މައުލޫމާތު ހޯދާ ލިބިގަތުމުގެ ޤާނޫނުގެ ދަށުން ނޫސްވެރިންނާއި، އާންމު ފަރާތްތަކުން އެކި އިދާރާތަކުގައި އެދޭ މައުލޫމާތު ހޯދުމަށް މިހާރު މާބޮޑަށްވެސް ދަތިކަމަށާއި، މިއީ ޤާނޫނު ތަންފީޒު ކުރުމުގައި އޮތް ބޮޑު ގޮނެޖެހުމެއް ކަމުގައި އިންފޮމޭޝަން ކޮމިޝަނަރު އާހިދު ރަޝީދު ވިދާޅުވެއްޖެއެވެ.
މިއަހަރު ފާހަގަކުރި ނޫސްވެރިކަމުގެ މިނިވަންކަމުގެ ދުވަހާއި ގުޅިގެން މީޑިއާ ކައުންސިލާއި ބްރޯޑްކާސްޓިން ކޮމިޝަނާއި ދިވެހި ނޫސްވެރިންގެ ޖަމިއްޔާ ގުޅިގެން ބޭއްވި ނޫސްވެރިންގެ ސައްލާ ޕްރޮގުރާމުގައި އާހިދު ވަނީ ދުނިޔޭގެ ނޫސްވެރިންގެ ދުވަހެއް ފާހަގަކުރާއިރު، ރާއްޖޭގައި މައުލޫމާތު ހޯދާ ލިބިގަތުމަށް މިހާރު ބޮޑެތި ގޮންޖެހުންތަކެއް ހުރިކަން ފާހަގަކުރައްވާފައެވެ. ނޫސްވެރިންނާއި، އާންމު ފަރާތްތަކުން އިދާރަތަކާއި މުއައްސަސާތަކުގައި އެދޭ މައުލޫމާތުތަކުގެ ހާމަކުރެވެން ހުންނަ ވަރަށް އާދައިގެ މައުލޫމާތުވެސް ނުދޭކަމީ އޮތް ބޮޑު ކަންބޮޑުވުމެއްކަމަށެވެ.
މައުލޫމާތު ހޯދާ ލިބިގަތުމުގެ ޤާނޫނަކީ ވަރަށް ފުރިހަމަ މައުލޫމާތު ހޯދަން އެދޭ ފަރާތަކަށާއި، މައުލޫމާތު ފޯރުކޮށްދޭ ފަރާތަަށްވެސް ޤާނޫނީ ކަށަވަރުކަން ލިބިދީފައިވާ ފުރިހަމަ ޤާނޫނަކަށް ވީނަމަވެސް ފެނިގެންދަނީ ޤާނޫނު އެންމެ ފުރިހަމައަށް ތަންފީޒު ނުކުރެވޭތަން ކަމުގައި އާހިދު ވިދާޅުވިއެވެ.
މި ގާނޫނަކީ ވަރަށް ރަނގަޅު ގާނޫނެއް، އަޅުގަނޑުމެން ވަރަށް ގިނައިން އެހެން ގާނޫނުތަކަށް ވެސް ބުނާ އެއްޗެއް، ކަރުދާހުގައި ކިތަންމެ ރީތިކޮށް ލިޔެވިފައި އޮތަސް އެ ގާނޫނު ނުހިންގޭ ކަމަށް ވަންޏާ ވަރަށް ބޭކާރު އެއްޗެކޭ، އެ ކަހަލަ ނިޝާންތަކެއް މި ފެންނަން ފަށަނީ.
– އާހިދު ވިދާޅުވިއެވެ.
އާހިދު ވިދާޅުވީ، ފާއިތުވެދިޔަ ދުވަސްތަކުގައި އިންފޮމޭޝަން ކޮމިޝަނަރު އޮފީހަށް މައުލޫމާތު ހޯދަން އެދި މައުލޫމާތު ނުލިބިގެން ގިނަ އަދަދެއްގެ ޝަކުވާ ހުށަހަޅާފައިވާކަމަށެވެ. ޝަކުވާތައް ގިނަ ވަނީ މައުލޫމާތު ހޯދަން އެދޭ މިންވަރު އިތުރުވުމުން ކަމުގައި ވީނަމަވެސް މައުލޫމާތު ހާމަކުރުމަކީ ކުރަންޖެހޭ ކަމެއްކަމަށް އާހިދު ވިދާޅުވިއެވެ. އޭނާ ވިދާޅުވީ ނިމިދިޔަ 2022 ވަނަ އަހަރު އެކި އިދާރަތަކުން މައުލޫމާތު ނުދީގެން ގިނަ އަދަދެއްގެ ޝަކުވާ ހުށަހެޅުކަމަށެވެ.
އަދި ނިމިދިޔަ އަހަރީ ފާއިތުވެދިޔަ ހަތް އަހަރާއި އަޅާބަލާއިރު މިއުލޫމާތު ނުލިބިގެން އެންމެ ގިނަ ޝަކުވާ ހުށަހެޅުނު އަހަރުކަމަށެވެ. އާހިދު ކަންބޮޑުވާ ކަމަކީ އެ ޝަކުވާތަކުގެ ތެރޭގައި، އެއްވެސް ޖަވާބެއް ނުލިބިގެން އަންނަ ޝަކުވާ ގިނަވުމެވެ. ޝަކުވާތަކުގެ 80 ޕަސެންޓް ޝަކުވާއަކީ އެއްވެސް ވަރަކަށް "އަޅާ ނުލައިގެން" އަންނަ ޝަކުވާތަކެވެ.
މިދިޔަ އަހަރުން ފެށިގެން، 2022 އިން، އިދާރާތަކުން މައުލޫމާތު ނުދީގެން އަޅުގަނޑާ ހަމައަށް ޝަކުވާ އައިސްފައި ހުރި މިންވަރަކީ އޭގެ ކުރީ ހަތް އަހަރަށް ވުރެ ގިނަ، 16 މަހުގެ ވާހަކަ މި ދައްކަނީ، ލިބުނު ޝަކުވާތައް ގިނަ ވެއްޖެއޭ ކުރީ ހަތް އަހަރަށް ވުރެ.
– އާހިދު ވިދާޅުވިއެވެ.
އިންފޮމޭޝަން ކޮމިޝަނަރަކީ މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުން މަތިކޮށްފައިވާ ޒިންމާތަކާއި، ކަމާއިބެހޭ އެހެނިހެން ޤާނޫނުތަކާއި ގަވާއިދުތަކުގެ ދަށުން އުފުލަން ޖެހޭ ޒިންމާތަކުގެ ބޭނުމަށް ސީދާ ރައްޔިތުންގެ މަޖިލީހަށް ޖަވާބުދާރީ ވާންޖެހޭ މިނިވަން ބޭފުޅެކެވެ.
އިންފޮމޭޝަން ކޮމިޝަނަރުގެ އޮފީހަކީ، މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ރައްޔިތުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ޢައްޔަންކުރައްވާފައިވާ އިންފޮމޭޝަން ކޮމިޝަނަރުގެ މަސްއޫލިއްޔަތު އަދާކުރުމަށްޓަކައި 13 ޖުލައި 2014 ގައި ރައީސުލްޖުމްހޫރިއްޔާ އުފައްދަވާފައިވާ އޮފީހެކެވެ.
