ރައީސުލްޖުމްހޫރިއްޔާގެ އިތުބާރު ނެތްކަމުގެ ވޯޓު ނެގުމަށް މިއަދު މަޖިލީހަށް އިތުބާރު ނެތްކަމުގެ ވޯޓު ވެއްދި ކަމުގައި ވީނަމަވެސް މެމްބަރުންގެ ގޮޑި ގެއްލުވާލައި، މެމްބަރުންނަށް އަނިޔާކުރާ ތަން ނުފެންނަ ކަމަށް ނިމިދިޔަ 18 ވަނަ މަޖިލީހުގެ މަޑުއްވަރީ ދާއިރާގެ މެމްބަރުކަން ފުރުއްވި މުހައްމަދު އަމީތު ވިދާޅުވެއްޖެއެވެ.

ނިމިޔަ ރައްޔިތުންގެ މަޖިލީހުގެ ރައީސް މަސީހުގެ އިތުބާރު ނެތްކަމުގެ ވޯޓު މަޖިލީހަށް ވައްދައި ސޮއި ކުރި މެމްބަރުންގެ ތެރޭގައި ހިމެނި މަޖިލީހުގެ މެމްބަރުކަމުން ޤާނޫނާއި ޚިލާފަށް ވަކިކުރި މެމްބަރުންގެ ތެރޭގައި އަމީތު ހިމެނެއެވެ. ނިމިދިޔަ ވެރިކަމުގައި ވަނީ އޭރުގެ ވެރިކަން ކުރަމުންދިޔަ ޕާޓީ ޕީޕީއެމްއަށް ނިސްބަތްވާ މެމްބަރުންގެ ތެރެއިން 12 މެމްބަރަކު ސަރުކާރުގެ ސިޔާސަތާއި ދެކޮޅަށް މަސައްކަތް ކުރައްވަން ފެއްޓެވުމުން ގޮޑި ގެއްލުވާލައި މަޖިލީހަށް ނުވަދެވޭ ގޮތް ހަދާފައެވެ.

މަޖިލީހުގެ ގޮޑި ގެއްލުނުކަން އިއުލާން ކުރުމުގެ ކުރިން ކުރިއަށްދިޔަ ޖަލްސާތަކަށްވެސް އެބާރަ މެމްބަރުންނަށް ވަނުމަށް ދެކޮޅު ހައްދަވައި މަޖިލީހުގެ ގޭޓު މަތިން ބޭރަށް ވަނީ ސިފައިން ބޭނުންކޮށްގެން އުކާ ހަދާފައެވެ.

އޭރުގެ މިތަޖުރިބާތައް ކުރި އަމީތު ވިދާޅުވީ މިހާރު މަޖިލީހުގައި ހިމެނޭ މެމްބަރުންގެ ތެރެއިން 12 މެމްބަރަކު ސަރުކާރު ހިންގާ ޕާޓީގައި ތިއްބެވުމަށްފަހު ޕާޓީން ވަކިވެ ހިންގަމުންދާ ކަންތައްތައް ކުރެއްވުމަށް މިނިވަންކަން އޮތްކަމަށެވެ. ނަމަވެސް ކުރިން ފެނިގެން ދިޔައީ މިމަންޒަރު ނޫންކަމަށެވެ. މިއަދު ސީދާ ރައީސުލްޖުމްހޫރިއްޔާ އަޒުލު ކުރުމަށް ވޯޓު ނަގާ ހިސާބަށް ދާއިރުވެސް މިނިވަންކަމާއިއެކު އެކަން ކުރުމުގެ ޖާގަ ދެއްވައި، މެމްބަރުންނަށް އެމިނިވަންކަން އޮތްކަމަށް އަމީތު ވިދާޅުވިއެވެ.

12 މެމްބަރުން އެމްޑީޕީ ދޫކޮށް އާ ސިޔާސީ ޕާޓީއެއް އުފައްދާ، ރައީސް އަޒުލުކުރުމަށް ސޮއިކޮށް ހެދުމަކުން ގޮނޑިއެއް ނުގެއްލޭ. ސިފައިން މަޖިލީހަށްވަދެ، އެ މެމްބަރުން ދޮރާށިމަތިން ބޭރަށް އުކައެއްވެސް ނުލާ. އެހާރާ މިހާރުގެ ތަފާތު ވަރަށް ބޮޑު. ފުންކޮށް ވިސްނަވާ!

– އަމީތު ވިދާޅުވިއެވެ.

ރައްޔިތުންގެ މަޖިލީހުގެ މެމްބަރުންގެ ތެރެއިން ރައީސް ޞާލިހުގެ އިތުބާރު ނެތްކަމަށް ތައްޔާރު ކުރަމުންދާ ޕެޓިޝަންގައި މިހާތަނަށް ރައީސް ނަޝީދަށް ތާއީދުކުރާ އެމްޑީޕީގެ މެމްބަރުކަމުން ވަކިވި 12 މެމްބަރުން ވަނީ ސޮއި ކުރައްވާފައެވެ. ރައީސް އިތުބާރު ނެތްކަމުގެ ވޯޓު މަޖިލީހަށް ވެއްދި ނަމަވެސް އެކަން ކާމިޔާބު ނުވާނެކަމަށް އެމްޑީޕީން ދަނީ ބުނަމުންނެވެ.

ރައީސް ޞާލިހުގެ އިތުރުން ބަންޑާރަނައިބް އިބްރާހިމް ރިއްފަތާއި، ފޮރިން މިނިސްޓަރ ޝާހިދުގެ އިތުބާރު ނެތްކަމުގެ މައްސަލަވެސް މަޖިލީހަށް ވަނީ ހުށަހަޅާފައެވެ. މިބޭފުޅުންނަށް ޖަވާބު ދާރީވުމަށް މިހާރު ވަނީ ވަގުތުދީ ނޯޓިސް ފޮނުވާފައެވެ.