ރައްޔިތުންގެ މަޖިލީހުގެ ރައީސާއި، ނައިބް ރައީސްގެ އިތުބާރު ނެތްކަމުގެ މައްސަލަ ރިޔާސީ އިންތިޚާބުގެ ކުރިން މަޖިލިސް ތެރެއިން ކާމިޔާބު ވެދާނެ ކަމުގެ ފުރުސަތު ކުޑަކަމަށް ބެލެވިއްޖެއެވެ.

މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މަޤާމުން ވަކި ކުރެއްވުމަށް 54 މެމްބަރުންގެ ސޮޔާއެކު ރައްޔިތުންގެ މަޖިލީހަށް ވަނީ ހުށަހަޅާފައެވެ. އީވާގެ އިތުބާރު ނެތްކަމަށް ވައްދާފައިވަނީ 50 މެމްބަރުންގެ ސޮޔާއިއެކުއެވެ.

ރައްޔިތުންގެ މަޖިލީހުގެ ގަވާއިދުގައިވާގޮތުން މަޖިލީހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާއަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރެއްވުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށްވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ ނަޝީދު މަގާމުން ދުރުކުރައްވަން 44 ވޯޓު ބޭނުންވާނެއެވެ.

މަޖިލީހުގެ ގަވާއިދުގައި ބުނަނީ ކީކޭ؟

ރައްޔިތުންގެ މަޖިލީހުގެ ގަވާއިދުގެ 43 ވަނަ މާއްދާގައި ބުނެފައިވަނީ ޤާނޫނުއަސާސީގެ 82 ވަނަ މާއްދާގެ (ބ)، (ޅ)، އަދި (ކ) ގައި ބަޔާންކޮށްފައިވާ ގޮތުގެމަތިން، ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ އެއްބައި މެންބަރުންނަށްވުރެ މަދުނޫން މެންބަރުންނަށް މަޖިލީހުގެ ރައީސް މަގާމުން ވަކިކުރުމަށް ފެނިއްޖެނަމަ އެ މައްސލަ މަޖިލީހަށް ހުށަހެޅިދާނެ ކަމަށެވެ.

މައްސަލަ މަޖިލީހަށް ވައްދާތާ ރަސްމީ ބަންދުނޫން 3 ދުވަހުގެ ތެރޭގައި ނޯޓިސް ޢަމީން ޢާންމު މަޖިލީހުގެ މެމްބަރުންނަށާއި، މަޖިލީހުގެ ރައީސަށް ދިނުމަށްފަހު، އެނޯޓިހު ދޭ ތާރީހުން ފެށިގެން 14 ދުވަހުގެ މުއްދަތެއް ދިނުމަށްފަހު، އެންމެ އަވަހަށް އަންނަ ރަސްމީ ބަންދުނޫން ދުވަހެއްގައި ބާއްވާ މަޖިލީހުގެ ޖަލްސާއަށް އެމައްސަލަ އެޖެންޑާ ކުރެވެން ޖެހެއެވެ.

ހަމަ މިއާއިއެކު ނޯޓިހުގެ މުއްދަތު ހަމަވެގެން މަޖިލިހުގެ ރައީސް މަގާމުން ވަކިކުރުމުގެ ގަރާރެއް މަޖިލީހުގެ ޖަލްސާއަށް ހުށަހެޅުމަށްފަހު، އެވަގުތު މަޖިލިހަށް ހުށަހެޅިފައިވާ އެހެން އެއްވެސް ކަމަކާމެދު ބަހުސްކުރެވޭނީ، ނުވަތަ ގޮތެއް ނިންމަންވާނީ މަޖިލީހުގެ ރައީސްގެ މަގާމުން ވަކިކުރުމުގެ މައްސަލާގައި ގޮތެއް ނިންމުމަށްފަހުގައި ކަމަށް މަޖިލީހުގެ ގަވާއިދުގައި ބުނެފައިވެއެވެ.

އީވާގެ މައްސަލަ ވެސް އެޖެންޑާ ކުރެވޭނެ ކަމާ މެދު ސުވާލުތަކެއް!

އެމްޑީޕީގެ 50 މެމްބަރެއްގެ ސޮޔާ އެކު، މަޖިލިހުގެ ނައިބު ރައީސްކަމުން އީވާ ދުރުކުރަން ހުށަހެޅީ، އެ ޕާޓީން ވަކިވުމަށް ފަހު "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފައްދަން މަސައްކަތް ފެއްޓެވުމާ ގުޅިގެންނެވެ.

މަޖިލީހުގެ ގަވާއިދުގައި ބަޔާންކޮށްފައިވާ ގޮތަށް، މަޖިލިހުގެ ނައިބު ރައީސްގެ އިތުބާރު ނެތްކަމުގެ މައްސަލައެއް ހުށަހެޅުމުން ދޭން ޖެހޭ 14 ދުވަހުގެ ނޯޓިސް ދިނުމަށް ފަހު، އެ މައްސަލަ މަޖިލިހަށް އެޖެންޑާކޮށްފައި ވަނީ އަންނަ އާދީއްތަ ދުވަހަށެވެ. މަޖިލިހުގެ ނައިބު ރައީސްކަމުން އީވާ ދުރުކުރުމުގެ މައްސަލަ ކުރިއަށް ގެންދެވިދާނެ ކަމާ މެދު ސުވާލު އުފެދުނީ، މަޖިލީހުގެ އާންމު ކޮމިޓީއާ އެކު ދާއިމީ ކޮމިޓީތަކުގައި ތިއްބަވާ މެމްބަރުން އަލުން އެކުލަވާލުމުގެ މަސައްކަތް އަދިވެސް ނުނިމޭތީ އެވެ.

