އިދިކޮޅު ޕްރޮގްރެސިވް ކޯލިޝަނުން ކުރިއަށް އޮތް ރިޔާސީ އިންތިޚާބުގައި ވާދަކުރާ ކެނޑިޑޭޓަކީ ރައީސް ޔާމީން ކަމަށާއި، އެނިންމުމަށް ކޮންމެ ބޭފުޅަކު ވަކާލާތު ކުރައްވައި، ވާހަކަ ދެއްކި ނަމަވެސް އެކަން ބަދަލު ނުވާނެކަމަށް އިދިކޮޅު ޕީޕީއެމްއާއި، ޕީއެންސީގެ ވެރިން ބުނެފިއެވެ.
އެންމެ ރަނގަޅުގޮތަކީ ކުރިއަށް އޮތް ރިޔާސީ އިންތިޚާބުގައި އެމަނިފާނާއި، ކުރީގެ ރައީސް ޔާމީންވެސް ކުރިމަތިނުލައްވައި މަޑުކުރެއްވުންކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ ވިދާޅުވެފައެވެ. ދަ ޑިމޮކްރެޓްސް އުފެއްދުމަށް ޣިޔާސުއްދީން އިންޓަރނޭޝަނަލް ސްކޫލް ހޯލްގައި ބޭއްވި ޖަލްސާގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވީ، އެމަނިކުފާނަށް ފެނިވަޑައިގަންނަވާގޮތުގައި އެންމެ ރަނގަޅުގޮތަކީ ކުރިއަށް އޮތް ރިޔާސީ އިންތިޚާބަށް އެމަނިކުފާނާއި، ރައީސް ޔާމީންވެސް ވާދަނުކުރައްވައި، އޭގެ ބަދަލުގައި ދެބޭފުޅުންވެސް އެކުގައި ބާރަށް މަސައްކަތްކޮށްގެން ރާއްޖޭގެ ރައްޔިތުން އެދޭގޮތް ހޯދައިދެއްވުންކަމަށެވެ.
އަޅުގަނޑަށް ފެންނަ ފެނުމުގައި މިރިޔާސީ އިންތިޚާބަށް އަޅުގަނޑުމެން ދެމީހުންވެސް ކުރިމަތިނުލައި، އަޅުގަނޑުމެން ދެމީހުން އެކުގައި ބާރަށް މަސައްކަތްކޮށްގެން ރާއްޖޭގެ ރައްޔިތުން މިއެދޭ ގޮތް ހޯދައިދޭންވީ.
– ރައީސް ނަޝީދު ވިދާޅުވިއެވެ.
ނަޝީދުގެ މިވާހަތަކާއި ގުޅިގެން މަދު ވަގުތުތަކުގައި ޕީޕީއެމް/ޕީއެންސީގެ މުޅި ލިޑާޝިޕް ވަނީ ރައީސް ނަޝީދަށް މިކަމުގައި އެބޭފުޅުން ޢަމަލު ކުރައްވައި ޚިޔާލު ހުރިގޮތް ހިއްސާ ކުރައްވާފައެވެ. ނަޝީދުގެ ވާހަކަ ތަކާއި ގުޅިގެން ޕްރޮގްރެސިވް ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވި މިއަދު މިޤައުމަށް ދިމާވެފައިވާ ހުރިހާ މައްސަލައަކުން ހައްލު ހޯދާ ދެވޭނެ ހަމައެކަނި ކެނޑިޑޭޓަކީ ރައީސް ޔާމީންކަމަށެވެ. ރައީސް ޔާމީން ރިޔާސީ އިންތިޚާބުގައި ވާދަކުރާނެކަމަށާއި، އެކަމަށް އެދޭ ރައްޔިތުން އިންތިހާއަށް ގިނަ ކަމަށް އަދުރޭ ވިދާޅުވިއެވެ.
