ގޭންގު ކުށްތަކާއި ޑްރަގުގެ ވަބާއިން ސަލާމަތްކުރުމުގައިވެސް މަދަނީ ޖަމްއިއްޔާތަކުގެ ދައުރުބޮޑު ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރާއްޖޭގައި ފުރަތަމަ ފަހަރަށް "ސިވިލް ސޮސައިޓީ އެވޯޑްސް"ގެ ނަމުގައި ތަޢާރަފްކުރި އެވޯޑްދިނުމަށް މިރޭ ސޯސަލް ސެންޓަރ އިންޑޯ ހޯލްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ކޮންމެ މުޖްތަމަޢެއްގައި ވެސް މަދަނީ ޖަމްޢިއްޔާތަކަކީ، އެ މުޖްތަމަޢެއް ޙަރަކާތްތެރިކުރުވާ މައި އިންޖީނުކަމަށާއި، އެ އިންޖީނު ހިނގާ ވަރަކަށް، އެ މުޖްތަމަޢެއްގެ ހަކަތަ އިތުރުވެ ބުންވަރު އިތުރުވާކަމަށެވެ. އަދި އެ މުޖްތަމަޢެއްގެ އިޤްތިޞާދީ މިސްރާބު އަމާން އައްސޭރިއަކަށް ސީދާކޮށްދިނުމުގައިވެސް މަދަނީ ޖަމްޢިއްޔާތަކުގެ ދައުރު ފުޅާކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ، ޑިމޮކްރެސީގެ ހަމަތައް ނަގަހައްޓައި ދެމެހެއްޓުމުގައިވެސް އެންމެ މުހިންމު ދައުރެއް އަދާކުރެވޭނީ މަދަނީ ޖަމްޢިއްޔާތަކަށްކަމަށާއި، އިންސާނީ ޙައްޤުތައް ޙިމާޔަތްކޮށް ރައްކާތެރިކުރުމުގެ ޙަރަކާތްތައް، އެ ބައެއްގެ ތެރޭގައި ހިންގައިދޭ މައި ކެނބަކީވެސް މަދަނީ ޖަމްޢިއްޔާތައްކަމަށެވެ. އަދި ބަދަލަކަށް އެދިގެން މީގެ އަހަރުތަކެއް ކުރިން އަޅުގަނޑުމެން އެންމެން އުފުލި އަޑުތައް، ރާއްޖޭގެ ދުސްތޫރީ ފޮޅުވަތްތަކުގައި ލިޔެވިގެން ދިޔައީ، މަދަނީ ޖަމްޢިއްޔާތަކުންވެސް ވަރަށް މުހިންމު ދައުރެއް އަދާކޮށްގެންކަމަށާއި އެއީ ފެންނަން އޮތް ޙަޤީޤަތެއްކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ އެކި ކަންކޮޅުތަކުގައި ހުރި އިޖްތިމާޢީ މައްސަލަތަކުގެ މައްޗަށްވެސް ވަނީ އަލިއަޅުއްވާލައްވަވާފައެވެ. އެގޮތުން ރާއްޖޭގެ އެކި އަތޮޅުތަކުގެ އެކި ރަށްރަށުގައި އެފަދަ މައްސަލަތައް ހުރީ އެކިވަރަށް ކަމަށާއި، ހުރި މައްސަލަތަކާއި އޭގެ ބާވަތްތައްވެސް ތަފާތުކަން އެމަނިކުފާނު ފާހަގަކުރެއްވިއެވެ. އެގޮތުން ގޭންގު ކުށްތަކާއި، މަސްތުވާތަކެތީގެ މައްސަލަތަކާއި، ޢާއިލީ މައްސަލަތަކާއި އަންހެނުންނާއި ކުޑަކުދިންނަށް ގޯނާކުރުމުގެ މައްސަލަތަކުގެ މައްޗަށް ރައީސްގެ ވާހަކަފުޅުގައި ބައްލަވާލެއްވެވިއެވެ. އަދި މިފަދަ ކަންކަމަށް މުޖުތަމަޢު ހޭލުންތެރިކުރުމުގައި މަދަނީ ޖަމްޢިއްޔާތަކަށްވެސް މުހިއްމު ރޯލެއް އަދާކުރެވިދާނެކަމަށް އެމަނިކުފާނު ވިދާޅުވިއެވެ.
