ދައުލަތުގެ އެހެން މުވައްސަސާތަކަށް ފާޑުކިޔުމަށްވުރެ ހިއުމަންރައިޓްސް ކޮމިޝަނަށް ރަނގަޅުވަނީ އެކޮމިޝަންގެ މެމްބަރުންގެ އަމިއްލަ ނަފްސަށް ފާޑުކިޔުން ކަމުގައި ރައްޔިތުންގެ މަޖިލީހުގެ މައިނޯރިޓީ ލީޑަރު އޭދަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިހެން ވިދާޅުވީ ރައްޔިތުންގެ މަޖިލީހުގެ މަސައްކަތްތައް އެންމެ ފުރިހަމައަށް ހިނގަމުން ނުދިއުމަކީ އިންސާނީ ހައްގުތަކާއި ގުޅުންހުރި ޤާނޫނީ ނިޒާމް އެންމެ ފުރިހަމައަށް ހިނގަމުންދިޔުމަށް އެޅިގެންދާ ހުރަހެއްކަމަށް އެޗްއާރުސީއެމުން ބުނެ މަޖިލީހަށް ފާޑު ކިޔުމާއި ގުޅިގެން ކުރެއްވި ޓުވީޓުގައެވެ.
ސަލީމް ވިދާޅުވީ އެޗްއާރުސީއެމް ރަނގަޅުވަނީ ކޮމިޝަންގެ އަމިއްލަ ނަފްސަށް ފާޑުކިޔުން ކަމަށެވެ. އަދި އެޗްއާރުސީއެމްއަކީ އެހެން މުވައްސަސާތަކަށް ފާޑުކިޔުމަށްވުރެ މާ ހާލުގައި އޮތްތަނެއްކަމަށް ސަލީމް ވިދާޅުވިއެވެ.
މަޖިލީހަށް ފާޑު ނުކިޔަން ކޮބާ ލަދު ހަޔާތް، އަމިއްލަ ނަފްސަށް ފާޑުކިޔާބަލަ.
– ސަލީމް ވިދާޅުވިއެވެ.
ސަލީމް މިހެން ވިދާޅުވިއިރު، އިދިކޮޅު ރިޔާސީ ކެނޑިޑޭޓް ރައީސް ޔާމީން ޖަލުހުކުމާއި ގުޅިގެން އަމަލު ކުރަމުންދާ ގޮތާއި، އިދިކޮޅު ފަރާތްތަކުން މަގުތަކުގައި ކުރާ މުޒާހަރާތަކުގައި ކުރަމުންދާ އަނިޔާތަކާއި ގުޅިގެން މިހަފްތާގައި ވަނީ އެޗްއާރުސީއެމްއާއި ބައްދަލުކޮށްފައެވެ. މުޒާހަރާތައް ކޮންޓްރޯލް ކުރުމުގައި ބާރުގެ ބޭނުންކޮށް ގިނަ ބަޔަކަށް އަނިޔާ ލިބެމުންދާކަމުގެ ޝަކުވާވެސް އިދިކޮޅު ފަރާތްތަކުން ވަނީ ހުށަހަޅާފައެވެ.
ރާއްޖޭގައި އިންސާނިއްޔަތާއި ޚިލާފް އެތައް އަމަލެއް ހިންގަމުންދާއިރުވެސް އެކަންކަމަށް އެޗްއާރުސީއެމްއަށް އެންމެ އެކަށޭނެ ގޮތަކަށް އަޅާނުލެވޭކަމަށް ގިނަ ބަޔަކު ދަނީ ބުނަމުންނެވެ.
