އެޓާނީ ޖެނަރަލް އިބްރާހިމް ރިފްއަތުގެ އިތުބާރު ނެތް މައްސަލަ ކުރިޔަށް ގެންދާނެ ގޮތެއް މަޖިލީހުގައި ތިއްބަވާ ސިޔާސީ ޕާޓީތަކުގެ ލީޑަރުންނަށް އެއްބަސް ނުވެވޭތީ ސުޕްރީމް ކޯޓުގެ އިސްތިޝާރީ ލަފަޔަކަށް އެދެން ޖެހޭ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
އެ މައްސަލާގައި އޭޖީ މަޖިލީހަށް ޖަވާބުދާރީ ވެވަޑައިގަންނަވަން ޖެހިވަޑައިގަންނަވާ އިރު އޭނާ ޖަވާބުދެއްވީ ލިޔުމުންނެވެ. އެގޮތަށް ޖަވާބު ދެއްވިދާނެ ކަމާ މެދު މަޖިލީހުގައި ހިޔާލުތަފާތުވުން އުފެދުމުން ސިޔާސީ ޕާޓީތަކުން މަޝްވަރާކޮށްގެން ގޮތެއް ނިންމަން މަޖިލިސް މެދުކަނޑައިލިއެވެ.
ފަހުން ޖަލްސާ އަލުން ފެއްޓެވުމަށް ފަހު ރިޔާސަތުން ނަޝީދު ވިދާޅުވީ އެ މަޝްވަރާއިން ގޮތެއް ނުނިންމުނު ކަމަށެވެ. އެމަނިކުފާނު ވިދާޅުވި ގޮތުން އެކަމާ އިންކާރުކުރީ އިދިކޮޅު ޕީޕީއެމް/ޕީއެންސީ އާއި އެމްއެންޕީންނެވެ.
ޤާނޫނު އަސާސީގައި ބަންޑާރަނައިބަށާއި، ވަޒީރު މަޖިލީހުގެ ބޭފުޅުންނަށް ލިބިދީފައިވާ ހައްގަކީ ޕީޕީއެމް ޕީއެންސީ، އެމްއެންޕީ ބުނާގޮތުގައި ކިތާބީ ހެއްކާއިއެކުގައި ނުވަތަ ޑޮކިއުމަންޓްރީ ހެއްކާއި އެކުގައި ޖަވާބުދާރީވެވަޑައިގެންނެވުންކަމަށް މަޖިލިސް ރައީސް ވިދާޅުވިއެވެ. މަޖިލީހުގައި ކުރެވުނު މަޝްވަރާތަކަށްފަހު މަޖިލިސް ރައީސް ނިންމެވީ މިމައްސަލާގައި ސްޕްރީމް ކޯޓުގެ ލަފައެއް ހޯއްދެވުމަށެވެ.
މިބާވަތުގެ ކަންކަމުގައި އަޅުގަނޑު ޖެހޭނީ އިސްތިރާޖީ ލަފައެއް ހޯދަން. ޤާނޫނު އަސާސީ މާނަކުރެވުނުއިރު، ނުވަތަ އެކުލަވާލިއިރު އޮތްގޮތާއި، މިބާވަތުގެ ޤާނޫނީ ވާހަކަތައް އަޅުގަނޑު އެދޭ ގޮތަކީ ސްޕްރީމްކޯޓުން ނިންމެވުން. އަޅުގަނޑު މިތާއިދެ ޤާނޫނު އަސާސީއާއި ޚިލާފަށް ވަޒީރު ބޭފުޅަކު ވަކި ކުރުމުގެ މަސައްކަތް އިޖުރާއަތުތައް ހިންގުން އެއީ އަޅުގަނޑަށް ކުރެވެން އޮތް ކަމެއް ނޫން.
– ރައީސް މުހައްމަދު ނަޝީދު ވިދާޅުވިއެވެ.
