މޮރިޝަސްއާއި ރާއްޖެއާ ދެމެދު ފުށުއަރާ ކަނޑުގެ ސަރަހައްދާ މެދު އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ނިންމި ނިންމުމާ މެދު ހިތްހަމަނުޖެހިގެން ސަރުކާރާ ދެކޮޅު ޕާޓީތަކުން އެކުލަވާލާފައިވާ އިއްތިހާދުން ބާއްވާ އެއްވުމަށް މީހުން ޖަމާވާން ފަށައިފިއެވެ.
ބާނަ ބާނާ ތިއްބާ ތިޔަ ވިއްކާލީ ކަނޑު" މި ޝިއާރުގެ ދަށުން މިރޭ ބާއްވާ ޖަލްސާއަކީ އިޓްލޮސްގެ ނިންމުމާ މެދު ހިތްހަމަ ނުޖެހިގެން އިދިކޮޅު ޕީޕީއެމް/ޕީއެންސީއާއި އެމްއެންޕީ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަޑީގައި ހުންނަވައިގެން އުފައްދަވާ ދަ ޑިމޮކްރެޓްސް ގުޅިގެން ބާއްވާ އެއްވުމެކެވެ.
މިޖަލްސާގައި އެންމެ ބޮޑަށް ފާހަގެވެގެން ދަނީ ސިޔާސީ ގޮތުން މީގެ ކުރިން ޚިޔާލް ތަފާތު އެތައް ބޭފުޅުންނެއް އެއްތަނަކުން ބައްދަލުވި ޖަލްސާއެއްގެ ގޮތުގައެވެ. އެގޮތުން ކުރީގެ ރައީސް ޑރ.ވަހީދާއި އެމަނިކުފާނުގެ ކުރީގެ ޕާޓީ އެމްޑީޕީގެ ރައީސް ނަޝީދުގެ ފިކުރެއްގެ ދިރުމުގެ ބޭފުޅުންނާއި މިޖަލްސާއިން ވަނީ ބައްދަލުވެފައެވެ. ހަމަ މިއާއިއެކު އުމަރު ނަސީރާއި ޕީޕީއެމްގެ އިސް ބޭފުޅުންނާއިވެސް މިރޭ ވަނީ މިޖަލްސާއިން ބައްދަލު ވެފައެވެ.
މިރޭގެ އެޖެންޑާގައިވާގޮތުން ޖަލްސާގައި އެންމެ ފުރަތަމަ ވެސް އޮތީ އިދިކޮޅު ޕްރޮގްރެސިވް ކޯލިޝަންގެ ލީޑަރު ރައީސް ޔާމީންގެ ޚާއްސަ ތަޤުރީރެކެވެ. މާފުށީ ޖަލުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ރައީސް ޔާމީންގެ މި ތަގުރަކީ ޢާއިލާ މެދުވެރިކޮށް ނުވަތަ ޤާނޫނީ ވަކީލުން މެދުވެރިކޮށް ހިއްސާ ކުރައްވާ ތަގުރީރެއް ކަމަށް ބެލެވެއެވެ.
މިޖަލްސާގައި ކަނޑު ވިއްކާލުމާއި ދެކޮޅަށް މަސައްކަތް ކުރި އިސް ބޭފުޅުން ވާހަކަ ދައްކަވައެވެ. އެގޮތުން ކުރީގެ ދެ ބަންޑާރަ ނައިބުން ކަމަށްވާ ޑރ.މުނައްވަރާއި، އައިޝަތު އާޒިމާ ޝުކޫރާއި، އެމްއެންޕީގެ ރިޔާސީ ކެނޑިޑޭޓް ކާނަލް ނާޒިމްއާއި، ކުރީގެ ހޯމް މިނިސްޓަރ އުމަރު ނަސީރު ވާހަކަ ދައްކަވާނެއެވެ.
ބާނަބާނާ ތިއްބާ ތިޔަވިއްކާލީ ކަނޑު…
އެންމެހައި ރައްޔިތުން އަވަހަށް ވަޑައިގަންނަވާ…#KanduVikkumaaDhekolhu pic.twitter.com/iTglUPHPDv— Azhart (@Azhartu) June 2, 2023
މީގެ އިތުރުން މިޖަލްސާގައި ފިކުރެއްގެ ދިރުމުގެ ފަރާތުން އުނގޫފާރު ދާއިރާގެ މެމްބަރު މުހައްމަދު ވަހީދާއި، ޖުމްހޫރީ ޕާޓީގެ ކައުންސިލް މެމްބަރު ކެންދޫ ދާއިރާގެ މެމްބަރު އަލީ ހުސެއިން އަދި ޕީއެންސީގެ ރައިސް އަބްދުއްރަހީމް ވާހަކަ ދައްކަވާނެއެވެ.
މިއީ ކުރިއަށް އޮތް ރިޔާސީ އިންތިޚާބުގެ ކުރިން އިދިކޮޅު ފަރާތްކުން އެއް ޕްލެޓް ފޯމަކުން ފެނިގެންދާނެ ފުރަމަ ރެއެވެ. މިރޭގެ މިއެއްވުމަކީ ގިނަ އަދަދެއްގެ ބަޔަކު ބައިވެރިވާ އެއްވުމަކަަށް ވުމުން، އެއްވުން އިންތިޒާމު ކުރާ ފަރާތުން ގެންދަނީ ވީހާވެސް ގިނަ ބަޔަކަަށް ކާނިވާ ސަރަހައްދުގައި ތިބެވޭނެ އިންތިޒާމުތައް ހަމަޖައްސަމުންނެވެ. މިރޭގެ ހަލްސާ ފެށުމަށް ހަމަޖެހިފައިވަނީ 9 ޖަހާއިރުއެވެ.
އާޓިފިޝަލް ބީޗްގައި ބާއްވާ މި އެއްވުމުގައި، ކަނޑުގެ ސަރަހައްދު ވިއްކުމާ ދެކޮޅުކަން ހާމަކުރުމުގެ ގޮތުން ޕެޓިޝަނެއްގައި ސޮއިކުރުން ކުރިއަށް ގެންދާނެ ކަމަށް އެ އިއްތިހާދުން ބުނެއެވެ.
