކަމަށް މައުލޫމާތު ލިބިފައިވެއެވެ.
ޑރ.ޝަހީމްގެ މިމެސެޖަކީ އެމަނިކުފާނު ކޮށްދެއްވި ޚިދުމަތްތައް ޕީޕީއެމްއިން ބަލައި ނުގަންކަން ހާމަވާ މެސެޖެކެވެ. ގިނަ ދުވަސްތަކެއް ވަންދެއް ޕީޕީއެމްއަށް ޚިދުމަތް ކުރުމުގައި ހުންނެވި ނަމަވެސް، މީހާއާއިމެދު ސުވާލު އުފައްދައި ކަންކަން ކުރާނީ ޚިދުމަތް ގަބޫލު ނުކުރައްވާތީކަމަށް ދޭހަވާ މޭރުމަކުން ޝަހީމް ވަނީ ވާހަކަ ދައްކަވާފައެވެ.
ސިޔާސީ މައިދާނުގައި މިވަގުތު ހަރަކާތްތެރިވާ ބޭފުޅުންގެ ތެރެއިިން ރައްޔިތުންގެ ތާއީދު އޮތް ބޭފުޅުންގެ ތެރޭގައި ޑރ.ޝަހީމްވެސް ހިމެނި ވަޑައިގަންނަވައެވެ. ޕީޕީއެމްގެ ލީޑަރޝިޕްގެ ބައެއް ބޭފުޅުން ޕާޓީގެ ސެނެޓާއި، އެޑްވައިޒަރުންގެ ލަފައާއި ނުލައި އެކި ޕާޓީތަކާއި މަޝްވަރާކޮށް ކަންކަން ނިންމަމުންދާތީ ލީޑަރޝިޕްގައި އޮތީ ޚިޔާލް ތަފާތުވުން އުފެދިފައެވެ. ޕީޕީއެމްގެ ރިޔާސީ ކެނޑިޑޭޓް ރައީސް ޔާމީނަށް އިންތިޚާބުގައި ވާދަކުރުމުގެ ހުރުހާ ދޮރެއް ބަންދުވަމުންދާއިރުވެސް އެޕާޓީން ބުނަމުންދަނީ ކެނޑިޑޭޓަކީ ރައީސް ޔާމީންކަމަށެވެ.
One Response
ތިޔައީ ޑޮކްޓަރ ޝަހީމަށް އެކަނި ހެދިގޮތެއް ނޫނެވެ. ޑޮކްޓަރ ޖަމީލް، އަދީބް، ގާސިމް، މައުމޫނު، މިހެންގޮސް ޕީޕީއެމުން ދޯކާދިން ލިސްޓް ވަރަށް ދިގެވެ. މިހާރު ނަށަމުން މިދާ ސޮހޮލުތައްވެސް ހޫރާލާނީ ކޮން އިރަކުންކަން އެމީހުނަށްވެސް ނޭގޭނެއެވެ. މިއީ ބުނެވޭ ބަހަކުން، ބަލާލެވޭ ގޮތަކުން، ކުރެވޭ އިޝާރާތަކުން ހުކުން ކުރެވޭގޮތަށް ގާނޫނު ބަދަލުކުރި ޕާރޓީއެވެ.