މިއަހަރު ބާއްވާ ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ދާއިމީ ވޯޓަރސް ލިސްޓަށް ޝަކުވާ ހުށަހެޅުމުގެ މުއްދަތު މިހަފްތާގެ ބުރާސްފަތި ދުވަހަށް ހަމަވާއިރު، މިހާތަނަށް ލިބިފައިވަނީ 80 ޝަކުވާ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން މިމަހުގެ 11 ވަނަ ދުވަހު އާއްމުކުރިވި ދާއިމީ ވޯޓަރސް ލިސްޓަށް ޝަކުވާ ހުށަހެޅުމަށް 10 ދުވަހުގެ މުއްދަތެއް ވަނީ ދީފައެވެ. ލިސްޓަށް މިހާތަނަށް 80 ޝަކުވާ ވަނީ ހުށަހަޅާފައެވެ.
ވޯޓާރސް ލިސްޓަށް ހުށަހެޅިފައިވާ ޝަކުވާތަކުގެ ތެރޭގައި، މަރުވެފައިވާ މީހުންގެ ނަން ލިސްޓުގައި އޮތުމުގެ 59 ޝަކުވާ ހިމެނެއެވެ. މީގެ އިތުރުން އެޑްރެސް ބަދަލުވެފައިވާ 14 ޝަކުވާއާއި، ލިސްޓުގައި ނަން ނެތުމުގެ 1 ޝަކުވާ، އައިޑީކާޑު ބަދަލުވެގެން 1 ޝަކުވާ، ދާއިރާ ބަދަލުވެގެން 3 ޝަކުވާ އަދި ނަން ބަދަލުވެގެން 2 ޝަކުވާ ހުށަހަޅާފައިވާކަމަށް ކޮމިޝަނުން ހާމަކޮށްފައިވެއެވެ.
އިލެކްޝަންސް ކޮމިޝަނުން ޢާންމުކުރެއްވި ލިސްޓަށް ހުށަހެޅުނު އިދާރީ ޝަކުވާތަކަށްފަހު، ވޯޓަރސް ލިސްޓުން އުނިކުރެއްވި ނަންތަކާއެކު މިހާރު ވޯޓު ދިނުމުގެ ޙައްޤު ލިބެނީ 282،672 މީހުންނަށެވެ. ނަމަވެސް ދާއިމީ ލިސްޓަށް ހުށަހެޅޭ ޝަކުވާތައް ބެއްލެވުމަށްފަހު ލިސްޓަށް އަދިވެސް ބަދަލުތަކެއް އަންނާނެއެވެ.
އެގޮތުން އަންނަ މަހުގެ 16 ވަނަ ދުވަހުން ފެށިގެން އޯގަސްޓް މަހުގެ 5 ވަނަ ދުވަހާ ހަމައަށް ރީ-ރަޖިސްޓްރޭޝަނަށް ހުޅުއްވާލެއްވުމަށް އިލެކްޝަން ކޮމިޝަނުން ވަނީ ނިންމަވާފައެވެ.