އިރާދަ ކުރެއްވިއްޔާ ރައީސް ޔާމީން މިއަހަރުގެ ރިޔާސީ އިންތިޚާބުގައި ވާދަ ކުރައްވާނެ. ރައްޔިތުން ބޭނުންވާ ރަނގަޅުގޮތް ހޯދައި ދެވޭނެކަމަށް ރައްޔިތުން ގަބޫލުކުރަނީ ރައީސް ޔާމީން ރާއްޖޭގެ ޒަޢާމަތާ ޙަވާލުވެގެން. އެ ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަކަށް ރައްޔިތުން މިއަދަކު ގަބޫލެއް ނުކުރޭ.
– އަދުރޭ ވިދާޅުވިއެވެ.
ޕީޕީއެމްގެ ނައިބް ރައީސް އަދިރޭގެ ޖަލްސާއަށް ވަޑައިގެން ޖަލްސާގެ ކުރީ ސަފުގައި އިންނެވި ޝިޔާމް ވިދާޅުވީ ރިޔާސީ ކެނޑިޑޭޓުންގެ ލިސްޓުގައި ޑިމޮކްރެޓްސް އުޅެނީ އަދި މާފަހަތުގައި ކަމަށެވެ. ޕީޕީއެމްއިން ވަނީ ރިޔާސީ ކެނޑިޑެޓަކު ދައްކަވައި ކެމްޕެއިންވެސް ފަށާފައިކަމަށެވެ.
ރައީސް ނަޝީދު އެ ވިދާޅުވީީ އެމަނިކުފާނުގެ ވިސްނުންފުޅު. މި އިންތިޚާބުގައި ރައީސް ނަޝީދު އަދި ޑިމޮކްރެޓްސް އުޅުއްވަނީ ތަންކޮޅެއް ފަހަތުގައި. އަދި އެބޭފުޅުން ކެނޑިޑޭޓެއްވެސް ނުދައްކަވާ. ޕީޕީއެމް، ޕީއެންސީ އިން މާކުރިން ވަނީ ރައީސސް ޔާމީން ކެނޑިޑޭޓުގެ ގޮތުގައި ނިންމާ ކެމްޕެއިން ވެސް ފަށާފަ.
– ޝިޔާމް ވިދާޅުވިއެވެ.
ޑިމޮކްރެޓްސްއާއިއެކު މިހާރު ކުރިއަށްދާ މަޝްވަރާ ތަކުގައި ބައިވެރިވާ އަހުމަދު ތޯރިގުވެސް ވިދާޅުވީ ރައީސް އިބްރާހިމް މުހައްމަދު ޞާލިހު ބަލިކުރެވޭނެ ފޯމިއުލާއަކީ ރައީސް ޔާމީން ރިޔާސީ ރޭހުގައި ވާދަ ކުރެއްވުންކަމަށެވެ.
އެއް ކެނޑިޑޭޓް ފޯމިލާ އެބައޮތެވެ. އެއީ އެއްބުރުން އިބޫ ނޫންގޮތެއް ހޯދުމުގެ ފޯމިއުލާއެވެ. ޔަޤީންކަމާއެކު ވެރިކަން ބަދަލުކުރާނެ ގޮތެވެ. އެންމެން އިއްތިފާޤުވާ ޚިދުމަތްތެރި ލީޑަރު، ރައީސް ޔާމިނަށް ޑިމޮކްރެޓްސް ތާއިދުކޮށް، ދިވެހީންގެ ރާއްޖެ، ދިވެހިންނަށް ހޯދުމެވެ.
– ޓޮމް ވިދާޅުވިއެވެ.
ނަޝީދުގެ ވާހަތަކަށް ރައްދު ދެއްވައި އާދަމް ޝަރީފް ވިދާޅުވީ މިވަގުތު ޤައުމުގައި ހުރި މައްސަލަތަކަށް ހައްލު ހޯދައި ދެވޭނެ ހަމައެކަނި ކެނޑިޑޭޓަކީ ރައީސް ޔާމީންކަމަށެވެ. ރައީސް ޞާލިހު ބަލި ކުރުމަށް އޮތް އެންމެ ރަނގަޅު ގޮތަކީ ރައީސް ނަޝީދުވެސް ވާދަ ކުރުންކަމަށް އާދަމް ޝަރީފް ވިދާޅުވިއެވެ.
