ޢަދާލަތު ޕާޓީގެ ޢިލްމުވެރިންނަށް މަގުމަތިން ދިމާކޮށްގެން، އެބޭފުޅުން ކުރައްވަ މަސައްކަތް ފަހަތަށް ނުޖެހެއްސޭނެކަމަށް ޢަދަލާތު ޕާތީގެ ތަރުޖަމާ އަލީ ނަޒީރު ވިދާޅުވެއްޖެއެވެ.
އޭނާ މިހެން ވިދާޅުވީ އަދާލަތު ޕާޓީގެ އިސް ފަނޑިޔާރު އަދި އިލްމުވެރިންގެ މަޖިލީހުގެ ނައިބް ރައީސް ޑރ. މުހައްމަދު އިޔާޒަށް އިދިކޮޅު ޕީޕީއެމްގެ ސަޕޯޓަރުންތަކެއް މަގުމަތި ދިމާކޮށް ފުރައްސާރަ ކުރި މައްސަލާގައި ކުރެއްވި ޓުވީޓެއްގައެވެ.
އަލީ ނަޒީރު ވިދާޅުވީ ޑރ.އިޔާޒަށް މަގުމަތިން ދިމާކޮށް ހިންގި ޢަމަލަކީ ވަރަށް ނާތަހުޒީބު ޢަމަލެއް ކަމަށެވެ. މުސްލިމު މުޖުތަމައުއެއްގައި މިފަދަ ދަށު ދަރަޖައިގެ އަމަލުތައް ހިންގުމަކީ ބަލައި ގަނެވޭނެ ކަމެއް ނޫންކަމަށް ނަޒީރު ވިދާޅުވިއެވެ.
ޢަދާލަތު ޕާޓީގެ އިސްފަނޑިޔާރު އަދި ޢިލްމުވެރިންގެ މަޖިލީހުގެ ނައިބް ރައީސް ޑރ އިޔާޒާ މަގުމަތިން ދިމާކޮށް، އިސްލާމުން އެކަކުއަނެކަކަށް ރައްދުކުރުން ނަހީކުރައްވާފައިވާ ބަސްތަކުން މުޚާތަބުކޮށް ޕީޕީއެމް-ޕީއެންސީއިން ހިންގި ދަށުދަރަޖައިގެ ހުތުރު އަމަލު ހަރުކަށި ޢިބާރާތުން ކުށްވެރިކުރަން.
– ނަޒީރު ވިދާޅުވިއެވެ.
އޭނާ ވިދާޅުވީ މިފަދަ ކަންކަމަކުން އަދާލަތު ޕާޓީގެ ޢިލްމުވެރިން ފަހަތަށް ނުޖެއްސޭނެ ކަމަށެވެ. އަދި މިއީ އިދިކޮޅު ޕީޕީއެމްގެ ލީޑަރޝިޕްގައި ތިއްބެވި ބޭފުޅުން އިސްވެ ކުރުވާ ވަރަށް ނާތަހުޒީބު ޢަމަލުތަކެއް ކަމަށްވެސް އޭނާ ވިދާޅުވިއެވެ. މިފަދަ ކަންކަމަކީ މުޖުމަތައުގެ އަހުލާގީ މިންގަނޑާއިވެސް ޚިލާފަށް ކުރެވޭ ކަންތައްތަކެއް ކަމަށް ނަޒީރު ވިދާޅުވިއެވެ.
މިކަމުން ދޭހަކޮށްދެނީ އިދިކޮޅު ޕާޓީތަކުގެ ވެރިންގެ ރާވައިގެން އަމިއްލަ މަންފާއަށް އާންމު މެންބަރުން ލައްވާ އިސްލާމް ދީނާއި ޤާނޫނުތަކާއި އަދި އާންމު އަޚުލާގީ މިންގަނޑާ ޚިލާފުކަންކަން ކުރުވާކަން. މިފަދަ ހުތުރު ޢަމަލުތަކުގެ ސަބަބުން އަދާލަތުގެ ޢިލްމުވެރިންގެ މަސައްކަތް ނުހުއްޓުވޭނެ.
– ނަޒީރު ވިދާޅުވިއެވެ.
ޕީޕީއެމްގެ ސަޕޯޓަރުންތަކެއް އިޔާޒުއާ ދިމާކޮށްލީ އެ މީހުން އެޗްއާރްސީއެމްގެ ދޮށަށް އެއްވެ އަޑުއުފުލަމުން ދަނިކޮށް ޑރ. އިޔާޒު އެ ސަރަހައްދުން ސައިކަލްގައި ދުއްވާފައި ދަނިކޮށެވެ. މުޒާހަރާ ކުރަން ތިބި އަންހެނުންތަކެއް ވަނީ އިޔާޒު ފަހާ ދުވެފައެވެ. ޑރ. އިޔާޒަކީ ރައީސް އިބްރާހީމް މުހައްމަދު ސޯލިހްގެ ސަރުކާރުގެ ސިޔާސަތުތަކަށް ވަރަށް ފާޅުކަން ބޮޑު ގޮތެއްގައި ތާއީދުކުރައްވާ ޓްވީޓް ކުރައްވާ ބޭފުޅެކެވެ. އޭނާގެ ޓްވީޓްތަކަށް އަބަދުވެސް އިދިކޮޅު މީހުން ފާޑު ކިޔައެވެ.
