ޕީޕީއެމް/ޕީއެންސީ ކޯލިޝަނަށް ނިސްބަތްވާ ފަރާތްތަކާއި ހިއުމަން ރައިޓް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރުންނާ، ބައްދަލުނުކުރެއްވުނީ އެޕޮއިޓްމަންޓް ހަމަޖައްސައި ދީފައިވާ ގަޑިއަށް ވަޑައިނުގަތުމުން ކަމަށް އެކޮމިޝަނުން ވިދާޅުވެއްޖެއެވެ.
އެޗްއާރުސީއެމްގެ ނޫސްބަޔާނުގައިވަނީ އިދިކޮޅުން އެޗްއާރުސީއެމްގެ މެމްބަރުންނާ ބައްދަލުކުރަން ސިޓީއަކުން އިއްޔެ އެދިފައި ވާތީ މާދަމާ ނުވަތަ އަންނަ ހަފުތާއަށް އެ ބައްދަލުވުން ހަމަޖައްސައިދިނުމަށް އެ ކޮމިޝަނުން ހުށަހެޅި ކަމަށެވެ. ނަމަވެސް، ވީ އެންމެ އަވަހަކަށް އެ ބައްދަލުވުން ބާއްވައިިދޭން އިދިކޮޅުން އެދުމުން މިއަދު ހެނދުނު 11:15 އަށް އެޕޮއިޓްމަންޓް ހަމަޖައްސައިދިން ކަމަށް ނަމަވެސް، އެފަރާތުން ގަޑިއަށް ހާޒިރުނުވި ކަމަށް އެކޮމިޝަންގެ ބަޔާނުގައިވެއެވެ.
ޕީޕީއެމް/ޕީއެންސީ ކޯލިޝަނުން މި ބައްދަލުވުމަށް ގަޑިޖެހިގެން އެތައް އިރެއް ވީއިރު ވެސް އައިސްފައި ނުވާތީ 15 ޖޫންވާ ބުރާސްފަތި ދުވަހު ހެނދުނު 9:00 އަށް ބައްދަލުވުމަށް އައުމަށް ކޯލިޝަންއަށް ސިޓީއަކުން އެންގިކަމަށްވެސް އެޗްއާރްސީއެމްގެ ބަޔާނުގައިވެއެވެ.
ނަމަވެސް މިއަދު 12:45 ގައި އިދިކޮޅު ޕީޕީއެމް/ޕީއެންސީ ކޯލިޝަނަށް ނިސްބަތްވާ ގިނައަދަދެއްގެ ބަޔަކު ކޮމިޝަންގެ ތެރެއަށް ވަންކަމަށާއި އޭރު ކޮމިޝަންގެ މެމްބަރުން ތިބީ އެހެން ބައްދަލުވުމެއްގައި ކަމަށެވެ. އަދި ކޮމިޝަންގެ މެމްބަރުންނާ ބައްދަލުނުކޮށް އެތަނުން ނުކުންނަ ދެކޮޅު ހަދައި، ކޮމިޝަންގެ ތެރޭގައި އަޑުގަދަކުރި ކަމަށް އެޗުއާރުސީއެމްގެ ބަޔާނުގައިވެއެވެ.
އެޗްއާރްސީއެމްގެ ބަޔާނުގައިވަނީ އިދިކޮޅުން އަމަލުކުރި ގޮތުގެ ސަބަބުން ކޮމިޝަންގައި މަސައްކަތްކުރާ މުވައްޒަފުންގެ ހިތުގައި ބިރުވެރިކަން އުފެދި، މަސައްކަތުގެ މާހައުލުގައި އެ މުވައްޒަފުންނަށް ލިބެންޖެހޭ ރައްކާތެރިކަމަށް ހުރަސްއެޅުނު ކަމަށެވެ. އަދި އެކަމުގެ ސަބަބުން ކޮމިޝަންގެ މަސައްކަތްތަކަށް ވެސް ބުރޫއެރި ކަމަށް އެ ބަޔާނުގައިވެއެވެ.
މަޢުލޫމާތު ލިބިފައިވާ ގޮތުގައި ޕީޕީއެމް/ޕީއެންސީ ކޯލިޝަނަށް ނިސްބަތްވާ ބަޔަކު އެޗްއާރުސީއެމްއަށް ދިޔައީ ، މިހާރު ޖަލުގައި ހުންނެވި އިދިކޮޅުގެ ލީޑަރު އަދި ކުރީގެ ރައީސް އަބްދުﷲ ޔާމީނަށް މިސަރުކާރުން އަނިޔާކުރާ ކަމަށް ބުނެ އެކަމުގެ ތަފުސީލު އެ ކޮމިޝަނާ ހިއްސާކުރުމަށެވެ.
