މަސްވެރިކަން ކުރުމަށް އެހާ ބޭރަށް ނުނިކުތަސް މަސް ބާނާ ކަމަށާއި ދެކުނުގެ މަސްވެރިން މަސްބާނަނީ ކޮންމެ ފަހަރަކު 100 މޭލަށް ނުކުމެގެން ނޫން ކަމަށް ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ވިދާޅުވުމާއި ގުޅިގެން ކުރީގެ ބަންޑާރަ ނައިބު ޑރ.މުޙައްމަދު މުނައްވަރު ފާޑުވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ފިޝަރީޒް މިނިސްޓަރ ޑރ.ހުސައިން ދެއްކެވި ވާހަކަތަކަށް ރަށްދު ދެއްވާ ޑރ.މުނައްވަރު ވަނީ މިއަދު ކުރިއަށްދިޔަ ޗާގޯސްގެ މައްސަލައާއި ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި މިކަމަށް އަލިއަޅުއްވާލައްވާ ވާހަކަދައްކަވާފައެވެ.
ޑރ.މުނައްވަރުގެ ވާހަކައިގައި ރާއްޖޭގެ މަސްވެރިން މި ބާނާ މަހުގެ ބާވަތްކަމަށްވާ ކަޅުބިލަމަހާއި ކަންނެލި ނުވަތަ ޓޫނާ މަހަކީ، އެކި ސަރަޚައްދުތަކުގައި ދުވާ މަހުގެ ބާވަތެއްކަން ފާހަގަކުރެއްވިއެވެ. ވީމާ މަސް ބޭނުމަށް މަސްވެރިން އެކި ހިސާބުތަކުގައި މަސްވެރިކަން ކުރަމުން އަންނަ އިރު، ރާއްޖޭގެ އިޤްތިޞާދީ ކަނޑުގެ ސަރަޚައްދެއް ސަރުކާރުން މިގޮތަށް ދޫކޮށްލެއްވުމަކީ މަސްވެރިންނަށާއި ދިވެހި ގައުމަށް ލިބިގެންދިޔަ ވަރަށް ބޮޑު ދެރައެއްކަމަށް ވިދާޅުވިއެވެ.
ޓޫނާގެ ބާވަތަކީ އެކި ފަހަރު އެކި ދިމާލުގައި އުޅޭ މަސްތަކެއް. ޓޫނާ ބޭނުމަށް މަސްވެރިން އެކި ދިމަދިމާއަށް މަސްވެރިކަމަށް ދާނެ. ނަމަވެސް ފާނުގެ މަސްވެރިކަން ރަށާއި ކައިރިން ކުރެވޭނެ.
ޑރ.މުނައްވަރު ވިދާޅުވިއެވެ.
ފިޝަރީޒް މިނިސްޓަރު ވިދާޅުވެފައިވަނީ ރާއްޖޭގެ މަސްވެރިން 100 މޭލު ބޭރަށް ނުކުތުމަކީ އެކަށީގެންވާ ކަމެއް ކަމަށާއި އަދި އެއަށްވުރެ ބޭރަށްވެސް ނުކުމެދާނެ ކަމަށެވެ. ނަމަވެސް ބޭރަށް ނުކުމެ މަސް ބޭނިތޯ ނުވަތަ ނޫންތޯ ބެލުން މުހިންމު ނޫން ކަމަށް ވިދާޅުވެފައިވެއެވެ.
މިނިސްޓަރ ވިދާޅުވީ ރަށާ ކައިިރިން މަސް ބޭނުނު ވަރަކަށް މަސްވެރިންނަށް ފައިދާ ވާނެ ކަމަށާއި ސަބަބަކީ ތެލުގެ ޚަރަދު ކުޑަވެފައި ތެލަށް ބަރޯސާވާ މިންވަރު ކުޑަވާނެތީ ކަމަށެވެ.
މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ.މުނައްވަރު ވަނީ ކަނޑުގެ މައްސަލައިގައި ރާއްޖެެއިން ޓްރައިބިއުނަލްއަށް ދިޔައީ ކީއްކުރަންތޯ ވެސް ސުވާލު އުފައްދަވާފަ އެވެ. އޭނާ ވިދާޅުވީ މި ސަރުކާރުން އޮތީ ހަމަހަމައަށް ކަނޑު ބަހަން ކުރިން އެއްބަސްވެފައި ކަމަށެވެ.
ހަމަ އެހެންމެ އިޓްލޮސްއިން ނިންމުމަށް ފަހު އެ މައްސަލަ އިސްތިއުނާފް ކުރަން 30 ދުވަސް ލިބޭއިރު ދެން އިސްތިއުނާފް ކުރަން އޮތީ ކޮން އެއްޗެއްތޯ ވެސް މުނައްވަރު ސުވާލު ކުރެއްވި އެވެ.
އިޓްލޮސްގެ ނިންމުމާއެކު ރާއްޖޭގެ ކަނޑުގެ ސަރަހައްދުން 47،000 އަކަ މޭލު ވަނީ ގެއްލިފަ އެވެ. އެހެންވެ އެކަމާ ގުޅިގެން އިދިކޮޅު ހުރިހާ ޕާޓީތަކުން ވެސް ވަނީ ކަންބޮޑުވުން ފާޅުކޮށްފަ އެވެ. އަދި އެ ނިންމުން ބަލައިނުގަންނާނެ ކަމަށް އެ ޕާޓީތަކުން ވަނީ ބުނެފަ އެވެ.
