"އިންޓަގްރޭޓެޑް ނެޝެނަލް ޕަބްލިކް ފެރީ ނެޓްވޯކް" ގެ ދަށުން ރާއްޖޭގެ ރަށްތައް ގުޅުވާލުމަށް ކުރިޔަށް ގެންދާ "ރާއްޖެ ޓްރާންސްޕޯޓް ލިންކް" (އާރުޓީއެލް)ގެ ޚިދުމަތްތައް އަންނަ ބުރާސްފަތި ދުވަހު ހުވަދު އަތޮޅަށް ތައާރަފް ކުރުމަށް ހަމަޖެހިފައިވާކަމަށް އެމްޓީސީސީން ބުނެފިއެވެ.
ރާއްޖޭގަ އޮތް އެންމެ ބޮޑު އަތޮޅު ކަމަށްވާ ހުވަދު އަތޮޅުގައި މި ޚިދުމަތް ފެށުމަށްޓަކާ، ހައި ސްޕީޑް ލޯންޏެއް މިއަދުވަނީ ހުވަދު އަތޮޅަށް ފުރާފައެވެ. ޚިދުމަތް ފެށުމަށް ހުވަދު އަޮތޮޅުގައި ބޭއްވުމަށް ހަމަޖެހިފައިވާ ރަސްމިއްޔާތުގައި އެމްޓީސީސީގެ އިސްވެރިން ބައިވެރިވެވަޑައިގަންނަވާނެއެވެ.
ހުވަދު އަތޮޅުގައި ފަށަން ހަމަޖެހިފައިވާ ޚިދުމަތާ ގުޅޭގޮތުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ޚިދުމަތް ފަށާއިރު، އަޖުމަބަލާލުމުގެ ގޮތުން ފުރަތަމަށް ޚިދުމަތް ދިނުމަށް ހަމަޖެހިފައިވަނީ ހިލޭ ކަމަށެވެ. މިގޮތުން ޓިކެޓް ވިއްކައިގެން ދަތުރުތަށް ފެށުމަށް ހަމަޖެހިފައިވަނީ މިމަހުގެ 20 ވަނަ ދުވަހުން ފެށިގެން ކަމަށްވެސް އާޒިމް ވިދާޅުވެފައި ވެއެވެ.
އާޒިމް ވިދާޅުވީ ޚިދުމަތް ފަށައިގަންނައިރު ހައި ސްޕީޑް ފެރީއަކުން ޚިދުމަތް ފަށައިގަތް ނަމަވެސް، ކުރިޔަށް އޮތް ތަނުގައި އިތުރު ފެރީއެއް ޚިދުމަތަށް ނެރުމަށް ވަނީ ހަމަޖެހިފައެވެ. ހަމައެއާއެކު އަންނަމަހު އާޓީއެލްގެ ޚިދުމަތުން ހުވަދޫ، އައްޑޫ އަދި ފުވައްމުލަށް ގުޅުވާލުމަށް ހަމަޖެހިފައިވާކަމަށްވެސް އާޒިމް ވިދާޅުވިއެވެ.
އާރުޓިއެލްގެ ޚިދުމަތް ހުވަދޫ އަތޮޅުގައި ފަށާއިރު، އޮންލައިން އެޕްލިކޭޝަން ބޭނުންކުރަން ނޭގޭ ފަރާތްތަކުން އެމްޓީސީސީގެ 1650އަށް ގުޅުމުން އެހީތެރިކަން ފޯރުކޮށްދޭގޮތަށްވެސް ވަނީ ހަމަޖައްސާފައެވެ.
ރާއްޖޭގެ ސަރަހައްދުތަކަށް އާރުޓީއެލްގެ ޚިދުމަތްތައް ފުޅާވަމުން ދާއިރި، ޚިދުމަތް ހޯދާ ފަރާތްތަކުން ސާފުތާހިރުކަމަށް ސަމާލުކަން ދިނުމަށްވެސް އާޒިމްވަނީ ގޮވާލައްވާފައެވެ. ރާއްޖޭގެ ރަށްތައް ހައި ސްޕީން ފެރީން ގުޅާލުމަށް މި ސަރުކާރުން ކުރިޔަށްގެންދާ ސިޔާސަތުގެ ތެރެެއިން ހއ. ހދ. ށ. އަދި ޅ. އަތޮޅުގެ ރަށްތައް މިހާރުވަނީ މިޚިދުމަތުން ގުޅާލާފައެވެ.
