އިދިކޮޅު ޕީޕީއެމްއިން ނަޝީދުގެ ޑިމޮކްރެޓްސްއާއެކު މަޝްވަރާ ކުރަމުންދަނީ ކުރިޔަށް އޮތް ރިޔާސީ އިންތިޚާބާ ގުޅޭގޮތުން ނޫންކަމަށާއި، މަޝްވަރާ ކުރަމުންދަނީ ގައުމީ އެހެން މައްސަލަތަކާއި ގުޅޭގޮތުން ކަމުގައި ޕީއެންސީގެ ރައީސް އަދި ޕީޕީއެމް ހިންގުމާއި ހަވާލުވެ ހުންނެވި އަބުދުއްރަހީމް ވިދާޅުވެއްޖެއެވެ.
އަބުދުއްރަހީމް މިހެން ވިދާޅުވީ، ރައީސް ޔާމިންގެ ދޮރުން ދޮރަށް ކެމްޕޭން މިއަދު މާލޭގައި ފެށުމުގެ ގޮތުން ނޫސްވެރިންނަށް މައުލޫމާތު ދެއްވަމުންނެވެ.
ކުރިޔަށް އޮތް ރިޔާސީ އިންތިޚާބާ ގުޅޭގޮތުން ޑިމޮކްރެޓްސް ޕާޓީއާއެކު މަޝްވަރާ ކުރަމުން ނުދާކަމަށް އަދުރޭ ވިދާޅުވިނަމަވެސް، ކުރިޔަށްދާ މަޝްވަރާތަކަށްފަހު، މަޝްވަރާތަކުގައި ބައިވެރިވި ދެޕާޓީގެ އޮފިޝަލުންވެސް ވިދާޅުވެފައިވަނީ، މަޝްވަރާ ކުރަމުންދަނީ ކުރިޔަށް އޮތް ރިޔާސީ އިންތިޚާބުގައި އެކީގައި މަސައްކަތް ކުރެވޭނެ ގޮތެއް ހޯދުމަށް ކަމަށާއި، ރައީސް ސާލިހުގެ ވެރިކަން ނިމުމަކަށް ގެނައުމަށް ކަމުގައެވެ.
އެހެންނަަމަވެސް، ވަހަކަތަކުގައި ބައިވެރިވަމުންދާ އޮފިޝަލުންގެ ވާހަކަތައް ދޮގު ކުރައްވަމުން އަދުރޭ ވިދާޅުވީ، ދެޕާޓީން ބާއްވަމުންދާ ސިޔާސީ ވާހަތަކުގައި މަޝްވަރާ ކުރަމުންދަނީ ރިޔާސީ އިންތިޚާބާ ގުޅޭގޮތުން ނޫންކަމަށާއި، ހައްލު ހޯދުމަށް ވާހަކަ ދައްކަމުން ދަނީ ގައުމީ އެހެން މައްސަލަތަކާއި ގުޅޭގޮތުން ކަމަށެވެ.
އަޅުގަޑުމެން ޑިމޮކްރެޓްސްއާ އެއްކޮށްވެސް އަދި އެހެން ޕާޓީތަކާ އެއްކޮށްވެސް މި ވާހަކަ ދައްކަނީ ރިޔާސީ އިންތިޚާބާ ގުޅޭގޮތުންނެއް ނޫން. އަޅުގަޑުމެން މި ވާހަކަ ދައްކަނީ ގައުމީ ބޮޑެތި މައްސަލަތަކާ ގުޅޭގޮތުން. ރައީސް ޔާމިން ޖަލުގަ އޮންނަވައިގެން އަޅުގަޑުމެންނަށް ލަފާ ދެއްވަނީ، އިރުޝާދު ދެއްވަނީ ގައުމުގަ ހުރި ބޮޑެތި މައްސަލަތަކާ ގުޅޭގޮތުން އަޅުގަޑުމެންނާ އެކީގަ މަސައްކަތް ކުރަން ތިބި ބަޔަކާ އެއްކޮށް މަސައްކަތް ކުރާށޭ. އެ މަސައްކަތް މިކުރަނީ.