މައްސަލަ ކުރިއަށް ގެންދިއުމަށް އާންމު ކޮމެޓީން ނިންމެވީ 2 ގަޑިއިރުގެ ބަހުސްއެއް ކުރިއަށް ގެންދިއުމަށެވެ. އޭގެ ތެރެއިން ވަޒީރފަށް ޖަވާބު ދާރީވުމަށް 30 މިނިޓް ދެއްވާ ގޮތަކަށެވެ. ބަންޑާރަ ނައިބު ނިންމެވީ ޤާނޫނު އަސާސީގެ 110 ވަނަ މާއްދާގެ (ށ)ގައި ވާގޮތުގެ މަތީން މަޖިލީހަށް ލިޔުމުން ޖަވާބުދާރީވެ ވަޑައިގެންނެވުމަށެވެ. އެމަނިކުފާނުވަނީ ލިޔުމުން މަޖިލީހަށް ޖަވާބު ހުށަހެޅުއްވާފައެވެ.
މިމައްސަލާގައި އުފެދުނު ޚިޔާލު ތަފާތުވުންތަކާއިއެކު މަޖިލީހުގެ ރައީސް ވަނީ މަޖިލީހުގައި ހިމެނޭ ސިޔާސީ ޕާޓީތަކުގެ މެމްބަރުންނާއި މަޝްވަރާ ކުރައްވާފައެވެ. މިގޮތުން އެމްޑީޕީ، ޕީޕީއެމް، ޕީއެންސީ، އެމްއެންޕީގެ ލީޑަރުންނާއި އެކުގައި ކުރެވުނު މަޝްވަރާތަކުން ނަތީޖާއެއް ލިބިފައި ނުވާކަމަށް މަޖިލިސް ރައީސް ވިދާޅުވިއެވެ.
މަޖިލިސް ރައީސް ވިދާޅުވީ ޤާނޫނު އަސާސީއަށް ޢަމަލުކުރަން ފެށިފަހުން 2009 ވަނަ އަހަރު ޚާރިޖީ ވަޒީރުގެ އިތުބާރު ނެތްކަމުގެ ވޯޓެއް ހުށަހެޅުނު ކަމަށެވެ. އެފަހަރު ޚާރިޖީ ވަޒީރު މަޖިލީހަށް ހާޒިރުވެ ވަޑައިގެން ޖަވާބު ދާރީވެ ވަޑައިގެންނެވިކަމަށެވެ. އެއަށްފަހު 2013 ވަނަ އަހަރުގެ އޭރުގެ ބަންޑާރަ ނައިބް އައިޝަތު އާޒިމާ ޝުކޫރުގެ އިތުބާރު ނެތްކަމުގެ މައްސަލާގައި ލިޔުމެއްވެސް ޖަވާބު ނުފޮނުވާ، މަޖިލީހަށްވެސް ވަޑައިގެންފައި ނުވާކަމަށެވެ. އެންމެ ފަހުވަގުތު ވިދާޅުވެފައިވަނީ އާލާސްކަންފުޅާ އުޅުއްވާކަމަށެވެ. އޭގެ ފަހުން ނެގުނު ނައިބް ރައީސް ޑރ.ޖަމީލްގެ އިތުބާރު ނެތްކަމުގެ މައްސަލާގައިވެސް ލިޔުމެއް ނުފޮނުއްވާކަމަށެވެ.
ގާނޫނު އަސާސީގެ 101 ވަނަ މާއްދާގެ (ހ) ގައި ބުނެފައި އޮތީ އިތުބާރު ނެތް ކަމަށް ހުށަހަޅާ މައްސަލައިގެ ބަހުސްގައި އަނގަބަހުންނާއި ލިއުމުން، އޭނާގެ ދިފާއުގައި މަސައްކަތް ކުރުމުގެ ހައްގު ލިބިގެންވާ ކަމަށެވެ.
އޭޖީ ޖަވާބުދާރީ ވެވަޑައިގަންނަވަން މަޖިލީހަށް ވަޑައިގަންނަވަން ޖެހިވަޑައިގަންނަވާނެ ކަމަށް ވިދާޅުވާ މެމްބަރުން ދެކެވަޑައިގަންނަވާ ގޮތުގައި، ލިޔުމުން ޖަވާބު ދެއްވުމާއި އަނގަބަހުން ޖަވާބުދެއްވުމާ ދެމެދުން ގޮތެއް އިހުތިޔާރު ކުރުމުގެ ފުރުސަތު ގަވައިދުގެ އެ މާއްދާ އަކުން ނުލިބެއެވެ.
