އެމެރިކާގެ ގާނޫނުހަދާ މަޖިލިސް، ސެނެޓްގެ މެމްބަރެއް ކަމުގައިވާ ލިންޑްސޭ ގަރަހަމް ހައްޔަރު ކުރުމަށް ރަޝިއާއިން އެރެސްޓް ވޮރެންޓެއް ނެރެފިއެވެ.
ރަޝިއާއިން އޭނާ ހައްޔަރު ކުރުމުގެ އަމުރު ނެރެފައިވަނީ، މިހާރު ކުރެވެމުންދާ ޔޫކުރެއިން ހަނގުރަމާގައި ރަޝިއާއިން ސިފައިން މަރުވަމުންދާ ދިއުމަށް ތައުރީފްކޮށް އޭނާ ވާހަކަ ދައްކާފައިވާ ވީޑިއޯއެއް އާންމު ވުމާއި ގުޅިގެންނެވެ.
ޒެލެންސްކީއާއެކީ ބޭއްވި ބައްދަލުވުމެއްގައި ދެކެވިފައިވާ މިވާހަކަތަކުގެ އަސްލު ވީޑިއޯ އާންމު ކޮށްފައިވަނީ ފާއިތުވި ހުކުރު ދުވަހު ޒެލެންސްކީގެ އޮފީހުގައި ސެނެޓަރ ގްރަހަމްއާއި ޒެލެންސްކިއާއި ދެބޭފުޅުން ބޭއްވި ބައްދަލުވުމަށްފަހު ޒެލެންސްކީގެ އޮފީހުންނެވެ.
އެއަށްފަހު މި ބައްދަލުވުމުގައި ދެކެވުނު ވާހަކަތަކުގެ ސަބް ޓައިޓްލް ހިމަނައިގެން ބައެއް ފަރާތްތަކުންވަނީ ވީޑިއޯގެ އެކި ބައިތައް ގުޅުވައިގެން ސޯޝަލް މީޑިއާގައި ވީޑިއޯ ދައުރު ކޮށްފައެވެ.
މި ވީޑިއޯގައި ފެންނަ ގޮތުން، ސެނެޓަރ ގްރަހަމް ވިދާޅުވެފައިވަނީ، އެމެރިކާއިން ޔޫކުރެއިންއަށް ފޯރުކޮށްދޭ ހަތިޔާރުތަކަކީ "މިހާތަނަށް އެމެރިކާއިން ކޮށްފައިވާ އެންމެ ރަގަޅު ޚަރަދު" ކަމުގައެވެ. އެއާއެކު އޭނާވަނީ ރަޝިއާގެ ސިފައިން ހަނގުރާމާގައި މަރުވަމުންދާކަން ފާހަގަ ކުރައްވާފައެވެ.
ރަޝިއާއިން އޭނާ ހައްޔަރު ކުރުމުގެ އަމުރު ނެރުމާއިގުޅިގެން ރިޕަބްލިކަން ޕާޓީގެ ސެނެޓަރ ވިދާޅުވެފައިވަނީ އެ ވޮރެންޓަކީ "ޝަރަފުގެ ބެޖެއްގެ ގޮތުގައި" އޭނާ ބޭނުން ކުރައްވާނޭ ކަމުގައެވެ.
ރަޝިއާގެ އިންޓީރިއަ މިނިސްޓްރީން މިހާރުވަނީ ސެނެޓަރ ގްރަހަމް އެ މިނިސްޓްރީގެ ވޮޗް ލިސްޓުގައި ހިމަނާފައެވެ. އެހެންނަަމެވެސް އޭނާގެ މައްޗަށް ކުރާ ތުހުމަތު ބަޔާން ކޮށްފައެއް ނުވެއެވެ.
