ދިގު މުއްދަތަކަށް މެދުކެނޑިފައި އޮތުމަށްފަހު، ގައުމީ އެއަރލައިން މޯލްޑިވިއަންގެ ދަތުރުތައް ބ. ދަރަވަންދޫއަށް ފަށައިފިއެވެ. މޯލްޑިވިއަންއިން ދަރަވަންދޫއަށް ކުރަމުން އައި ދަތުރުތައް މެެދުކަނޑާލާފައިވަނީ ކޯވިޑްގެ ކުރިން 2019ގައެވެ.
6 އަހަރުގެ މެދުކެނޑުމަކަށްފަހު މޯލްޑިވިއަންގެ ދަތުރުތައް ދަރަވަންދޫއަށް ފަށާފައިވަނީ، ކޮންމެ ދުވަހަކުވެސް މޯލްޑިވިއަންގެ ދަތުރުތައް އެ އެއަރޕޯޓަށް ކުރާ ގޮތަށެވެ. އަލުން ފެށި ދަތުރުތަކުގައި ބޭނުން ކުރުމަށް ހަމަޖައްސާފައިވަނީ، 42 މީހުންގެ ޖާގައިގެ އޭޓީއާރު-42ގެ ބޯޓެވެ.
ދަރަވަންދޫއަށް އަލުން ދަތުރުތައް ފެށުމަށް އިއްޔެ ބޭއްވި ރަސްމިއްޔާތުގައި ވާހަކަ ދައްކަވަމުން މޯލިޑިވިއަންގެ ސީއޯއޯ އިބުރާހިމް އިއާޒު ވިދާޅުވީ ދަރަވަންދޫއަށް އަލުން ދަތުރުތައް ފަށާފައިވަނީ، މޯލްޑިވިއަންއަށް ލިބިފައިވާ ފީޑްބެކްތަކަށް ބެލުމަށްފަހު ކަމަށެވެ.
އޭނާ އިތުރަށް ވިދާޅުވެފައިވަމީ ދަރަވަންދޫއަށް އަލުން ދަތުރުތައް ފެށިއިރު މޯލްޑިވިއަންއިން އާ ޚިދމަތްތައް ތައާރަފް ކޮށްފައިވާނެ ކަމަށާއި، އޭގެ އިތުރުން ދަރަވަންދޫ އެއަރޕޯޓުން ލިބެންހުންނަ ޚިދުމަތައްވެސް އިތުރަށް ތަރައްގީ ކުރުމަށްވެސް މަސައްކަތް ކުރަމުން ދާކަމުގައެވެ.
ދަތުރުތައް އަލުން ފެށުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަވަމުން ބ. އަތޮޅު ކައުންސިލްގެ ރައީސް އަހުމަދު އަފްރާހު ވިދާޅުވީ ބ. އަތޮޅަކީ ގިނަ ރިސޯޓުތައް އެކުލެވޭ އަތޮޅަކަށް ވުމާއެކު އެއަތޮޅު ދަރަވަންދޫ އެއަރޕޯޓަކީ އަތޮޅުގެ ރައްޔިތުންނަށާއި އަދި ރިސޯޓުތަކަށްވެސް މުހިންމު އެއަރޕޯޓެއް ކަމުގައެވެ. އެގޮތުން އެ އެއަރޕޯޓު އިތުރަށް ތަރައްގީ ވެގެން ދިއުމުގެ މުހިންމުކަން އޭނާ ފާހަގަ ކުރައްވާފައިވެއެވެ.
އަލަށް ދަތުރުތައް ފެށުމުގެ ގޮތުން މޯލްޑިވިއަންވަނީ، ދަރަވަންދޫއަށް ދަތުރުކުރާ އެހެން އެއާރލައިންތަކަށްވުރެ އަގުހެޔޮ، ޚާއްސަ ފެއަރ އަގެއްގައި ޓިކެޓް ވިއްކާފައެވެ. އެއީ ކޮޅަކަށް 840 ރުފިޔާއެވެ.
