ތިލަދުންމަތީ ދެކުނުބުރީ ނޮޅިވަރަންފަރުގައި ފަށާފައިވާ މަޝްރޫޢުތަކުގެ ތެރެއިން އަވަހަށް ޙައްލު ބޭނުންވާ ކަންކަމާއި އެނޫން ކަންތައްތަކާ ގުޅޭގޮތުން ކަމާބެހޭ މުއައްސަސާތަކާ ގުޅިވަޑައިގެން މަސައްކަތްކޮށްދެއްވާނެ ކަމުގައި ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ދެއްވައިފިއެވެ.
ނައިބު ރައީސް މިފަދައިން ވިދާޅުވެފައިވަނީ ތިލަދުންމަތީ ދެކުނުބުރީ ނޮޅިވަރަންފަރު ކައުންސިލްގެ ބޭފުޅުންނާއި އެކު ރައީސުލްޖުމްހޫރިއްޔާގެ އިފީހުގައި ކުރިއަށްދިޔަ ބައްދަލަވުމެއްގައެވެ.
މިބައްދަލު ކުރެއްވުމުގައި، ނޮޅިވަރަންފަރު ކައުންސިލްގެ ފަރާތުން ވަނީ މިސަރުކާރުން އެ ރަށުގައިވެސް ތަރައްޤީގެ ގިނަ މަޝްރޫޢުތަކެއް ހިންގަވައި ނިންމަވައިފައިވާ ކަމަށާއި އަދި މިހާރުވެސް ބައެއް މަޝްރޫޢުތައް ހިނގަމުންދާކަން ފާހަގަކުރައްވައިފައެވެ. އަދި ފެނާއި ނަރުދަމާގެ މަޝްރޫޢު ނިމި، ބޯހިޔާވަހިކަމުގެ ދަތިކަން ޙައްލުކޮށްދެއްވުމުގެ ގޮތުން، ކުރިޔަށް ގެންދަވާ 100 ހައުސިންގ ޔުނިޓް ޢިމާރާތްކުރުމުގެ މަސައްކަތް ވެސް މުޅިން ނިމުމަކާ ހަމައަށް ކުރިޔަށް ގެންދެވިފައިވާކަން ކައުންސިލުން ފާހަގަކުރެއްވިއެވެ.
މި ބައްދަލުވުމުގައި ކައުންސިލުން ނޮޅިވަރަންފަރަށް އެންމެ ބޭނުންވެފައިވާ ކަންކަމުގެ ތެރޭގައި، މަގުހެދުމާއި ނެރު ފުންކުރުން ފާހަގަކުރެއްވިއެވެ. މީގެ އިތުރުން ސްކޫލުގެ ޖާގައިތުރުކުރުމާއި، ޞިއްޚީ ޚިދުމަތާއި، ކުޅިވަރުކުޅުމުގެ ވަޞީލަތްތައް އިތުރަށް ތަރައްޤީކުރަން ބޭނުންވާކަން ކައުންސިލުން ފާހަގަކުރެއްވިއެވެ. އަދި ނޮޅިވަރަންފަރަކީ، 3 ރަށަކުން މީހުން ހިޖުރަކޮށްފައިވާ ރަށަކަށް ވުމާއެކު ކައުންސިލް އިދާރާގައި އިދާރީ މުވައްޒަފުންގެ ގޮތުގައި 40 އަށްވުރެ ގިނަ މުވައްޒަފުން ތިބިކަން ފާހަގަކުރައްވައި މުސާރައިގެ އޮނިގަނޑުގައި މިހާރު ހުރި މައްސަލަތައް ވެސް ކައުންސިލުން ފާހަގަކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނާއިބު ދެއްކެވި ވާހަކަފުޅުގައި، ނޮޅިވަރަންފަރުގެ މަގުހެދުމުގެ މަޝްރޫޢާގުޅޭ ގޮތުން މިހާރު ކުރެވޭ މަސައްކަތްތަކުގެ މަޢުލޫމާތު ކައުންސިލާ ޙިއްޞާކުރެއްވިއެވެ. އަދި ކައުންސިލުން ފާހަގަކުރެއްވި ކަންކަމުގެ ތެރެއިން އަވަހަށް ޙައްލެއް ބޭނުންވާ ކަންކަމާއި އެނޫން ކަންތައްތަކާ ގުޅޭގޮތުން ކަމާބެހޭ މުއައްސަސާތަކާ ގުޅިވަޑައިގެން މަސައްކަތްކޮށްދެއްވާނެ ކަމުގައި ވިދާޅުވިއެވެ.
