ތިރީގައިވާ ފޮޓޯއިން އެ ފެންނަ ފަރުބަދަތަކާއި، އަދި އެ ފަރުބަދަތަކުގެ މެދުގައިވާ މަގަކީ، 1276 ބީސީގައި، موسي عليه السلام، ބަނީ އިސްރާއީލު ދަރިކޮޅުގެ މީހުންނާއެކު، މިސްރުން ނިކުމެ ވަޑައިގެން ދަތުރުފުޅު ކުރައްވަމުން ވަޑައިގެންނެވި މަގެވެ.
އެ ހިސާބަށް ވަޑައިގެން ބެއްލެވިއިރު، ކުރިމަތީގައި އޮތީ އޭގެ ފުންމިން އެނގިގެންނުވާ ރަތްކަނޑެވެ. އޭރު އެކަލޭގެފާނާއި، ބަނީ އިސްރާއީލުގެ ދަރިކޮޅުގެ މީހުން އަތުލައިގަތުމަށްޓަކާ، ޖައްބާރު ފިރުޢައުނުގެ ބިޔަ ބޮޑު ލަޝްކަރު، އެބައިމީހުންގެ ފަސްފަހަތުން އައުދެއެވެ. މި ހާދިސާގެ ވާހަކަ ކީރިތި ޤުރުއާނުގެ ޝުޢުރާ ސޫރަތުގައި މާތް ﷲ ވަޙީކުރައްވާފައިވެއެވެ. އެ ސޫރަތުގެ 60 ވަނަ އާޔަތުން ފެށިގެން 63 އާޔަތުގައި މާތް ﷲ ވަޙީ ކުރައްވާފައިވެއެވެ.
فَأَتْبَعُوهُم مُّشْرِقِينَ (60) فَلَمَّا تَرَٰٓءَا ٱلْجَمْعَانِ قَالَ أَصْحَـٰبُ مُوسَىٰٓ إِنَّا لَمُدْرَكُونَ (61) قَالَ كَلَّآ ۖ إِنَّ مَعِىَ رَبِّى سَيَهْدِينِ (62) فَأَوْحَيْنَآ إِلَىٰ مُوسَىٰٓ أَنِ ٱضْرِب بِّعَصَاكَ ٱلْبَحْرَ ۖ فَٱنفَلَقَ فَكَانَ كُلُّ فِرْقٍۢ كَٱلطَّوْدِ ٱلْعَظِيمِ (63). މި އާޔަތްތަކުގެ މާނައީ:
ފަހެ، އެއުރެން (އެބަހީ: ފިރުޢައުނާއި އޭނާގެ ގައުމުގެ މީހުން) އަނެއްބައި މީހުންގެ ފަހަތުންގޮސް އަރައިހަމަކުރީ، އިރު އެރި ވަގުތުގައެވެ. (60) ފަހެ، އެއުރެން އެއްބަޔަކު އަނެއްބަޔަކަށް ފެނުނުހިނދު، މޫސާގެފާނުގެ އަޞްޙާބުން ދެންނެވޫއެވެ. ހަމަކަށަވަރުން، އެއުރެން ތިމަންމެން އަތުލައިގަންނާނެތެވެ. (61) އެކަލޭގެފާނު ވިދާޅުވިއެވެ. ހަމަހިލާ އެހެނަކުން ނުވާނެއެވެ. ތިމަންގެ ވެރިރަސްކަލާނގެ ތިމަންނާއާއެކު (ނަސްރު ދެއްވުމުގައި) ވޮޑިގެންވެއެވެ. އެކަލާނގެ ތިމަންނާއަށް މަގު ދައްކަވާނެތެވެ. (62) ފަހެ، ތިމަންރަސްކަލާނގެ މޫސާގެފާނަށް ވަޙީކުރެއްވީމެވެ. ކަލޭގެފާނުގެ އަސާކޮޅުން ކަނޑުގައި ޖައްސަވާށެވެ! ދެން (މޫސާގެފާނު ޖެއްސެވުމުން، ބާރަ ބަޔަށް) އެ ކަނޑު އިރައިގެން ހިނގައްޖެއެވެ. އެއިން ކޮންމެ ބައެއް، ބޮޑު ފަރުބަދައެއް ފަދައިންވިއެވެ. (63
موسي عليه السلام އާއި އެކަލޭގެފާނަށް ތަބާވީ 600،000 މީހުން، ސަލާމަތުން، ރަތް ކަނޑު ހުރަސްކުރައްވާ ސައިނާއާވީ ފަޅިއަށް އަރައި ވަޑައިގެންނެވިއެވެ.
ފިރުޢައުނާއި އޭނާގެ ލަޝްކަރުގެ 1.6 މިލިއަން މީހުން، ރަތް ކަނޑު ހުރަސްކުރަން އުޅުމުގެ ތެރޭގައި، އެންމެން ކަނޑަށް ޣަރަގުވެ ހަލާކުވެގެން ދިޔައީއެވެ. ފިރުޢައުނާއި އޭނާގެ ލަޝްކަރުވަނީ އެމީހުންގެ ގިނަކަމާއި، ބާރުގަދަކަމުގެ މައްޗަށް ބޮޑާވެ ފަޚުރުވެރިވެފައެވެ. އެހެންނަމަވެސް، ކިތަންމެ ބާރުގަދަ ލަޝްކަރެއް ކަމުގައިވިޔަސް، އާޚިރުގައި ނިމިގެންދާނީ ﷲ އިރާދަފުޅުކުރައްވާ ގޮތަކަށެވެ. މި ބިންމަތީގައި ބޮޑާވެ، އަނިޔާވެރި ނުވާންވީ އެހެންވެގެންނެވެ. ބުނެވޭ ގޮތުގައި މި ހާދިސާ ހިނގީ، މުޙައްރަމް މަހުގެ 10 ވަނަ ދުވަހެވެ.