ޤައުމުގައި ހުރި މައްސަލަތައް ހައްލުކޮށް، ޤައުމުގެ މިނިވަންކަން ދިފާއުކޮށް، އިސްލާމީ ޚަލޯރާތް ދިވެހި ސަޤާފަތް ދިރުވައު، މުންކަރާތްތަކާއި ދެކޮޅަށް، ޤާނޫނީ ވެރިކަމެއް އެންމެ ޤާބިލް އަދި ރައްޔިތުންގެ އުންމީދުތަކާއި ގުޅިފައިވާ ލީޑަރަކީ ޕީޕީއެމްގެ ކެނޑިޑޭޓް ރައީސް ޔާމީން. ރައީސް ޔާމީން ވާދަ ކުރައްވައި އިބޫ ބަލިކުރާނެ. އިބު ބަލި ކުރުމަށް އެންމެ ރަނގަޅު ހިންތާއަކަށް ވާނީ ރައީސް ނަޝީދުވެސް ވާދަކުރެއްވުން.
– އާދަމް ޝަރީފް ވިދާޅުވިއެވެ.
އާދަމް ޝަރީފްގެ އިތުރުން އިދިކޮޅު ކޯލިޝަންގެ ހަރަކާތު ކޮމެޓީގެ ޗެއާ މުހައްމަދު އިސްމާއިލް ވިދާޅުވީ ރައީސް ނަޝީދު އިންތިޚާބުގައި ވާދަ ނުކުރެއްވުމަކީ ރައީސް ނަޝީދުގެ އަމިއްލަ ނިންމުމެއް ކަމަށެވެ. ރައީސް ޔާމީން އިންތިޚާބުގައި ވާދަ ކުރެއްވުމަށް ނިންމެވީ ރައްޔިތުން ކަމަށާއި، އެމަނިކުފާނު ފަހަތަށް ޖެހެންޖެހޭ ސަބަބެއް ނެތްކަމަށެވެ.
ނަޝީދު އިސްކޮށް ހުންނަވައި ޕާޓީ އުފެއްދުމަށް ބޭއްވި ޖަލްސާގައި ޕީޕީއެމްގެ ނައިބު ރައީސް އަހުމަދު ޝިޔާމާއި އެހެން ވެސް އިސް ބައެއް ބޭފުޅުން ބައިވެރިވެވަޑައިގަތެވެ. އޭގެއިތުރުން އެމްއެންޕީގެ ރައީސް މުހައްމަދު ނާޒިމާއި އެމްއާރްއެމްގެ ނައިބު ރައީސް ނާދިރާ ހަސަން އަދި ޖުމްހޫރީ ޕާޓީގެ ފަރާތުން ރިޔާޒު ރަޝީދު ވެސް ބައިވެރިވެވަޑައިގަތެވެ.
ނަޝީދު މިމޭރުމުން ވާހަކަފުޅު ދެއްކެވި އިރު ޕީޕީއެމް/ޕީއެންސީން އަބަދުވެސް ބުނަމުން އަންނަނީ އެދެޕާޓީގެ ރިޔާސީ ކެންޑިޑޭޓަކީ ޔާމީން ކަމަށާއި އެކަން ބަދަލެއް ނުވާނެ ކަމަށެވެ. އެހެން ނަމަވެސް އެމްއެމްޕީއާރްސީގެ ބޮޑު ހިޔާނާތުގެ ތެރޭގައި ހިމެނޭ މުއާމަލާތަކާ ގުޅިގެން، މަނީ ލޯންޑްރިންއާއި ރިޝްވަތުގެ ކުށް ސާބިތުވެފައި ވާތީ ޔާމީނަށް 11 އަހަރުގެ ޖަލު ހުކުމެއް އިއްވާފައި އެބަ އޮތެވެ. ރިޔާސީ އިންތިހާބުގައި އެމަނިކުފާނަށް ވާދަކުރެއްވޭނީ ، ބެލެވޭ ގޮތުގައި، ހައިކޯޓުން އެހުކުމް ބާތިލުކޮށްފި ނަމައެވެ.
