އެމްޑީޕީގެ ރައީސް، ރައީސް މުހައްމަދު ނަޝީދު މާދަމާ ކުޅުދުއްފުއްޓަށް ވަޑައިގެންނެވުމަށް ހަމަޖެހިއްޖެއެވެ.
ރައީސް ނަޝީދު ކުޅުދުއްފުއްޓަށް ވަޑައި ގަންވަނީ ކުޅުދުއްފުށި ސިޓީ ކައުންސިލްގެ ދެވަނަ އަހަރީ ދުވަހުގެ ރަސްމިއްޔާތު ޝަރަފުވެރިކޮށްދެއްވުމަށެވެ. ކުޅުދުއްފުއްޓަކީ ރައީސް ނަޝީދަށް ތާއީދު ބޮޑު ރަށެކެވެ. ދެބައިވެފައިވާ އެމްޑީޕީގެ ތެރެއިން ރައީސް ނަޝީދުގެ ދަ ޑިމޮކްރެޓްސް އަށް ތާއީދުކުރާ ގިނަ މެމްބަރުން ކުޅުދުއްފުށީގައި އެބަތިއްބެވެ.
ރައީސް ނަޝީދު މާދަމާ ހަވީރު ކުޅުދުއްފުއްޓަށް ވަޑައިގެންނެވުމަށްފަހު، މާދަމާރޭ ހދ އަތޮޅު ތައުލީމީ މަރުކަޒުގެ ހޯލުގައި އޮން ކުޅުދުއްފުށީ ސިޓީ ކައުންސިލްގެ ދެވަނަ އަހަރީ ޖަލްސާގައި ބައިވެރިވެ އެޖަލްސާ ޝަރަފްވެރި ކޮށް ދެއްވާނެއެވެ.
ކުޅުފުށީގައި މަޖިލިސް ތަމްސީލް ކުރާ ދެ މެމްބަރުންގެ ތެރެއިން މެމްބަރު ޔާސިރަކީ އެމްޑީޕީން ވަކިވެ ރައީސް ނަޝީދަށް ތާއީދު ކުރައްވާކަން ހާމަކޮށްފައިވާ މެމްބަރެކެވެ. އަދި މެމްބަރު ޖަމްޝީދަކީވެސް ރައީސް ނަޝީދަށް ތާއީދުކުރާ ނަމަވެސް ރަސްމީކޮށް، ރައީސް ނަޝީދުގެ ފަޅިއަށް އެރިކަން ހާމަކޮށްފައިވާ މެމްބަރެއް ނޫނެވެ.
ރައީސް ނަޝީދު، މިދިޔަ އަހަރު ޑިސެމްބަރުމަހުވެސް ކުޅުދުއްފުއްޓަށް ވަޑައިގެންނެވިއެވެ. އަދި ދާދި ފަހުން ހއ އަތޮޅު ކައުންސިލުން ބޭއްވި އެވޯޑް ނައިޓެއް ޝަރަފްވެރިކޮށްދެއްވުމަށް ދިއްދޫއަށްވެސް ވަޑައިގަންނަވާފައިވެއެވެ. ރައީސް ނަޝީދަށް ހއ. އަދި ހދ. އަތޮޅުގެ ކައުންސިލްތަކުގެ ތާއީދު އޮތްކަން ވަނީ މީގެ ކުރިންވެސް ހާމަކޮށްފައެވެ.
