ދިވެހި ޑޮކްޓަރުންނާއި ހިލާފަށް ބިދޭސީ ޑޮކްޓަރުން އިތުރު ގަޑީގެ އިނާޔަތް ޖެހުމުގައި ލިމިޓެއް ނޯންނަކަމަށް ހެލްތް މިނިސްޓްރީިއިން ބުނެފިއެވެ.
އެ މިނިސްޓްރީން ހާމަކޮށްފައިވާ ގޮތުގައިގެ މުސާރައިގެ އާ އޮނިގަނޑުގެ ދަށުން އިތުރު ގަޑީގެ އިނާޔަތުގައި ދިވެހި ޑޮކްޓަރުންނަށް ލިމިޓެއް އޮންނައިރު، ބިދޭސީ ޑޮކްޓަރުންނަށް އެފަދަ އެއްވެސް ހިފެހެއްޓުމެއް ނޯންނާނެ ކަމަށެވެ.
ނަމަވެސް އަލަށް އެކުލަވާލި ޞިއްޙީ ޙިދުމަތްތެރިންގެ މުސާރައިގެ އޮނިގަނޑުގެ ދަށުން މުސާރަ ބޮޑުކޮށްފައިވަނީ ހަމައެކަނި ދިވެހި ޑޮކްޓަރުންނަށް ކަމަށް ވާތީ، ބިދޭސީންގެ އޯޓީގައި ލިމިޓޭޝަނެއް ނެތަސް މުސާރައިގައި ފަރަގު ހުންނާނެ ކަމަށް ހެލްތް މިނިސްޓްރީއިން ބުނެފައިވެއެވެ.
މިދިޔަ މަހުގެ އެއް ވަނަ ދުވަހުން ފެށިގެން ޞިއްޙީ ދާއިރާގެ ފަންނީ މުސާރައިގެ އާ އޮނިގަނޑަށް އަމަލުކުރަން ފަށައި، އިތުރު ގަޑީގެ އިނާޔަތް ވަނީ 10 އިންސައްތަ ލިމިޓޭޝަނެއް ކަނޑައަޅައިފަ އެވެ. އެކަމާއި ޞިއްޙީ ދާއިރާގެ މުވައްޒަފުން ކަންބޮޑުވުން ފާޅުކޮށް ކަމާގުޅޭ ފަރާތްތަކަށް ޕެޓިޝަނެއް ވަނީ ހުށަހަޅާފަ އެވެ.
މީގެ ކުރިން، ހުކުރާއި ހޮނިހިރު ދުވަހަކީ ވެސް އިތުރު ގަޑީގެ އިނާޔަތް ލިބޭ ދުވަހެކެވެ. އެކަމަކު، މި މަހުން ފެށިގެން އިނާޔަތް ލިބެނީ ހަމައެކަނި ހުކުރު ދުވަހު މަސައްކަތަށް އެކަންޏެވެ. ހޮނިހިރު ދުވަހު މަސައްކަތަށް ނުކުތަސް، އޯޓީ ލިބޭނީ، މިހާރު ވެސް އޯޓީ ލިބޭ 8 ގަޑިއިރަށް ވުރެ އިތުރަށް މަސައްކަތް ކޮށްފި ނަމަ އެވެ.
އާ އޮނިގަނޑުގެ ދަށުން ރޭންކް 1-7 ރޭންކުގެ ދިވެހި މެޑިކަލް އޮފިސަރަކަށް މުސާރައިގެ ގޮތުގައި 18،129ރ. އަދި އެލަވަންސް އަށް 10،382ރ. ލިބެ އެވެ. އޭގެ އިތުރުން މަސައްކަތްކުރާ ކޮންމެ ދުވަހަކަށް 281ރ. ލިބެ އެވެ. ހަފުތާގެ ފަސް ދުވަހު މަސައްކަތް ކުރާނަމަ، އެއީ އިތުރު ގަޑި ނުލައި 34،131ރ. އެވެ.
ޞިއްޙީ ހިދުމަތްދޭ ތަންތަނަށް ބިދޭސީ 35 މެޑިކަލް އޮފިސަރުން ހޯދަން މިނިސްޓްރީން މި ފަހުން ކުރި އިއުލާނުގައި ބުނީ އެ މީހުންނަށް މުސާރައިގެ ގޮތުގައި ލިބޭނީ 28،140ރ. އަދި އިތުރުގަޑީގެ އިނާޔަތް ކަމަށެވެ. އޭގެ އިތުރުން، ބޭރު ޑޮކްޓަރުންނަށް އެކޮމޮޑޭޝަނާއި ކޮއްތު އެލަވަންސް ވެސް ހަމަޖައްސައިދެ އެވެ.
ހެލްތުގެ އޮފިޝަލަކު ވިދާޅުވީ ބޭރު ޑޮކްޓަރުން ހޯދަން އިއުލާނުކުރީ ދިވެހިން ނުލިބިގެން ކަމަށެވެ. ރަށްރަށުގެ ޞިއްޙީ މަރުކަޒުތަކާއި ހޮސްޕިޓަލްތަކަށް މި ވަގުތަށް ބޭނުންވާ ޑޮކްޓަރުންގެ ވަޒީފާތަކަށް އަންނަ ބުރާސްފަތި ދުވަހުގެ ކުރިން ކުރިމަތިލެވޭނެ އެވެ.
