އިއްޔެ ކުރިއަށްދިޔަ ގައުމީ ޓައިމް ޓްރަޔަލްގައި ދުވެ، ފަސުހާ އަހުމަދު، 13 އަހަރުވީ އަންހެނުންގެ ގައުމީ 800 މީޓަރު ދުވުމުގެ ރެކޯޑް މުގުރާލައިފިއެވެ.

ޓައިމް ޓްރަޔަލްސްގައި ފަސުހާ 800 މީޓަރު ދުވުމުން ގައުމީ ރެކޯޑް މުގުރާލީ 2 މިނިޓް 27.92 ސިކުންތުން ރޭސް ނިންމައިގެންނެވެ. މީގެ ކުރިން މި ރެކޯޑް އޮތީ، 2009 ވަނަ އަހަރު ޖަރުމަންގެ ބާލިންގައި އޮތް ވޯލްޑް ޗެމްޕިއަންޝިޕްގައި ވާދަކުރި އައިޝަތު ރީޝާ އަތުގައެވެ. ރީޝާ ރޭސް ނިންމާފައި ވަނީ 2 މިނިޓް 28.00 ސިކުންތުންނެވެ.

މިދިޔަ އަހަރު އޮތް އިންޓަ ސްކޫލް އެތުލެޓިކްސް ޗެމްޕިއަންޝިޕްގައި 19 އަހަރުން ދަށުގެ އެއްވަނަ ހޯދި އަހުމަދިއްޔާ އިންޓަނޭޝަނަލް ސްކޫލް ޓީމުގައި ހިމެނުނު ފަސުހާ ވަނީ އެ މުބާރާތުގައި، އެ އުމުރުފުރާގެ 800 މީޓަރު ދުވުމުން އެއްވަނަ ހޯދައިފައެވެ. އަދި 1500 މީޓަރާއި 5000 މީޓަރު ދުވުމުން ވެސް އެއްވަނަ ހޯދިއެވެ. އޭނާ 5000 މީޓަރު ދުވުމުން އެއްވަނަ ހޯދީ މީޓް ރެކޯޑަކާ ވެސް އެކުއެވެ.

ފަސުހާގެ ކޯޗަކީ މިޑިލްޑިސްޓެންސް ނެޝަނަލް ހެޑްކޯޗު އަބްދުﷲ އިބްރާހިމެވެ. ފަސޫހާ ސްކޫލު ނިންމުމަށްފަހު މިހާރު ތަމްރީން ހޯދަމުންދަނީ ނޭޝަނަލް މިޑިލްސް ޑިސްޓެންޓް ޕޫލުގައެވެ. ފަސުހާގެ ޓާގެޓަކީވެސް އަދި ކޯޗުގެ ޓާގެޓަކީވެސް އައިއޯއައިޖީގައި ވާދަކޮށް ރަނގަޅު ކާމިޔާބެއް ހޯދުމެވެ.

އެތުލެޓިކްސް އަށް މިއީ ބައިނަލްއަގުވާމީ ލެވަލްގައި ބަލާއިރު ބޮޑު އަހަރެކެެވެ. އެ ގޮތުން، އަންނަ އޮގަސްޓް މަހު މަޑަގަސްކަރާގައި ފަށާ އިންޑިއަން އޯޝަން އައިލެންޑް ގޭމްސްް (އައިއޯއައިޖީ) އާއި ސެޕްޓެމްބަރު މަހު ޗައިނާގެ ހަންޒޫގައި ކުރިއަށްދާ އޭޝިއަން ގޭމްސް އަކީ ރާއްޖޭގެ ގައުމީ އެތުލީޓުން މި ވަގުތު ރާއްޖޭން ބޭރުގައި އެންމެ ބޮޑަށް ތައްޔާރުވަމުން އަންނަ ދެ ގޭމްސްއެވެ.