ކުރިޔަށް އޮތް ރިޔާސީ އިންތިހާބަށް އެމްޑީޕީއާ އެކު ކޯލިޝަން ހަދާފައިވާ ޕާޓީތަކުގެ ލީޑަރުންނާ އެކު ރައީސް ސާލިހު ކުރެއްވި ފުރަތަމަ ކެމްޕޭން ދަތުރުފުޅު ނިންމަވާލައްވައިފިއެވެ.
ށ. އަތޮޅަށް ކުރެއްވި މިކެމްޕޭން ދަތުރު ނިންމަވާލެއްވުމަށްފަހު ރައީސް ސާލިހު އެނބުރި މާލެ ވަޑައިގެންނެވީ ރޭ މެންދަމުގެ ވަގުތެއްގައެވެ.
ރިޔާސީ އިންތިޚާބުގެ ކެމްޕޭން ލޯންޗު ކުރުމަށް ރައީސް ސާލިހު ރޭއް ކުރެއްވި ދަތުރުފުޅުގައި އެންމެ ފުރަތަމަ ވަޑައިގެންނެވީ ކޮމަންޑޫއަށެވެ. އެއަށްފަހު މަރޮށި، ނޫމަރާ އަދި ފޯކައިދޫއަށްވެސް ރައީސް ވަޑައިގެންނެވިއެވެ. މި 4 ރަށްވެސް ވަޑައިގެން ރައީސް ސާލިހުވަނީ އެމަނިކުފާނުގެ ރިޔާސަތުގައި މި ރަށްތަކަށް ކޮށްދެއްވާނެ ކަންކަމުގެ ވައުދުތައް ވެވަޑައިގެންފައެވެ.
މިގޮތުން ކޮމަންޑޫއަށް ވަޑައިގެން ރައީސް ސާލިހު ވިދާޅުވީ މި މަސް ނިމުމުގެ ކުރިން ދެ ކޮމަންޑޫ އާއި އެ ރަށާ ޖެހިގެން އޮތް މަތިކޮމަންޑޫ ގުޅާލާނެކަމުގައެވެ. އަދި ކޮމަންޑޫއާ ޖެހިގެން އޮތް ކުޑަފަރުގައި އެއާޕޯޓެއް އަޅުއްވާނެ ކަމަށް ވެސް ރައީސް ސާލިހު ވައުދުވެ ވަޑައިގަތެވެ.
ނޫމަރާއަށް ވަޑައިގެން، ރައީސް ވަނީ އެ ރަށް ކައިރީގައި އޮތް ނެޔޮ ކިޔާ ފަޅު ރަށް ކައުންސިލަށް ހޯއްދަވައި ދެއްވާނެކަމަށް ވައުދުވެވަޑައިގެންފައެވެ. އަދި ށ. މަރޮއްޓަށް ވަޑައިގެން އެރަށުގެ ބިން ހިއްކާ އަދި އެރަށުން ގޯތި ދެއްވާނެކަމަށްވެސް ރައީސް ސާލިހުވަނީ ވައުދުވެވަޑައިގެންފައެވެ.
މި ދަތުރުފުޅުގައި ރައީސް ސާލިހު އެންމެ ފަހުން ވަޑައިގެންނެވީ ށ. ފޯކައިދޫއަށެވެ. އަދި އެރަށުގައި ވަނީ ކެމްޕޭން ބޮޑު ޖަލްސާއެއް ބާއްވާފައެވެ. އެރަށުގެ ތަރައްގީގެ މަޝްރޫޢުތައް ފައްޓަވާ ދެއްވުމަށްފަހު، ރޭ އެރަށުގައި ބޭއްވި ޖަލްސާގައި ވާހަކަ ދައްކަވަމުން ރައީސް ވަނީ ފޯކައިދޫ މަގުތަކުގައި ތާރަ އަޅުއްވާ މަގުތައް ރަގަޅު ފެންވަރަށް ހައްދަވާ ދެއްވާނެކަމަށް ވައުދުވެވަޑައިގެންފައެވެ.
ކޮމެންޓު ފޮނުވާ