އައްޑޫއަށް ތަރައްޤީ ގެނެސްދޭނެ ވެރިއަކީ ރައީސް ޞާލިހުކަން މިހާރު ޤަބޫލުކުރެވެން ފަށާފައިވާކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

އޭނާ މިހެން ވިދާޅުވީ ސަރުކާރުން އައްޑޫގައި ކުރިއަށް ގެންދާ ގިނަ މަޝްރޫޢުތަކާއި، ފެށުމަށް މަސައްކަތް ކުރަމުންދާ މަސައްކަތަކަށް އަލި އަޅުވާލަމުންނެވެ. ޝަރީފް ވިދާޅުވީ މީގެ ކުރިން އައްޑޫ ސިޓީގެ ތަރައްޤީއަށް މާބޮޑު މަސައްކަތްތަކެއް ނުކުރެވި ވީނަމަވެސް އައްޑޫ ސިޓީގެ މުޅި މަލަމަތި ބަދަލުކޮށް މުޅިން އާސިޓީއެއް އުފަންވުމުގެ ކުލަވަރު ފެންނަމުންދާކަމަށެވެ.

އައްޑޫ ސިޓީގެ ތަރައްޤީގެ އެންމެ މުހިންމު އެއްބައިވެރިއަކީ ރައީސް ޞާލިހު ކަމަށާއި، ރައީސް ޞާލިހަށް އައްޑޫ ތަރައްޤީ ނުކުރެވޭނެކަމަށް މީގެ ކުރިން ހީކުރަމުންދިޔަ މީހުންނަށްވެސް އައްޑޫ ތަރައްޤީ ކުރާނީ ރައީސް ޞާލިހުކަން ގަބޫލު ކުރެވެން ފަށާފައިވާކަމަށެވެ. މިއަދު އައްޑޫ ސިޓީން ފެންނަމުންދާ ތަރައްޤީގެ ކަންކަމަށް ބާލާއިރު ކުރިމަގު ފެންނަނީ ވަރަށް އުޖާލާކޮށް ކަމަށް ޝަރީފް ވިދާޅުވިއެވެ.

އައްޑޫ ސިޓީއަށް ތަރައްޤީ ގެނެސްދެއްވާނެ ވެރިއަކީ ރައީސް އިބްރާހިމް މުހައްމަދު ޞާލިހުކަމަށް ކުރިން ޤަބޫލުނުކޮށް ތިބި މީހުންވެސް މިހާރު ގަބޫލު ކުރަން ފަށައިފި. އައްޑޫ ސިޓީގެ މަލަމަތި ބަދަލުވާން ފަށައިފިި. މުޅިން އާ ސިޓީއެއް އުފަން ވުމުގެ ކުލަވަރު ފެންނަން ފަށައިފި. މުސްތަގުބަލަށް އޮތް އުންމީދު އާލާވަން ފަށައިފި.

– ޝަރީފް ވިދާޅުވިއެވެ.

އައްޑޫ ސިޓީއަކީ މިސަރުކާރުން އެންމެ ގިނަ މަޝްރޫރު ހިންގަމުންދާ އެއް ސިޓީއެވެ. ނަމަވެސް ކުރިއަށް ގެންދާ މަޝްރޫޢުތައް އެންމެ އެކަށީގެންވާ ސްޕީޑުގައި ކުރިއަށް ނުދިއުމާއި، މަސައްކަތުގެ ފެންވަރާއި ގުޅޭގޮތުން ގިނަ ރައްޔިތުން ދަނީ ސުވާލު އުފައްދަމުންނެވެ. އެގޮތުން މަގު ހެދުމާއި، އެއާޕޯޓް މަސައްކަތާއި، މިނޫންވެސް ރައްޔިތުންނާއި ގުޅުން އޮތް މުހިންމު މަސައްކަތްތައް އެންމެ އެކަށީގެންވާ ސްޕީޑުގައި މަސައްކަތް ކުރިއަށް ނުދާކަމަށް ގިނަ ބަޔަކު ދަނީ ބުނަމުންނެވެ.