ވ. އާރަށް ކުއްޔަށް ދިނުމުގައި ރިޝްވަތު ނަގާ އަދި މަނީ ލޯންޑަރ ކުރިކަމުގެ ތުހުމަތުގައި، ދަށުކޯޓުން ކޮށްފައިވާ ހުކުމްގެ އިސްތިއުނާފުގެ މަރުހަލާގައި، ޔާމިންގެ ދިފާއުގައި ދޮގުހެކި ދީފައިވާކަމަށް ދަށުކޯޓުން ނިންމާފައިވަނީ ރަގަޅަށް ކަމަށް ދައުތަކުން މިއަދު ހައި ކޯޓުގައި ބުނެފިއެވެ.
މިއަދު ކުރިޔަށްދިޔަ ހައި ކޯޓުގެ ޝަރީއަތުގައި ދައުލަތުގެ ވަކީލުން ވިދާޅުވެފައިވަނީ، ޔާމިން ކޮށްފައިވަނީ ޑޮލަރު ގަތުމުގެ މުއާމަލާތެއް ކަމަށް ބުނެ ޔާމީންގެ ފަރާތުން ހުށަހެޅުއްވި ދިފާއީ ހެކިންގެ ހެކިބަހަށް ބުރަދަން ނުދޭން ކްރިމިނަލް ކޯޓުން ނިންމާފައިވަނީ ރަނގަޅަށް ކަމަށެވެ. އޭގެ އެއް ސަބަބެއްގެ ގޮތުގައި ދައުލަތުގެ ވަކީލުން ފާހަގަ ކޮށްފައިވަނީ ހެކިވެރިން ހެކިބަސް ދެމުން ދިޔައިރު، ދައުލަތުން ކުރި ސުވާލުތަކަށް އެކަށީގެންވާ ގޮތުގައި ޖަވާބު ދެވިފައި ނުވާއިރު، އޭގެ އިތުރުންވެސް އެތައްކަމެއް ކިޔައިދޭން ހެކިވެރިންނަށް އެނގިފައި ނުވާ ކަމުގައެވެ.
އަދި ދައުލަތުން ބުނެފައިވަނީ ޝަރީއަތުގައި އެއީ ޑޮލަރު ގަތުމުގެ މުއާމަލާތެއްކަށް ޔާމިން ވިދާޅުވެ، ހެކިން އެމަގުން ހެކިބަސް ދީފައިވި ނަމަވެސް، ކޮށްފައިވަނީ ޑޮލަރު ގަތުމުގެ މުއާމަލާތެއްކަމަށް ތަހުގީގުގެ މަރުހަލާގައި ޔާމިން އެކަން އެއްވެސް ވަރަކަށް ފާހަގަ ކޮށްފައި ނުވާކަމުގައެވެ.
މިގޮތުން އެމީހަކާއި އެއްކޮޅަށް ހުންނަ ހެކިތައް ތަހުގީގުގެ މަރުހަލާގައި ފާހަގަކުރަން ޖެހޭނަކަމަށް ޖިނާއީ އިޖުރާތުގެ ގާނޫނުގައި ބުނާކަމަށްވެސް ދައުލަތުގެ ވަކީލުން ފާހަގަ ކޮށްފައި ވެއެވެ.
ވ. އާރަށް ކުއްޔަށް ދީގެން ޔާމިންގެ އެކައުންޓަށް ޖަމާކުރި ފައިސާއަކީ ޑޮލަރުގެ މުއާމަލާތެއްކަމަށް ވިދާޅުވުމަކީ ޔާމިންގެ ވަކީލުން އެ މައްސަލާގައި ބޭނުންކުރި އެންމެ ވަރުގަދަ ދިފާޢެވެ.
އެހެންނަމަވެސް ދިފާއީ ބައެއް ވަކީލުން ގިނަ އަދަދެއްގެ ދިވެހި ފައިސާ އަތުން ގުނިކަމަށް ބުނެ ހެކިބަސް ދިންއިރު، އެހާ ގިނަ އަދަދެއްގެ ފައިސާ އަތުން ގުނުން އެއީ އެކަށީގެންވާ ކަމެއް ނޫންކަން ޝަރީއަތުގެ މަރުހަލާގައި ފާހަގަ ވެގެންދިޔައެވެ. އަދި ބައެއް ހެކިވެރިންނަށްވަނީ ފައިސާ ގުނާފައިވަނީ ދުވާލުކަމެއް ނުވަތަ ރޭގަޑުކަމަށްވެސް ބުނެދޭން ނޭގިފައެވެ.
