ރާއްޖެ ޓްރާންސްޕޯޓް ލިންކް، އާރްޓީއެލް ހައި ސްޕީޑް ފެރީގެ ޚިދުމަތް ހުވަދު އަތޮޅުގައި ފެށުމަށް ބޭނުންވާ ފެރީތައް ގދ. ތިނަދޫއަށް ގެންގޮސްފިއެވެ.
ހުވަދު އަތޮޅުގައި އާރުޓީއެލް ފެރީގެ ޚިދުމަތް އަންނަ ބުރާސްފަތި ދުވަހު ފަށާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީން ބުނެއެވެ.
އެމް.ޓީ.ސީ.ސީން ބުނީ ހުވަދޫ އަތޮޅުގައި މިމަހުގެ 13 ވަނަ ދުވަހު އާރުޓީއެލްގެ ޚިދުމަތް ފަށާއިރު އަގެއް ނުނަގާނެކަމަށާއި، ފުރަތަމަ ކުރިއަށްދާނީ އަޖުމަ ބެލުމުގެ ދަތުރުތައްކަމަށެވެ. އަދި އަގު ނަގައިގެން ރަސްމީކޮށް އާރުޓީއެލްގެ ޚިދުމަތް ދޭން ފެށުމަށް ހަމަޖެހިފައި ވަނީ މިމަހުގެ 20 ވަނަ ދުވަހުކަމަށްވެސް އެމް.ޓީ.ސީ.ސީން ބުނެއެވެ.
އެމް.ޓީ.ސީ.ސީގެ ސީ.އީ.އޯ އާދަމް އާޒިމް ވިދާޅުވީ، ހުވަދޫ އަތޮޅުގައި ދުއްވާ އާރުޓީއެލް ފެރީތައް އޮޕަރޭޓްކުރަން 80 މުވައްޒަފުން އެ އަތޮޅުން ނަގައިގެން ތަމްރީންކުރުމުގެ މަސައްކަތް މިހާރު ކުރިއަށް ދާކަމަށެވެ.
The wait is finally over! The much adored @RTLnetwork expands to the South! #TeamMTCC is buzzing to serve all our citizens at Huvadhoo Atoll! 📍💙 😊 https://t.co/4l9vuWSYUY
— MTCC Plc (@MTCCPlc) July 6, 2023
ހުވަދޫގައި އާރުޓީއެލް ޚިދުމަތް ފެށުމަށް 6 ފެރީ އެ އަތޮޅަށް ފޮނުވާފައިވާއިރު، ކުރިއަށް އޮތްތަނުގައި އިތުރު ފެރީތައް އެ އަތޮޅަށް ފޮނުވުމަށް ވަނީ ހަމަޖެހިފައެވެ. އެގޮތުން އާރުޓީއެލް ޚިދުމަތްދިނުމަށް 10 ފެރީއެއް އެއަތޮޅުގައި ހަރަކާތްތެރިވާނެއެވެ. މި ޚިދުމަތުގައި ބޭނުންކުރަމުންދަނީ ދުވެލި އަވަސް، ޒަމާނީ އަދި ރައްޔިތުންނަށްވެސް ފަސޭހަވާނެހެން ފަރުމާކޮށް ބަނދެފައިވާ ޚާއްސަ އުޅަނދުތަކެކެވެ.
ހުވަދުއަތޮޅަކީ އާރްޓީއެލް ފެރީގެ ޚިދުމަތް ފަށާ 5 ވަނަ އަތޮޅެވެ. މީގެކުރިން ހއ، ހދ، ށ އަދި ޅ އަތޮޅުގައި ވަނީ އާރުޓީއެލްގެ ޚިދުމަތް ފަށާފައެވެ. އަދި ސަރުކާރުގެ އަމާޒަކީ އަންނަ އަހަރުގެ ނިޔަލަށް ރާއްޖޭގެ ހުރިހާ ސަރަޙައްދެއްގައި އާރްޓީއެލް ފެރީގެ ޚިދުމަތް ފެށުމެވެ.