މިއަދު ނޫސްވެރިންނަށް މައުލޫމާތު ދެއްވަމުން އަބުދުއްރަހީމް ވިދާޅުވިއެވެ.
ރިޔާސީ އިންތިޚާބާ ގުޅޭ މަޝްވަރާތައް ދިމޮކްރެޓްސްއާއެއްކޮށް ނުކުރާކަމަށް އަބުދުއްރަހީމް ވިދާޅުވި ނަމަވެސް، ދެޕާޓީން ގުޅިގެން ބޭއްވި މަޝްވަރާތަކަށްފަހު، ނޫސްވެރިންނަށް މައުލޫމާތު ދެއްވަމުން ދެ ޕާޓީންވެސް ބުނެފައިވަނީ މަޝްވަރާތައް ކުރިޔަށް ގެންގޮސްފައިވަނީ ރިޔާސީ އިންތިޚާބުގައި އެކީގައި މަސައްކަތް ކުރެވޭނެ މަގެއް ހޯދުމަށް ކަމަށާއި، އަދި އަމާޒަކީ ރައީސް ސާލިހުގެ ވެރިކަން ބަދަލުކުރުން ކަމުގައެވެ.
ޑިމޮކްރެޓުން މި ބުނަނީ ތިމަންނަމެންގެ ކެނޑިޑޭޓޭ ނެރޭނީ. ޕީޕީއެމްއިން މި ބުނަނީ ކެނޑިޑޭޓެއް އެހެރީއޭ. ދެން އިބުރާހިމް މުހައްމަދު ސާލިހު ޖެހޭތަ ނޫސްވެރިން ކައިރީ ބުނަން ކޮބާހޭ ކެނޑިޑޭޓު.
އިއްޔެ ކުރިޔަށްދިޔަ މަޝްވަރާތަކަށްފަހު ޕީއެންސީގެ ނާއިބު ރައީސް އިބުރާހިމް ޝުޖާ ނޫސްވެރިންނަށް މައުލޫމާތު ދެއްވަމުން ވިދާޅުވިއެވެ.
އަބުދުއްރައްހީމްއަކީ، ދެޕާޓީގެ މެދުގައި ކުރިޔަށްދާ މަޝްވަރާތަކުގައި މިހާތަރަށް ބައިވެރިވެވަޑައިގެންނެވި އޮފިޝަލެއް ނޫނެނެވެ. އަދި ޕީޕީއެމްގެ ސެނެޓްގެ މެމްބަރުންގެ މެދުގައި ވަރަށް ބޮޑަށް ޚިޔާލު ތަފާތުވެފައިވާ މިމަޝްވަރާތަކަކީ ރިޔާސީ އިންތިޚާބާ ގުޅޭ މަޝްވަރާތަކެއް ނޫންކަމަށް އަބުދުއްރަހީމް ވިދާޅުވީ ކުރިޔަށްދާ މަޝްވަރާތަކާއި ގުޅޭގޮތުން އޮތް ހިންހަމަ ނުޖެހުމެއްގެ ސަބަބުންކަމެއް ސާފުވެފައެއް ނުވެއެވެ.
One Response
އެގަހު ކޭލެއް މިގަހު ކޭލެއް ނޭގުނެވެ. އަދުރޭ ދައްކާ ވާހަކައަކާ ސުޖާ އަކާއި ދިމަލެއް ނުވެއެވެ. އަދުރޭގެ ވާހަކައިން ވާހަކައެއް ދައްކާ ކަމަކަށްވެސް ނުވެއެވެ. ސުޖާއާއި އަމުރު މިތިބީ ނެރޭނެ ކެންޑިޑޭޓެއްވެސް އެއްބަސްވެގެން ކަހަލައެވެ. އެކަން ދެނެހުރި ކަމެއް އަދުރޭގެ ވާހަކައަކުން ނޭގުނެވެ. މުއިއްޒު މިހުންނަނީ ހީލަހީލަ އެވެ.