ރ.ފުއްގިރި ކުއްޔަށް ދިނުމުގައި ކުރީގެ ރައީސް ޔާމީން ރިޝްވަތު ނަގައި، އަދި ރިޝްވަތުގެ ގޮތުގައި ލިބުނު ފައިސާ ލޯންޑާ ކުރި ކަމަށް ބުނާ މައްސަލައިގައި ޝަރީއަތުގެ ކުރިން ހުށަހަޅާ ހުށަހެެޅުންތައް ކްރިމިނަލް ކޯޓުން ބަލައި ނުގަތް މައްސަލަ ޔާމީންގެ ފަރާތުން ސުޕްރީމް ކޯޓުގައި އިސްތިއުނާފު ކުރުމުން އެކޯޓުން މިއަދު ގޮތެއް ނިންމާނެ ކަމަށް ބެލެވުނު ނަމަވެސް މިއަދު މައްސަލަ ތާވަލެއް ނުކުރިއެވެ.

ފުއްގިރީގެ މައްސަލައިގައި ދައުލަތުން ރައީސް ޔާމީނާއި އިތުރު ބައެއްގެ މައްޗަށް އުފުލާފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގެ ދަޢުވާއެވެ. ރިސޯޓެއްގެ ގޮތުގައި ރ.ފުއްގިރި ތަރައްޤީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުންކުރައްވައި 1.1 މިލިއަން ޑޮލަރު ހޯއްދަވާފައިވާ ކަމަށް ދައުލަތުން ރައިސް ޔާމީންގެ މައްޗަށް ތުހުމަތުކުރައްވައެވެ.

ޔާމީންގެ އިތުރުން މި މައްސަލާގައި ދައުވާކޮށްފައިވާ ކްރިކް ރިޒާ ވެސް ވަނީ ހެކިތަކާ ގުޅިގެން ކްރިމިނަލް ކޯޓުން ކަނޑައަޅައި، އަދި ހައި ކޯޓުން ދަމަހައްޓާފައިވާ ނިންމުންތަކެއް ސުޕްރީމް ކޯޓުގައި އިސްތިއުނާފުކޮށްފައެވެ. އެ މައްސަލާގައި އެންމެ ފަހުން ބޭއްވި އަޑުއެހުމުގައި ފަނޑިޔާރުންގެ ބެންޗުން ވަނީ ހުކުމް ކުރުމަށް މިއަދުގެ ތާރީހު ދެއްވައިފައެވެ.

ނަމަވެސް, ސުޕްރީމް ކޯޓުގެ މިއަދުގެ ތާވަލަކު އެ މައްސަލައެއް ނެތެވެ. ސުޕްރީމް ކޯޓުގެ ބަހެއް ނުލިބޭތީ ތާޥަލުނުކުރި ސަބަބެއް ސާފެއް ނުވެއެވެ. މިއަދު ހުކުމް ކުރުމަށް ތާވަލުގައި ނެތް އިރު، ދަށު ކޯޓުގައި ހިނގަމުންދާ ޝަރީއަތް މަޑުޖައްސައިލުމަށް ވެސް ސުޕްރީމް ކޯޓުން އަންގާފައިވަނީ މިއަދުގެ ނިޔަލަށެވެ. އަދި ސުޕްރީމް ކޯޓުން ވަގުތީ އަމުރުގެ މުއްދަތު އިތުރެއް ވެސް ނުކުރެއެވެ.

މިދިޔަ ހަފްތާގައި ސުޕްރީމް ކޯޓުގައި އޮތް އަޑުއެހުން ނިންމަވާލައްވަމުން ވެސް މައްސަލަ ބައްލަވާ ބެންޗްގެ ރިޔާސަތު ބަލަހައްޓަވާ ފަނޑިޔާރު ހުސްނުއްސުއޫދު ވިދާޅުވީ ހޯމަ ދުވަހުގެ ކުރިން މިމައްސަލައިގައި ގޮތެއް ނިންމޭނެ ކަމަށް އުއްމީދު ކުރައްވާ ކަމަށެވެ.

ރ.ފުއްގިރީގެ މައްސަލައިގައި ރައީސް ޔާމީންގެ މައްޗަށް ދައުލަތުން ދަޢުވާ އުފުއްލަވާފައިވާއިރު، ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލެވި ދެ ދަޢުވާއެއް ސާބިތުވުމާ ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ޙުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވާފައެވެ. އަދި އެމަނިކުފާނު މިވަގުތު ހުންނެވީ ޙުކުމް ތަންފީޒުކުރެއްވުމަށް ކ.މާފުށީ ޖަލުގައެވެ.

މިހާރު އުފުއްލަވައިފައިވާ ދައުވާތައް ސާބިތުވެއްޖެ ނަމަ، މަދުވެގެން ފަސް އަހަރުގެ ޖަލު ޙުކުމާއެކު، ޖޫރިމަނާގެ ޙުކުމެއް އަންނާނެއެވެ.