މަޖިލީހުގެ ގަވާއިދު ބުނާ ގޮތުން، މަޖިލީހުގެ ނައިބު ރައީސް މަގާމުން ވަކި ކުރުމުގެ މައްސަލާގައި ވާހަކަ ދައްކާނެ މެމްބަރުންގެ އަދަދާއި ވާހަކަ ދައްކާނެ ދިގުމިން ކަނޑައަޅަންޖެހޭނީ އާންމު ކޮމިޓީންނެވެ. މަޖިލިހުގެ ނައިބު ރައީސް އޭނާގެ ދިފާއުގައި ވާހަކަ ދެއްކެވުމަށް ދޭނީ ކިހާ ފުރުސަތެއްތޯ އާއި ދިފާއު ވާން ވާހަކަ ދެއްކެވުމުގެ ވަގުތު ވެސް ކަނޑައަޅާނީ އެ ކޮމިޓީން ކަމަށް ގަވާއިދުގައި ވެ އެވެ.

އީވާގެ އިތުބާރު ނެތް މައްސަލައިގެ ނޯޓިސް އަންނަ އާދީއްތަ ދުވަހަށް ހަމަވި ނަމަވެސް ދެން މަޖިލީހުގެ ޖަލްސާއެއް ބާއްވަން މަޖިލީހުގެ ރިޔާސަތުން ނިންމާފައިވަނީ އަންނަ ހަފްތާގެ ހޯމަ ދުވަހުއެެވެ.

މަޖިލީހުގެ މުޅި ނިޒާމު ގެއްލިފަ:

މަޖިލީހުގައި މިހާރު ދިމާވެފައިވާ ހާލަތަކީ މަޖިލީހުގެ ތާރީހުގައިވެސް މިހާތަނަށް ދިމާނުވާފަދަ ހާލަތަކެކެވެ. މީގެ ކުރިން މަޖިލީހުގެ ތާރީހުގައިވެސް މަޖިލީހުގެ ރައީސާއި ނައިބް ރައީސްގެ އިތުބާރު ނެތް މައްސަލައެއް އެއްފަރާ މަޖިލީހަށް ވައްދައި ކުރިއަށް ގެންގޮސްފައި ނުވެއެވެ. ނަމަވެސް މިހާރުގެ ހާލަތު އޮތް ގޮތުން މަޖިލީހުގެ ރިޔާސަތު ބަލަައްޓަންޖެހޭނީ ކޮންބޭފުޅެއްކަމެއްވެސް މަޖިލީހުގެ ގަވާއިދުގައި ސާފުކޮށް ބަޔާންކޮށްފައި ނެތެވެ.

މިހާލަތުގައި މަޖިލިސްގެ ކަންކަން ހަމަ މަގަށް އެޅުމަށް ކުރެވޭނެ މާބޮޑު ކަމެެއްނެތެވެ. ސަބަބަކީ މަޖިލީހުގެ ކޮމެޓީތައްވެސް އޮތީ ހުއްޓިފައެވެ. ކޮމެޓީތައް ބެހުމާއިމެދު އެއްބަސް ނުވެވި ކޮމެޓީތަކުގެ މަސައްކަތް ނުކުރެވި އޮންނަތާ މިއީ 3 ވަނަ ހަފްތާއެވެ. ރިޔާސަތާއިމެދު އޮތް އިތުބާރު ނެތް މައްސަލަތަކަށް ކޮމެޓީއަކުންވެސް މިހާލަތުގައި ހޯދޭނެ ފަރުވާއެއް ނެތެވެ.

މަޖިލީހުގެ މިހާރު ކަންކަން ހިނގާ ގޮތަށް ބަލާއިރު، ސާފު އައުލަބިއްޔަތު ސަރުކާރަށް އޮތް ނަމަވެސް ރިޔާސީ އިންތިޚާބުގެ ކުރިން މަޖިލީހުގެ ރައީސާއި، ނައިބް ރައީސް މަޤާމުން ވަކި ކުރުމަށް ގަދަފައި ވިއްދާފައިވާ ވީނަމަވެސް އެޖާގަވެސް މަޖިލީހުގެ މިހާރުގެ ރިޔާސަތުން ދީފާނެކަމަށްވެސް ނުވެލެއެވެ. މަޖިލިސް އީދު ބަންދަށް ޗުއްޓީއަށް ދާގޮތަށް މަދައުރުގެ ޗުއްޓީ ނިންމައި ދެން މަޖިލީހުގެ ޖަލްސާތައް މިއަހަރުގެ ފަހު ދައުރަށް ފަށާނީ އޯގަސްޓް މަހުގެ ތެރޭގައެވެ.

ސެޕްޓެމްބަރު 9 ވަނަ ދުވަހަކީ ރިޔާސީ އިންތިޚާބުގެ ވޯޓުލުން އޮންނަ ދުވަހަށް ވާއިރު މީގެ ކުރިން މިމައްސަލަ މަޖިލީހުގައި ކުރިއަށް ގޮސްދާނެ ކަމާއިމެދު މިހާރު އޮތީ ބޮޑު ސުވާލެއްގެ ތެރޭގައެވެ.