ރައްޔިތުންގެ މަޖިލީހުގައި ސަރުކާރު ޖަވާބުދާރީކުރުވުމަށް އެކުގައި މަސައްކަތް ކުރުމަށް އިދިކޮޅު ޕީޕީއެމް އިން ސިޔާސީ ޕާޓީތަކަށް ދައުވަތު ދީފިއެވެ.

ޕީޕީއެމް އިން ބުނީ ރައްޔިތުންގެ މަޖިލީހުގައި ސަރުކާރު ޖަވާބުދާރީ ކުރުވުމަށް ކުރެވެން ހުރި މަސައްކަތްތައް އިތުރަށް ވަރުގަދަ ކުރުމުގެ ގޮތުން ޕީޕީއެމް ޕީއެންސީގެ ޕީޖީ ގުރޫޕްއާއި ގުޅިގެން މަސައްކަތް ކުރަން ބޭނުންވާ އެންމެހާ މެންބަރުންނަށާއި ޕާޓީތަކަށް ދައުވަތު ދޭ ކަމަށެވެ.

ރައްޔިތުންގެ މަޖިލިހުގައި ސަރުކާރު ޖަވާބުދާރީ ކުރުވުމަށް، ކުރެވެން ހުރި މަސައްކަތްތައް އިތުރަށް ވަރުގަދަ ކުރުމުގެ ގޮތުން، ޕީޕީއެމް/ޕީއެންސީގެ ޕީޖީ ގުރޫޕާ ގުޅިގެން އެކުގައި މަސައްކަތް ކުރަން ބޭނުންވާ އެންމެހައި މެމްބަރުންނަށާއި ޕާޓީތަކަށް ދައުވަތު އަރުވަން. ޕީޕީއެމުން ކުރި ޓުވީޓެއްގައި ވެއެވެ.

Rayyithunge Majileehugai sarukaaru javaabudhaaree kuruvumah, kurevenhuri masakkaiythah ithurah varugadha kurumugegothun, PPMPNC ge PG group aaigulhigen ekugai masakkaiy kuran beynunvaa emmehaa memberunnashaai, party thakah dhauvathu aruvan.

— Progressive Party of Maldives (@ProgressPartyMV) May 23, 2023

ޕީޕީއެމް އިން މިފަދަ ދައުވަތެއް ދީފައި މިވަނީ މަޖިލީހުގައި ސާފު އަގުލަބިއްޔަތު ކުރިން އޮތް އެމްޑީޕީއަށް އެ އަގުލަބިއްޔަތު ގެެއްލިފައި ވަނިކޮށެވެ. އެމްޑީޕީގައި ކުރިން 67 މެންބަރުން ތިއްބެވި ނަމަވެސް އެމްޑީޕީގެ 12 މެންބަރުން މިދިޔަ ހަފްތާ އެ ޕާޓީން ވަކިވުމުން އެމްޑީޕީގެ މެންބަރުންގެ އަދަދު މިހާރު ވަނީ 54 މެންބަރުންނަށް މަދުވެފައެވެ.

މި ފަހުން ދިމާވި އެކި މައްސަލަތަކުގައި އޭރު އެމްޑީޕީގެ ތެރޭގައި އޮތް "ފިކުރެއްގެ ދިރުން" ފެކްޝަން އަދި މިހާރު ޑިމޮކްރެޓްސް އިން ވަނީ އިދިކޮޅު ކޯލިޝަނާއެކު މަސައްކަތް ކޮށްފައެވެ. އޭގެއިތުރުން ސަރުކާރު ކޯލިޝަނުގައި ހިމެނުނަސް ވަކިން އިންތިހާބުގައި ވާދަކުރާނެކަން އިއުލާންކޮށްފައިވާ ޖޭޕީއިންވެސް ވަނީ އިދިކޮޅާއެކު މަސައްކަތް ކޮށްފައެވެ. މި މަސައްކަތްތަކުގައި އެމްއެންޕީއިންވެސް ބައިވެރިވެފައިވެއެވެ.

މި ހުރިހާ ޕާޓީތަކެއްގެ މެންބަރުން އެއްކޮށްލުމުން އަންނަ އަދަދަކީ 26 އެވެ. މަޖިލީހުގައި މިހާރު ތިބި މިނިވަން ހަތަރު މެންބަރުންގެ ތާއީދު ލިބިއްޖެ ނަމަ އެ އަދަދު 30 އަށް އަރާނެއެވެ.

ސަރުކާރާ އިދިކޮޅު އެހެން ފަރާތްތަކާ ގުޅިގެން ޕީޕީއެމް/ޕީއެންސީން މިހާރު މަސައްކަތް ކުރަނީ ޗާގޯސްގެ މައްސަލާގައި އުފައްދާފައިވާ ޕްލެޓްފޯމުގަ އެވެ. ޗާގޮސްގެ މައްސަލާގައި ސަރުކާރުން އެޅި ފިޔަވަޅާ ދެކޮޅަށް އެކުގައި މަސައްކަތް ކުރަނީ ޕީޕީއެމް/ޕީއެންސީގެ އިތުރުން ޖުމްހޫރީ ޕާޓީ އާއި އެމްއެންޕީ އާއި ނަޝީދުގެ ފެކްޝަނާއި ކުރީގެ ހޯމް މިނިސްޓަރު އުމަރު ނަސީރާއި ކުރީގެ ދެ ބަންޑާރަ ނައިބުން ކަމަށްވާ ޑރ. މުހައްމަދު މުނައްވަރު އަދި އާއިޝަތު އާޒިމާ ޝަކޫރެވެ.