ރ. ފުއްގިރި ކުއްޔަށް ދޫކުރުމުގެ ޚިޔާނާތުގައި މައްސަލައިގައި ކުރީގެ ރައީސް ޔާމީންގެ މައްޗަށް އުފުލާފައިވާ ދަޢުވާގެ ޝަރީއަތުގެ އަޑުއެހުމެއް މާދަމައަށް ތާވަލްކޮށްފިއެވެ.
ރައީސް ޔާމީނާ ދެކޮޅަށް ދައުލަތުން ދައުވާ އުފުލާފައިވާ މަނީ ލޯންޑްރިންއާ ރިޝްވަތު ދިނުމުގެ މައްސަލައިގެ މާދަމާގެ އަޑު އެހުން ތާވަލުކޮށްފައި އޮތީ، ހެނދުނު 9:30 ގައި އޮންލައިންކޮށް ބޭއްވުމަށެވެ.
މި މައްސަލައިގައި އެންމެ ފަހުން އޮތް އަޑު އެހުމުގައި ފުއްގިރި ކުއްޔަށް ދިނުމުގައި ހިންގާފައިވާ ކަމަށް ތުހުމަތު ކުރެވޭ ހިޔާނާތުގެ މައްސަލައިގެ ފުލުހުންގެ ތަހުގީގު ފައިލްތައް އެ މައްސަލާގައި ދައުވާކޮށްފައިވާ ފަރާތްތަކަށް ދޫކޮށްދިނުމަށް ކްރިމިނަލް ކޯޓުންވަނީ އަމުރުކޮށްފައެވެ. ތަހުގީގު ފައިލްތައް ދޫކުރަން ކުރިމިނަލް ކޯޓުން އަމުރު ކުރީ، ޔާމީން އަދި ކްރިކް ރިޒާގެ ފަރާތުން ސުޕްރީމް ކޯޓުގައި އިސްތިއުނާފުކުރި މައްސަލާގައި އެ ކޯޓުން ކުރި ހުކުމަށް ރިއާޔަތްކޮށެވެ.
ސުޕްރީމް ކޯޓުގެ ހުކުމުގައި ވަނީ ދިފާއުން މައްސަލައިގެ ތަހުގީގުގައި ހިމެނޭ ހުރިހާ މައުލޫމާތެއް ދިނުމަށް އެދިއްޖެނަމަ ދައުލަތުން އެ މައުލޫމާތުތައް ދޫކޮށްދޭން ޖެހޭނެ ކަމަށެވެ. ތަހުގީގު ފައިލްތައް ދިފާއަށް ހިއްސާކުރުމަށް ފަސް ދުވަސް ކޯޓުން އެ ދުވަހު ދިނެވެ.
އެންމެ ފަހުން އޮތް ޝަރީއަތުގައި ސުޕްރީމް ކޯޓުގެ ހުކުމާ ހަވާލާދީ ފުލުހުންނާ އޭސީސީ އަދި އެސެޓް ރިކަވަރީގެ ކޮމިޝަންގައި ހުރި ފައިލްތައް ދިނުމަށް ދިފާއުން އެދުނެވެ. ކްރިކް ރިޒާގެ ވަކީލު ޔާމީން އެދުނީ ފުލުސް އޮފީހަށް ގޮސް އެ މައުލޫމާތުތައް ހޯދުމަށް އަމުރުކޮށްދިނުމަށެވެ. ސަން އިންވެސްޓްމަންޓުން އެދުނީ އޭސީސީ އަދި ރިޔާސީ ކޮމިޝަނަށް ވަކިވަކިން ހާޒިރުވުމުގެ ފުރުސަތު ދިނުމަށެވެ.
އޭގެ ރައްދުގައި ދައުލަތުން އެ ދުވަހު ވިދާޅުވީ، ސުޕްރީމް ކޯޓުގެ އަމުރުގައި އޮންނަނީ ހެކި ހާމަކޮށްދޭން އެދޭ އިރު ތަހުގީގު ފައިލްތައް ދިނުމަށެވެ. އެހެންކަމުން ދައުލަތަށް ގަބޫލު ކުރެވެނީ، އެއީ ޝަރީއަތުގެ ކުރީގެ މަރުހަލާގައި އެދެން ޖެހޭ މައުލޫމާތެއް ކަމަށެވެ.
ފުއްގިރީގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލަވައިފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގގެ ދަޢުވާއެވެ. އެގޮތުން ރިސޯޓެއްގެ ގޮތުގައި ރ. ފުއްގިރި ތަރައްޤީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުންކުރައްވައި 1.1 މިލިއަން ޑޮލަރު ހޯއްދަވާފައިވާ ކަމަށް ދައުލަތުން ތުހުމަތުކުރައްވައެވެ.
ރ.ފުއްގިރީގެ މައްސަލައިގައި ރައީސް ޔާމީންގެ މައްޗަށް ދައުލަތުން ދަޢުވާ އުފުއްލަވައިފައިވާއިރު، ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލެވި ދެ ދަޢުވާއެއް ސާބިތުވުމާ ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ޙުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވައިފައެވެ. އަދި އެމަނިކުފާނު މިވަގުތު ހުންނެވީ ޙުކުމް ތަންފީޒުކުރެއްވުމަށް ކ.މާފުށީ ޖަލުގައެވެ.
މިހާރު އުފުއްލަވައިފައިވާ ދައުވާތައް ސާބިތުވެއްޖެ ނަމަ، މަދުވެގެން ފަސް އަހަރުގެ ޖަލު ޙޫކުމާއެކު، ޖޫރިމަނާގެ ޙުކުމެއް އަންނާނެއެވެ.
