ކުޑަކުއްޖެއްގެ ކަންކަށިމަތީގައި ޖެހި ފުލުހަކު ކުރިމިނަލް ކޯޓުން 18،000 ރުފިޔާއިން ޖޫރިމަނާ ކޮށްފިއެވެ.
2016 ވަނަ އަހަރު އައްޑޫ ހިތަދޫގައި ހިނގި މިހާދިސާގައި ކުށްވެރިވާކަމަށް ނިންމާފައިވަނީ ލ. ތިދޫއަށް އުފަން ފުލުހެކެވެ.
ފުލުސްމީހާ މި ދައުވާއަށް އިންކާރު ކޮށްފައިވި ނަމަވެސް، ކުރިމިނަލް ކޯޓުން ހުކުމް ކޮށްފައިވަނީ، މަގުމަތީގައި ބަހައްޓާފައިހުރި ރިފްލެޓަރެއްގައި ކުޑަކުއްޖާ ޖެހުމުން، ފުލުސް މީހާ އެ ކުއްޖާގެ ގައިގައި ޖެހިކަން ހެކިންގެ ހެކިބަހުން ސާބިތުވާކަމުގައެވެ.
އަދި މިހާދިޔާއާއި ގުޅިގެން ކުޑަކުއްޖާ ސިއްޙީ ފަރުވާ ހޯދާފައިވާއިރު، ސިއްޙީ ލިޔެކިޔުންތަކުން ކުޑަކުއްޖާއަށް ލިބިފައިވާ އަނިޔާތައް އެގެން ހުރިކަމަށްވެސް ހުކުމްގައި ބަޔާން ކޮށްފައި ވެއެވެ.
ފުލުސްމީހާގެ ކުށުގެ އަދަބަކީ ދެ މަހާއި 12 ދުވަހަށް ޖަލަށްލުން ކަމަށްވިނަމަވެސް، މިއީ ކުޑަކުއްޖަކަށް ކުރި އަނިޔާއަކަށް ވާތީ ކުށުގެ އަދަބު ގާޒީ އެންމެ ފުރަތަމަ ދެ ދަރަޖަ މަތިކޮށްފައި ވެއެވެ. އެެހެންނަމަވެސް ފުލުސްމީހާ އެދުނީ ކުށުގެ އަދަބު ޖޫރިމާނާއަކަށް ބަދަލު ކޮށްދިނުމަށެވެ.
މިގޮތުން ފުލުސް މީހާ ވަޒީފާއެއްގައި ހުރުމާއެކު، އޭނާގެ މައްޗަށް އެހެން ކުށެއް ސާބިތުވެފައި ނުވާތީއާއެކު އަދި އަދަބު ލުއި ކޮށްދިނުމަށް ދައުލަތުންވެސް އިންކާރު ކޮށްފައިނުވާތީ އޭނާގެ އަދަބު ޖޫރިމާނާއަކަށް ކުޑަ ކޮށްދިނީއެވެ. ޖޫރިމާނާގެ ފައިސާ 3 މަސްތެރޭ ދައުލަތަށް ދެކުމަށް ހުކުމްގައި ބަޔާން ކޮށްފައި ވެއެވެ.
ކޮމެންޓު ފޮނުވާ