ރަހީނު ކޮށްފައި ތިއްބާ ސަލާމަތް ކުރި މީހުންނަށް ފަރުވާ ދިނުމަށްފަހު ދޫކޮށްލައިފި

މާލޭގެ ގެއެއްގެ ތެރޭގައި ރަހީނުކޮށްފައި ތިއްބާ ސަލާމަތްކުރި މީހުންނަށް އައިޖީއެމްއެޗްގައި ފަރުވާ ދިނުމަށްފަހު ދޫކޮށްލައިފިއެވެ.

ރަހީނުކޮށްގައި ތިއްބާ ފުލުހުން ބާރުގެ ބޭނުންކޮށްގެން، އެމީހުން ރަހީން ކޮށްފައިތިބި ގެއަށްވަދެ ސަލާމަތް ކޮށްފައިވަނީ 3 މީހެކެވެ. މި ތިން މީހުންގެ ވަނަވަރު މިހާތަނަށް ހާމަކޮށްފައި ނުވިނަމަވެސް، ތިންމީހުންނަށްވެސް އައިޖީއެމް ހޮސްޕިޓަލުން ފަރުވާ ދިނުމަށްފަހު މިހާރު ދޫކޮށްފައިވާކަން ފުލުހުން ކަށަވަރު ކޮށްދީފައި ވެއެވެ. އަދި 3 މީހުންނަށްވެސް ސީރިއަސް އަނިޔާއެއް ލިބިފައި ނުވާކަމަށްވެސް ވަނީ މައުލޫމާތު ލިބިފައެވެ.

ފުލުހުން ވިދާޅުވެފައިވަނީ ހެންވޭރު އަބަދަށްއުފާ މަގުގައި ހުރި ގެއެއްގެ ތެރޭގައި ބަޔަކު ރަހީނުކޮށްގެ ގެންގުޅޭކަމުގެ މަޢުލޫމާތު ލިބުމާއި ގުޅިގެން، ފުލުހުން އެތަނަށް ގޮސް ބާރުގެ ބޭނުންކޮށްގެން އެތަނަށްވަދެ ރަހީނުކޮށްފައި ތިބި 3 ފިރިހެނުން ސަލާމަތްކޮށްފައިވާ ކަމަށެވެ.

ފުލުހުން އިތުރަށް ވިދާޅުވީ ރަހީނުކޮށްފައިތިބި 3 މީހުންނަށްވެސް އެކިވަރުގެ އަނިޔާތައްކޮށްފައިވާ ކަމަށެވެ. މިމީހުން ސަލާމަތް ކުރުމަށްފަހު ލިބުނު އަނިޔާތަކަށް ފުރަވާ ދިނުމަށް ގެންދެވުނީ އިންދިރާ ގާނދީ މެމޯރިއަލް ހޮސްޕިޓަލަށެވެ.

މިމައްސަލައާއި ގުޅިގެން ފުލުހުންވަނީ ދިވެހި ފިރިހެނަކާއި، 18 އަހަރުން ދަށުގެ ކުޑަ ފިރިހެން ކުއްޖަކު ފުލުހުންގެ ބެލުމުގެ ދަށަށް ގެންގޮސްފައެވެ. މިމައްސަލަ މިހާރު ފުލުހުން އަންނަނީ ތަޙުގީގުކުރައްވަމުންނެވެ.

މީހުން ރަހީން ކުރުމަކީ އެންމެ ބޮޑެތި ކުށްތަކުގެ ތެރޭގައި ހިމެނޭ ކުށެކެވެ. އެ ކުށް ސާބިތުވެއްޖެނަމަ، ޓެރަރިޒަމްގެ ގާނޫނުގެ ދަށުން 10 އަހަރަށްވުރެ ދިގުމުއްދަތުހެ ޖަލު ހުކުމެއް އަންނާނެއެވެ.