މުސާރައަށް އައި ހެޔޮ ބަދަލާއިއެކު ގިނަ އަދަދެއްގެ ޓީޗަރުން ތަޢުލީމީ ދާއިރާއާއި ގުޅެމުންދާކަމަށް އެޑިޔުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން ހާމަކޮށްފައިވާ ގޮތުގައި މިސަރުކާރުން ޓީޗަރުންގެ މުސާރައަށް ގެނެސްދިން ހެޔޮ ބަދަލާއިއެކު ދާއިރާ ދޫކޮށް އެހެނިހެން ދާއިރާގައި މަސައްކަތްކުރި ގިނަ އަދަދެއްގެ ޓީޗަރުން އަލުން ދާއިރާއާއި ގުޅެމުންދާ ކަމަށާއި، އެކަން އަތޮޅުތެރޭގެ ސްކޫލުތަކުން ވަރަށް ބޮޑަށް ފާހަގަވާކަމަށް ބުނެފައިވެއެވެ.
އެގޮތުން ސާނަވީ ތަައުލީމު ނިންމައި ނުކުންނަ ގިނަ އަދަދެއްގެ ކުދިންވެސް ޓީޗިންގ ދާއިރާއަށް ގުޅެން ބޭނުންވެ، ދާއިރާއިން ކޯސް ހެދުމަށް ޝައުގުވެރިކަން ފާޅުކުރާ ކުދިންގެ އަދަދު ގިނަ ކަމަށާއި، އަދި މިހާރުވެސް މިދާއިރާއިން ގިނަ އަދަދެއްގެ ދަރިވަރުން ކޯސް ފުރިހަމަކުރަމުންދާކަން އެޑިއުކޭޝަން މިނިސްޓްރީއިން ފާހަގަކޮށްފައިވެއެވެ.
މިދިޔަ އަހަރު ތަފާސްހިސާބުތައް ބަލާއިރު، ބޭރުން ރާއްޖެއަށް ގެނައި ޓީޗަރުންގެ އަދަދު އުޅެނީ ގާތްގަނޑަކަށް 1900ގައެވެ. ނަމަވެސް މީގެ ކުރީ އަހަރުތަކުގައި އެ އަދަދު 2000 ށްވުރެ މަތިކަމަށް އެޑިއުކޭޝަނުން ބުނެއެވެ.
މުސާރައަށް އައި ބަދަލާއެކު ގިނަ އަދަދެއްގެ ޓީޗަރުން ދާއިރާއާ ގުޅެމުންދާއިރު، ޓީޗަރުންގެ މުސާރައަށް ބަދަލު ގެނެސްފައިވަނީ، 5 ރޭންކަކަށް ބަހާލައިގެންނެވެ. އޭގެ ތެރެއިން ޑިޕްލޮމާ ފެންވަރުގެ ޓީޗަރެއްގެ މުސާރަ 10،000 ން 13،000 ށް އިތުރުވެގެންދާއިރު، ޑިގްރީ ފެންވަރުގެ ޓީޗަރުންގެ މުސާރަ 13،000 ން 19،000 ށް ބޮޑުވެގެންދެއެވެ. މާސްޓަރސް ފެންވަރުގެ ޓީޗަރުންގެ މުސާރަ 15،000 ން 20،000 ށް އިތުރުވެގެންދެއެވެ.
One Response
ހުސް އިންޑިއާ އެއްޗެހިންދޯ. ގައުމު ބޭނުންވަނީ ދިވެހީން. ބިދޭސީން ބޭރުކުރޭ! މުޅި ގައުމު ހަލާކުވެ ނިމިއްޖެ.