މިއަދު ކުރިޔަށްދިޔަ އިސްތިއުނާފްގެ އަޑު އެހުމުގައި ދައުލަތުން ބުނެފައިވަނީ ޔޫސުފް ނައީމްގެ ފަރާތުން ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ސިޔާސީ ކަންކަމަށް ލިބުނު ފައިސާ ކަމަށް ބޭންކަށް ޔާމީނު އެންގި ނަމަވެސް، މާލީ ބަޔާންތަކުގައި ޔޫސުފް ނައީމްގެ ފަރާތުން އެފަދަ ފައިސާއެއް ލިބިވަޑައިގަތް ކަމަށް ބުނެފައި ނެތް ކަމުގައެވެ.
އަދި ދައުލަތުން އެދިފައިވަނީ ޔާމިންގެ މައްޗަށް ދަށުކޯޓުން ކޮށްފައިވާ ހުކުމް ދެމެހެއްޓުމަށެވެ.
މިހާރު ކުރިޔަށްދާ އިސްތިއުނާފްގެ މަރުހަލާގައި ދެން ކުރިޔަށް ދާނީ ދައުލަތުން ފާހަގަ ކުރި ކަންކަމަށް ރައްދުދީ ދިފާއީ ވަކީލުން ވާހަކަ ދެއްކުމެވެ.
ޔާމިންގެ އިސްތިއުނާފްގެ މައްސަލަ ބައްލަވަނީ ފަނޑިޔާރު ހުޒައިފާ މުހައްމަދާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރު މުހައްމަދު ސަލީމެވެ. ރިޔާސަތަކީ ފަނޑިޔާރު ހުޒައިފާ އެވެ.
ދަށުކޯޓުން ޔާމިންގެ މައްޗަށް އިއްވާފައިވާ 11 އަަހަރުގެ ޖަލު ހުކުމާއެކު، ކުރިޔަށް އޮތް ރިޔާސީ އިންތިޚާބުގައި ވާދަކުރުމުގެ ފުރުސަތު ޔާމިނަށް ވަނީ ގެއްލިފައެވެ. އެހެންނަމަވެސް ޔާމިންގެ ވަކީލުން ވިދާޅުވަމުން ގެންދަވަނީ ރިޔާސީ އިންތިޚާބުގައި ވާދަކުރުމުގެ ފުރުސަތު ޔާމިނަށް އޮއްވާ ހައިކޯޓުން މައްސަލަ ނިމިގެންދާނެ ކަމުގައެވެ.
ކުރިޔަށް އޮތް ރިޔާސީ އިންތިޚާބުގައި ވާދަކުރާ ފަރާތްތަކުން ފޯމު ހުށަހެޅުމަށް ހުޅުވާލާނީ މިމަހުގެ 23 ވަނަ ދުވަހުއެވެ.
One Response
ބަޔަކު ހުދުކާފޫރަށް ހަދަން އުޅުނަސް މިގައުމުގެ އެންމެންނަށް ވެސް ޔާމީނު ޑީލްތަކުން ކަމިޝަން ނެގިކަމާއި މަނީ ލޯންޑަރ ކުރިކަން ޝައްކެތްނެތި އެގެއެވެ. އަދި އެފައިސާތަކުން ގަތް ގަޑުވަރު ހަދަމުންދާ ކަމާއި ބާކީ ފައިސާ މިލިޔަނުން އެކައުންޓްތަކުގައި އެބަހުރިކަން އެހެރީ ފެންނާށެވެ. ވީމާ މިތަންތަނާއި ފައިސާއަކީ ދިވެހި ރައްޔިތުންގެ ފައިސާކަމާއި ދިވެހި ދައުލަތުގެ މި މިލްކިއްޔާތު އަބުރާ ހަވާލުކޮށްފައި ދެން މިނިވަންވާން މަސައްކަތް ކުރާށެވެ. ބަތާ ހަރާމީ ވުމުގައި ވެސް ހައްދެއް އޮންނަން ވާނެއެވެ.