ރ.ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގައި ކުރީގެ ރައީސް ޔާމީނާއި، ކްރިކް ރިޒާގެ އިތުރުން 2 ކުންފުންޏެއްގެ މައްޗަށް އުފުލާފައިވާ ދައުވާގެ މިއަދުގެ އަޑުއެހުންވެސް ކެންސަލްވެއްޖެއެވެ.
މިއީ މިމައްސަލަައިގެ ޝަރީއަތް ޖެހިޖެހިގެން ކެންސަލްކުރި 4 ވަނަ ދުވަހެވެ.
މި މައްސަލައިގައި އީދު ބަންދުގެ ކުރިންވެސް އަޑުއެހުންތަކެއް ތާވަލުކޮށްފައިވެއެވެ. އެ އަޑުއެހުންތައް ކެންސަލްވެފައިވަނީ ދައުވާލިބޭ ކްރިކް ރިޒާ ބަލިވެ އުޅޭކަމަށް ކޯޓަށް އެންގުމާއި ގުޅިގެންނެވެ. މިއަދުގެ އަޑުއެހުންވެސް ކެންސަލް ކޮށްފައިވަނީ ދައުވާ ލިބޭ އަހުމަދު ކުރިކު ރިޒާ ބަލިވެ އުޅޭތީ ކޯޓަށް ހާޒިރު ނުވެވިގެންނެވެ.
ކޯޓުން މީގެ ކުރިން ބުނެފައިވަނީ، ކުރިކު ރިޒާ ބަލިވެ އުޅޭކަމުގެ ލިއެކިއުންތައް ކޯޓަށް ހުށައަޅާފައިވާކަމަށެވެ. މި މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް އެވިޑެންސް އެގްޒެމިނަރެއްގެ ގޮތުގައި މަސައްކަތް ކުރައްވަމުން ގެންދަވާ ފަރާތެއްގެ ހެކިބަހާއި، މި މައްސަލައާ ގުޅިގެން ކިތާބީ ހެކީގެ ގޮތުގައި ހުށައަޅާފައިވާ ފިންގަރ ޕްރިންޓް އެނާލިސިސް ރިޕޯޓާއި ގުޅިގެން ޚަބީރެއްގެ ގޮތުގައި ހާޒިރު ކުރެއްވި ފަރާތުގެ ހެކިބަސް ނަގާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