ގޭންގު ކުށްތަކަކީވެސް، ޙައްލުކުރަން ޖެހިފައިވާ އިޖްތިމާޢީ ބޮޑު މައްސަލައެއް. މަސްތުވާތަކެތީގެ މައްސަލައަކީ ވެސް މުޅި ރާއްޖެއަށް ފެތުރިފައި އޮތް ވަރަށް ބޮޑު މައްސަލައެއް. ނަމަވެސް، އެކި އަތޮޅުތަކާއި އެކި ރަށްރަށުގައި އެކަން އޮތީ އެކި މިންވަރަށް. މަސްތުވާތަކެތީގެ މައްސަލަތައް ޙައްލުވަމުންދާ ވަރަކަށް، އަޅުގަނޑުމެންގެ ތެރޭގައި ހުރި އިޖްތިމާޢީ ވަރަށް ގިނަ މައްސަލަތައް ޙައްލުވާން ފަށާނެ ކަމަށް އަޅުގަނޑު ދެކެން. ނޫނީ އެ މައްސަލަތައް މަދުވާން ފަށާނެ.
– ރައީސް ވިދާޅުވިއެވެ.
ރައީސް ވިދާޅުވީ، ދިވެހިން އުޅެން ބޭނުންވާ އުފާވެރި ދިރިއުޅުން، ދެކެން ބޭނުންވާ ޞުލްޙަވެރި ވެށި، އަދި ފާޅުކުރަން ބޭނުންވާ ހިނިތުންވުން، މި ހުރިހާ ކަމެއްވެސް ގުޅިފައި ވަނީ މިފަދަ މައްސަލަތަކާކަމަށެވެ. އަދި އަޅުގަނޑުމެން މި ގެންނަ އިޤްތިޞާދީ ތަރައްޤީއާއި، ޞިއްޙީ ދާއިރާގެ ހެޔޮ ބަދަލުތަކާއި، ތަޢުލީމީ ގޮތުން އަންނަ ކުރިއެރުންތަކުން، ޙަޤީޤީ އުފާވެރިކަމެއް ޙާޞިލުވާނީ މިފަދަ އިޖްތިމާޢީ މައްސަލަތަކަށް ޙައްލު ލިބިގެންކަމަށްވެސް އެމަނިކުފާނު ވިދާޅުވިއެވެ.
މި ދެންނެވި އިޖްތިމާޢީ މައްސަލަތައް ޙައްލުކުރުމުގައި ވެސް އަޅުގަނޑުމެންނަށް އެ މަގުން ހިނގިއްޖިއްޔާ ނަތީޖާ ޙާޞިލުކުރުން ފަސޭހަވާނެ. އަދި މިކަމުގައި ރަށްރަށުގެ މަދަނީ ޖަމްޢިއްޔާތަކުން އިސް ނެގުމުން ނަތީޖާ ނެރުން އަދި އެއަށްވުރެ މާ ފަސޭހަވާނެ. އެ ރަށެއްގައި ހުރި އިޖްތިމާޢީ މައްސަލަތަކާ ދެކޮޅަށް، އެ ރަށެއްގެ ޖަމްޢިއްޔާތައް ތެދުވުމަކީ މިހާރުން މިހާރަށް ވެސް ވަރަށް ބޭނުންތެރި ކަމެއް.
– ރައީސް ވިދާޅުވިއެވެ.
މި ރަސްމިއްޔާތުގައި ސިވިލް ސޮސައިޓީ އެވޯޑްސް ލިބުނު 10 ފަރާތަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ އެވޯޑް ޙަވާލުކޮށްދެއްވާފައެވެ. ރާއްޖޭގައި އަލަށް ތަޢާރަފުކުރި ސިވިލް ސޮސައިޓީ އެވޯޑުގެ މަޤްޞަދުތަކުގެ ތެރޭގައި، އިޖްތިމާޢީ ގޮތުން މުޖުތަމަޢު ބާރުވެރިކުރުވުމަށް އަމިއްލައަށް އިސްނަގައިގެން މަދަނީ ޖަމްޢިއްޔާތައް އަދާކުރާ ދައުރާމެދު ހޭލުންތެރިކަން އިތުރުކުރުމާއި އެކަންކަމުގެ އަގުވަޒަންކުރުމާއި ދަރުމަވެރި ޖަމްޢިއްޔާތަކުގެ ތެރެއިން ނަމޫނާ ޚިދުމަތްތަކެއް ދޭ ޖަމްޢިއްޔާތަކަށް ހިތްވަރު ދިނުމާއި އަގު ވަޒަންކުރުން ހިމެނެއެވެ.
One Response
އެއްޖިންސުން ގުޅުންހިއްގާމީހުނަށް ބޮޑުއަދަބުދީ ރާޖެއިން އެކަންނައްތާލާ އެކަމަޒް މިނިވަންކަންކަންނުދީ އެއްމެހާ ފާހިސް ކަންތަކަން. ރުހުމާއެކު އެއްބާރުލުމާ ރުހުންދޭސަރުކާރެއްމީ އިލްމުވެރިންގެ ބަސްއަހާ ސަރުކާރަކަޒްވާއިރު ކީވެބާ.އިލްމުވެރިން އަޅާނުލަނީ