މާލޭގައި، މާލޭ ސިޓީ ކައުންސިލުން ހަރުކޮށްފައިވާ ސްމާޓް ލައިޓްތަކުން ހައްޖުދުވަސް ހިމެނޭގޮތުން 3 ދުވަހު ތަކުބީރުގެ އަޑު އިވެމުންދާނެކަމަށް އެ ކައުންސިލުން ބުނެފިއެވެ.
މާލޭ ސިޓީގައި ހަރުކޮށްފައިވާ ސްމާޓް ލައިޓްތަކަކީ ޗައިނާގެ އެހީގައި ހަރުކޮށްފައިވާ ލައިޓް ތަކެކެވެ. މި ލައިޓްތަކުން އެންމެ ފުރަތަމަ ތަކުބީރުގެ އަޑު އިވެން ފަށާފައިވަނީ މިއަދު މެންދުރުން ފެށިގެންނެވެ. ސިޓީ ކައުންސިލުން ބުނެފައިވަނީ މި ލައިޓްތަކުން ތަކުބީރުގެ އަޑު އިވެމުންދާނީ ހަވީރު 4:15 އިން އިރުއޮއްސި 6 އަށް އަދި ރޭގަޑު 8:15އިން 11:30ށް ކަމަށެވެ.
މާލެ ސިޓީ ކައުންސިލްގެ ސްމާޓް ސްޓްރީޓް ލައިޓުތަކުން މިއަދު މެންދުރު ފަހުން ފެށިގެން ވަނީ ތަކުބީރު އިއްވަން ފަށާފަ. pic.twitter.com/2kMtec8VsD
— Malé City Council (@MaleCitymv) June 27, 2023
މާލޭ ސިޓީ ކައުންސިލުންވަނީ އަޟުހާ އީދާ ދިމާކޮށް މާލެއާއި ހުޅުމާލެވަނީ ކުލަބޮކިންވެސް ސީނަތްތެރި ކޮށްފައެވެ. މިގޮތުން މާލޭގެ އެކި ތަންތަނުގައި ހަރުކޮފައިވާ ގިޑިގެތަކާއި ކުލަބޮކިތައް ދިއްލަވާލެއްވީ، އަޞުހާ އީދަށް މަރުހަބާ ކިއުމުގެ ގޮތުން ހޯމަ ދުވަހުގެ ރޭ ޖުމުހޫރީ މައިދާނުގައި ބޭއްވި ހަފްލާއެއްގައި މާލޭ ސިޓީގެ މޭޔަރު ޑރ. މުއިއްޒުއެވެ.
މި ރަސްމިއްޔާތުގައި ޑރ. މުއިއްޒު ވިދާޅުވީ ރާޖެފަދަ ސައްތައިން ސައްތަ އިސްލާމީ ގައުމެއްގައި އީދުގެ މުނާސަބާފަދަ މުނާސަބަތުތައް ވަރަށްވެސް ކުލަގަދަކޮށް ފާހަގަކުރަން ޖެހޭނެ ކަމުގައެވެ.
އަޟްޙާ ޢީދަށް މާލޭގެ ބޮޑުތަކުރުފާނު މަގާއި، މަޖީދީމަގު އަދި ސޯސަންމަގުގެ އިތުރުން ވިލިމާލެ ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމުގެގޮތުން މާލެ އާއި ވިލިމާލޭގައި ޖުމްލަ 22 ގިޑިގެ އާއެކު 2224 ބޮކި މާލެ ސިޓީ ކައުންސިލުން ހަރުކޮށްފައި ވެއެވެ.
