ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރު ޖާބިރުގެ ނަން އިއްވައި ތަޅުމުން ބޭރުކޮށްފައިވާއިރު، މަޖިލީހުގެ މި އަހަރުގެ ފުރަތަމަ ދައުރުގެ ބައެއް ޖަލްސާތަކުން ވެސް އޭނާ ބޭރުކޮށްފައިވެއެވެ.

މެމްބަރުންނަށް ވާހަކަދެއްކުމަށް ލިބޭ ފުރުސަތުގެ ތެރެއަށް މަޖިލީހުގެ ރައީސް މުހައްމަދު ނަޝީދު ތަދައްޚުލުވެ، ވާހަކަދެއްކެވުމަށް ހުރަސް އަޅުއްވާ ކަމަށް ޖާބިރު ވިދާޅުވިއެވެ. އަދި، އެއްވެސް މެމްބަރަކަށް ވާހަކަ ދެއްކެވުމަށް ލިބޭ ފުރުސަތަށް ރިޔާސަތުން ހުރަސްއަޅައިގެން ނުވާނެ ކަމަށާއި، ހުރިހާ މެމްބަރުންނަށް އެ ފުރުސަތު ހަމައަށް ލިބެން ޖެހޭ ކަން ޖާބިރު ފާހަގަކުރެއްވިއެވެ.

ޖާބިރު ވަނީ މިއަދުގެ ޖަލްސާއާއި މަޖިލީހުގެ އެކި ޖަލްސާތަކުގައި މީގެކުރިންވެސް މަޖިލީހުގެ ރައީސް، ރައީސް ނަޝީދުގެ އިސްތިއުފާއަށް ގޮވާލައްވާފައެވެ. އޭނާ ވިދާޅުވާ ގޮތުގައި އެ މަގާމު އެންމެ ފުރިހަމަ ގޮތުގައި އަދާ ނުކުރައްވަނީ ނަމަ ރައީސް ނަޝީދު އިންތިޚާބު ކުރި މެމްބަރުންނަށް، އެ މަނިކުފާނު މަގާމުން ވަކިވުމަށް ގޮވާލުމުގެ ހައްގު ލިބިގެންވެއެވެ.

ޖާބިރު ވިދާޅުވީ މަޖިލީހުގެ ރައީސް މިހާރު ހުންނެވީ ފެއިލް ވެފައި ކަމަށާއި، އެކަން އެ މަނިކުފާނުވެސް ގަބޫލު ކުރައްވަން ޖެހިވަޑައިގަންނަވާ ކަމަށެވެ.